¹ Yozefo atuba nda wur otshia evuru ende ndenden: "Yura abwomo a vear ane na vim a nda, Yura tii n'oshin isikug wo mvara, mpi okeara ekri e wur na wur ne nsor ibwomo inde. ² Asitsug yie mpi ikob ime, ikob etiempar, ne nsor ibwomo i mon ilieng inagn, ti ekri ende antu." Wur otshia akie mpi ko oshin omituba Yozefo nda nde. ³ Ne suka enagn, ntangu emikeam vuna, wakeara vear anagn wakien na wampunda iwo. ⁴ Ayiwo watipwe nelien e wiya enen, kansi watokum etey ve. Yozefo atuba nda wur ende otshia ndenden: "Yima, sadjie vear anagn, mby ntangu esavea yie, tuba ya wo yeyen: 'Djwi na nge emikearagnu ipwo na iwuo? ⁵ kaku gnu na ikob itsa gnua nkum eme vay neti, ikob itsa nde njia vii? Otikiagni epwo.'" ⁶ Wur otshia avea vear anagn, atuiba mpi ko vii anagn. ⁷ Wokeara wuwun: "Djwi na nge nkum esu etuba ngean? Nzeam awum vear ayie otshia yug watikie oshin onagn! ⁸ Yen, wean okeari su, yim ko buu e kanaana, ekri eyiyen su ne abwomo asu, mby oshin onkagn enakama su ko etiempar to wolo n'evuru e nkum eyie?" ⁹ Ne kati e vear ayie otshia ene, esiyen wo n'ikob inagn, awe, mby su sisayia ampfum a nkum esu!" ¹⁰ Nde mpi atuba ndenden: "Eyii ko oshin omituba gnu! Wur esiyen me n'ikob inagn, asiyia nde mpfumi eme, mby gnu, opayiagni na djwi ve." ¹¹ Etean kaku, wur na wur aky ibwomo inde ne buu, mpi wur na wur angama ibwomo inde. ¹² Wur otshia s'apay nde abwomo awo, abana ya jii wo intsuru tii ko mon ilieang, mby s'ayen wo ikob n'ibwomo i Benjamin. ¹³ Wayara ileam iwo, wur na wur akeara ibwomo inde ne dzug i mpunda, mby s'akey wo ne wiya enen. ¹⁴ Yuda ti atwung ande wakum n'evuru e Yozefo, nde mpi ayiwo aliko. Mby wababa ne buu ne nteang ende. ¹⁵ Yozefo atuba nda wo ndenden: "Djwi iwo nge emikie gnu? Opijiagni ve gnugnun wur kamsi me, ndi na ekub e njia vii?" ¹⁶ Yuda akeara ndenden: "Nge esifituba su ya nkum esu? Oshin onkagn esifituba su? Oshin onkagn esifiplege su? Nzeam atiyen ipwo i vear ayie otshia. Wean sitikum ampfumi ayie nkum esu, na su, na wur emiveawo ikob n'ibwomo inde." ¹⁷ Mby Yozefo atuba ndenden: "Nzeam atun akieme oshin onagn! Ko wur emitshung wo n'ikob, ndug wur esiyia mpfumi eme, kansi gnu amuu anagn, kea mveanagni na ngemba etay eli tea gnu." ¹⁸ Mby Yuda avanga mbeama na Yozefo, atuba ndenden: "Na ngy eyie nkum eme, wur eyie otshia atopur ivim otuba, nkum eme ayug, mpi akwon ngyug nkier nda me wur eyie otshia! Djwi yie, oli kamsi Faraon. ¹⁹ Nkum eme, aywiyie vear ayie otshia yeyen: 'Olagni na tea, to na okwom?' ²⁰ Okearisu wuwun: 'Sili na ognugn o tea su, ti okwom su ilieng, emiwur nde n'ognugn onde; mon enagn, ayinde ti jii nde ompeam, amiwa, ayiwo wape mea emog; imisatsuga ko ndemie, mby tea nde oleang entsign.' ²¹ Atubi yie ya vear ayie otshia yeyen: 'Yagagni ti nde etay eli me, djwi moyen na vy ame.' ²² Akearisu ya yie wuwun: 'Mon apakug nam nda tea nde ve, yug aminam nda nde, tea asiwande.' ²³ Atubi yie ya vear ayie otshia yeyen: 'Yug okwom gnu e nsuka akayia nda gnu ve, opakea ngyenagni elung eme ve.' ²⁴ Ntangu emikea su mvean etay e tea su, wur eyie otshia, okabisu otuba oyie nkum esu. ²⁵ Tea su atuba ndenden : 'Kea ntsagni, oteshumagni vim a nda.' ²⁶ Wokeara susun Sipakug nkra mpiog ve, kansi yug okwom su e nsuka ali nda su, mby asitsa su, djwi Sipakug ngyen elung e wur enagn ve, yug okwom su e nsuka akayiaka nda su.' ²⁷ Wur eyie otshia, tea su, atuba nda su ndenden : 'Ojiagni wear me angwurinde ko aman ampeam ape. ²⁸ Emog ntangu emilim nde n'evuru eme, ne abansa memen gnam amola, ogniang tii opeane, ntokey ongyen ve. ²⁹ Yug omikea mveyagni mon ene, yug ipwo imilog ya nde, enagn ondii osilogo gnu awuu ame a siy- siy ane ne wiya e bafwa, na osayu n'etura.' ³⁰ Ntangu ene, yug mikea etay e tea me, wur eyie otshia, yug mon ene kaku nde nda su, moyo ende eminaba na moyo e tea nde, ³¹ asiwande, ntangu esiyen nde mon kaku nde; enagn vear ayie otshia asitum wo awuu a siy- siy a tea su ne wiya e bafwa, na osayu n'etura. ³² Ogniang me, wur eyie otshia, ajir me odzur, na ntuba ya tea me memen: 'Yug nkokeara etay eli yie ve, ayasame tsuga ko wur epwo etay e tea me.' ³³ Ndawigna ya yie, pea mbug ya wur eyie otshia, asatsuga n'ondii o mon, nsayia mpfumi eyie nkum eme, mby mon akey mvean ti ajii ande. ³⁴ Mvutu oshin onkagn esitsame mpea ya tea me, yug mon akayia nda me? Ah! Wuo nkwon ngyen mpay isilog ya tea me."