¹ Nziya elega nshwe biu ne wiya. ² Ntangu emishir wo nda antu ayikiwo yim Ejipiti, Yakob atuba nda aman ande ndenden: "Kea ntsagni, oteshumagni vim à nda." ³ Yuda okeara ndenden: "Wur enagn atubinde nda su biu ndenden: 'Opayayenagni elung eme ve, yug okwom gnu enagn kaku nde nda gnu. ⁴ Yug oling ntum okwom su sitsi ti nde, asitsa su, asshum su vim a nda djwi na yie. ⁵ Kansi yug otun n'ontum nde, sipatsa mpi ve, djwi wur enagn atubinde ndenden: 'Opayeanagni elung eme ve, yug okwom gnu enagn kaku nde nda gnu.'" ⁶ Mby Israel s'atubinde ndenden: "Djwi na nge eminkiegnu me vii anagn; emikabagnu wur enagn gnugnun olagni ti okwom gnu emuu?" ⁷ Wakeara wuwun: "Wur ewo atiteyuwe esing eli su, ti vear opeang esu, ndenden: 'Tea gnu ali ko ne luzingu? Olagni n'okwom gnu emuu?' Mby s'akeari su mvutu ne vii ayuwe nde. Nge su anakug su njia susun asituba nde ndenden: 'Yagagni ti okwom gnu?'" ⁸ Yuda atuba nda tea nde Israel ndenden: "Sianga mon aye nda me, djwi siyimi, sikien, mpi asivug su, sipawa ve, su, yie ti aman asu. ⁹ Asijuwe yie me djwi na nde, asoyuwe yie nde n'ewuo eme. Yug nkokeara nde ondii oli yie ve, yug mpi nkojie nde e nteang eyie ve, mby omvey wur epwo ne nteang eyie. ¹⁰ djwi yug sikwon ngyia etean ve, anayia wo sititsa mbala ipe sitikea." ¹¹ Tea wo Israel atuba nda wo ndenden: "Ogniang waloling ko nde, kiagni ngean: 'Ne abwomo agnu, tsugagni vim a wuo- wuo etsasu nkie ne wiya su, djwi otsi mpeagni makabu ya wur enagn: ivim i oyuyi, ananagn a nsuu, ivim i mpag, ti vir a nziga. ¹² Veyagni ekri ne isuu inagn mbala ipe, kearagni ti ekri eyitsug wo ne nsor abwomo agnu, mbala emuu ajing wo. ¹³ Veyagni okwom gnu, yimagni, keagni etay e wur enagn. ¹⁴ Nzeam nkea biu opiagni ngrasia ne nteang e wur enagn, mpiasiangi ti otwung ognu emuu enagn, okeyagni ti nde, ti Benjamin! Mby me, yug nding ngwo aman a me, asiwuo me!" ¹⁵ S'avey wo makabu inagn, wavey isuu ekri enagn mbala ipe, ti Benjamin, wayima, mby s'akri wo Ejipiti, watsa mpwe ne nteang e Yozefo. ¹⁶ Yozefo, ntangu emiyen nde Benjamin atiyia nda wo, atuba nda wur ende otshia ndenden: "Shwer vear anagn n'evuru, djag gnam, say, djwi vear ane asilawo ti me ondii omog ne ntangu e djum n'ipe." ¹⁷ Wur enagn akie mpi ko oshin omituba Yozefo, mby s'avarinde vear anagn n'evuru e Yozefo. ¹⁸ Wayug womo ntangu emashwer wo n'evuru e Yozefo, mby watuba wuwun: "Emitevara wo nendien eli o djwi n'ekri eyikeari wo neti abwomo asu mbala eyiyi su egni; asitekir nde, asitegnuna nde nendien, asitevey nde kamsi ampfumi ande, asisande kuma wampunda isu ine." ¹⁹ Wavanga mbeama na wur otshia e Yozefo, watuba wa nde ne mbwung evuru wuwun: ²⁰ "Ngea, nkum, ayisu mbala emuu nendien na nshum vim a nda. ²¹ Mby ntangu emikum su ne ondii ofwete su mvur otshuu onkum, singama abwomo asu, siyen ekri e wur na wur etikea ne nsor ibwomo inde, ko ne isuu iwo: wean sitiyia na wo lwo. ²² Sitiyia mpi na ekri emuu djwi na nshum vim a nda. Sipijia ve nagn eyikeari ekri esu ne abwomo asu." ²³ Wur otshia akeara ndenden: "Ngemba eyi ya gnu! Oyayugagni womo ve. Eli Nzeam egnu, Nzeam e tea gnu atokearagni otsun ne abwomo agnu. Ekri egnu akum wo ya me." Mby atsa mpur Simeon, ojie ondii oli wo. ²⁴ Wur enagn ashwer n'evuru e Yozefo, apea vay, s'asuy wo nkuu, apea mpi adjiu a nda ya wampunda iwo. ²⁵ Wawong makabu iwo ne ntangu ekwung wo Yozefo aye ne ntangu djum n'ipe; djwi akabiwo wuwun asila wo n'evuru ende. ²⁶ Ntangu emikum Yozefo n'evuru, wopea makabu imojie wo, mby wababa ne buu ne nteang ende. ²⁷ Ayuwe vear anagn esing eli wo, mby atuba ndenden: "Ognugn o tea gnu eyitubignu ali wuo? Ali ko ne luzingu?" ²⁸ Wokeara wuwun: "Tea su, wur eyie otshia, ali wuo; ali ko ne luzingu." Mby wakea mbaba, wakea mfukama. ²⁹ Yozefo asiang vy, abug dziy etay e Benjamin, okwom nde, mon e mea nde, atuba ndenden: "Enagn ndug okwom gnu e nsuka eyitubignu?" Mby akea ntuba ndenden: Mon me, Nzeam oyug yie ngy!" ³⁰ Yozefo ayug nde ngy n'etura ende djwi n'okwom nde, analiye nde, mby s'akagn nde nshwe ne itwunu evuru emuu, atsa ndiye mpiog. ³¹ Ntangu emisuy nde elung, s'apwinde, akikinde ko biu e ntshung etura djwi na nkwon ndiye, atuba ndenden: "Otepiagni vim a nda!" ³² Wapea Yozefo vim a nda etay ende, atwung ande mpi etay ewo; vear a Ejipiti eyilike ti nde mpi wapea vim a nda etay ewo; vear a Ejipiti, djwi vear a Ejipiti wapikug nda ondii omog ti waYuda ve, eli ekn. ³³ Atwung a Yozefo wagneme ne ondii oli nde, bana ko mon e nsom eteang tii ko mon e nsuka, mpi walira wog na wog , na ngituka. ³⁴ Yozefo atum vear wapea vim a nda ayike ne nteang ende, mby Benjamin avea ikab inde ilenga atwung ande mbala itean. Wagnua mpi wayen osiang ti nde ondii omog.