¹ Nzeam asakumuna Nowe ti aman ande, mby atuba nda wo ndenden: "Wuragni, kumagni entsign, yuragni buu. ² Ayakum gnu vear ali wagnam inkeankum ne buu waloluragni, ti wamfuru ne dzug, vim enkeankum etsa nda ne buu, ti wanse inkeankum ne nzey: wali ne mbwo ignu. ³ Vim enkeankum etsa nda, mpi eli na luzingu, ayayiawo vim agnu a nda: ndopeagni inkeankum inagn kamsi asagn a mvu. ⁴ Kansi, opayalakagni ve oky ti moyo ende, ti aluung ande. ⁵ Jiagni mpi gnugnun ayakeame ongwignagnialuung a moyo ignu, ayakeame ngwigna wog ya gnam enkeankum, mpi ayakeame ngwigna moyo e wur ya wur, ya wur eli otwung onde. ⁶ Yug atipur aluung a wur, wur emuu mpi ayapur nde aluung ande, djwi Nzeam amikie wur ne ignignig inde. ⁷ Mby gnu, wuragni mpi kumagni entsign, paagnagni ne buu opfugn mpi wuragni ne okiri." ⁸ Nzeam akeantuba nda Nowe ti aman ande ndenden: ⁹ "Yenagni, ndakie alien ame ti gnu, ti ndwong aman ayasapwe ne mby egnu; ¹⁰ ti ya vim ankeankum azinga ti gnu, eyia wamfuru to wagnam, ata wagnam inkeankum ili ne buu, ata inkeankum iyipwi ne ashwa, ata wagnam inkeankum ne buu. ¹¹ Ndakie alien ame ti gnu: kaku djuung imog ve iyafiwa na mpiye e vay, mpi epafiyia ve na mvuye djwi na ndjaag buu." ¹² Mby Nzeam atuba ndenden: "Ene eli kidimu e alien amikieme ti gnu, ti vim ankeankum azinga ondii omog ti gnu, mvwe na mvwe. ¹³ Ntitsug ota ome ne mafuba, ayayiakawo kidimu djwi na alien ame ti okiri. ¹⁴ Ntangu eyatsugaka me mafuba ne dzug ondii omog, ota onagn ayapwiyaka wo ne mafuba; ¹⁵ mby ayakanakame alien ame ti gnu, ti vim ankeankum azinga, ti vim ankeankum ali na djuung, mpi vay apayafiyia diaka mpiye ve djwi na ndjaag vear. ¹⁶ Ota ayayiakawo ne mafuba, mby ayalirakame, djwi na nkea nkana alien a mvwe na mvwe e Nzeam ti vim ankeankum azinga, vim enkum eli na djuung ne okiri." ¹⁷ Mby Nzeam atuba nda Nowe ndenden: "Ene eli wog kidimu e alien amikieme ti vim ankum ali na djuung ne okiri." ¹⁸ Aman a Nowe ayipwi ne ashwa ayiwo: Sem, Sham ti Yafeti. Sham ayiinde tea e Kanaana. ¹⁹ Enagn aman ampeam asar a Nowe, mby aman awo ayisawo wur s'ayuriwo okiri. ²⁰ Nowe s'abanikinde mfuy ivur, afuy mpi ti vinu. ²¹ Agnua vinu ayuy. Woyen ativur neti imon inde evuru e kapo. ²² Sham, tea e Kanaana, ayen tea nde kaku eleam ne djuung, mby akea nkaba atwung ande ape. ²³ Mby Sem ti Yafeti s'avey wo kazag, watsug ne nseam apag, walekien ombimbiy, s'adzub wo djuung i tea wo; atshimiwo ilung iwo nteang, wakayen djuung i tea wo ve. ²⁴ Nowe, ntangu emiby nde ne iyuy inde i vinu, wokaba vii amikie mon nde enagn. ²⁵ Mby atuba ndenden: "Kanaana ali na nkuu! Ayii mpfumi e wampfumi e atwung ande!" ²⁶ Akea ntuba ndenden: "Lokumu ya Yaweh, Nzeam e Sem, kansi Kanaanaayii mpfumi ewo! ²⁷ Nzeam angami ntn i buu i Yafeti, apier ne mvuru i kapo i Sem, mby Kanaana ayii mpfumi ewo!" ²⁸ Nowe, ne mby e mpiye e mvuye enagn, asande zinga mvwe nkama tsar na otean. ²⁹ Nshuu i Nowe inkeankum ayiwo mvwe nkama iwua n'otean, mby s'awinde.