¹ Ntangu emiyug Yakob ndenden n'Ejipiti antu aliko, atuba nda aman ande ndenden: "Djwi na nge eliragnu gnug na gnug?" ² Atuba ndenden: "Yenagni, ntiyug, wog n'Ejipiti eli na antu; kragni, otsi nshumagni mpiog, djwi sivug, sikwon ngwa." ³ Ajii a Yozefo djum s'akri wo Ejipiti djwi na nshum antu. ⁴ Yakob akatum Benjamin nda wo ve, nde ali okwom o Yozefo, alur nde mpay imuu ikakea ndog ya nde. ⁵ Aman israel wakum na nshum antu, ti vear amuu mpi atshiwo, djwi nziya ashwiwo ti ne buu e Kanaana. ⁶ Yozefo apikinde wansiku ne okiri owo, eli ndug wur eyisarike antu ya vear ankeankum ne okiri e Ejipiti.Ajii a Yozefo wayia nkr abong ne nteang ende, watsur ilung ne buu. ⁷ Yozefo ayen ajii ande, ajia ndenden eli wog; kansi akie kamsi apajia ve. Agnianga ndenden: "Oyimagni nonkagn?" Wakeara wuwun: "Siyim buu e Kanaana, ayisu nshum vim a nda." ⁸ Yozefo akea njia atwung ande, kansi wo, wakojia nde ve. ⁹ Yozefo akea nkana wandoy iyiyen nde djwi na wo, atuba nda wo ndenden: "Gnu, olagni vear apwo; watotumagni djwi oyindiragni etay esu, yugkaku su na biu ne ondii nge." ¹⁰ Wokeara wuwun: "Kaku ve, nkum esu, vear ayie otshia ayiwo djwi na nshum antu. Sankeankum sili ko aman a tea emog; situba masonga, vear ayie otshia epa sili vear apwo amitum wo djwi na ndir buu ve." ¹² Atuba nda wo ndenden: "kaku ve; otiyiagni ko djwi na ndir endii ekwon su biu ne buu esu." ¹³ Wakeara wuwun: "Su, vear ayie otshia, alisu aman djum n'ipe, aman a tea emog, ne buu e Kanaana; mon e nsuka atisatsuga lwo ene ti tea su, mpi eli na mon emog kaku nde diaka ve." ¹⁴ Yozefo atuba nda wo ndenden: "Ngyim ntuba ma gnu nendien memen olagni vear apwo amitum wo. ¹⁵ Yenagni oshin esoveagni me: Ne dzin i Faraon eli ne luzingu! Opapweagni nendien ve, yug okwom gnu e nsuka enagn atoyi nendien ve. ¹⁶ Tumagni wur emog ne kati egnu atsi mvey okwom gnu, mby gnu, otosashweagni ne bolog. Otuba ognu asikab wo, mby asijia me yug masonga eli ya gnu; yug kaku ve, ne dzin i Faraon eli ne luzingu, asiyiagnu ko vear apwo amitum wo." ¹⁷ Mby s'atsug nde wankeankum ne bolog e nshuu isar. ¹⁸ Eshuu otatu, yozefo atuba nda wo ndenden: "Kieagni ngean, djwi ovugagni, ndalur nzeam! ¹⁹ Yug olagni vear a masonga, emog ne kati egnu asatsuga ne bolog egnu, mby gnu amuu ane, tshwagagni, varagni antu agnu, opiagni wale n'opeang. ²⁰ Mby ojiagni mpi okwom gnu e nsuka djwi na ngyegne masonga ne otuba ognu mpi okwon ngwagni. wakie mpi ko oshin onagn. ²¹ Mby watuba wog na wog wuwun: "Akisu ipwo ya otwung osu, djwi awung su ngyen mpay iyinde na wo n'etura, ntangu eyiwignikinde ngrasia ya su, npi sikaleang ongyug nde ve. wog enagn mpi, mpay iwo itiyia ya su. ²² Ruben s'avey nde otuba ndenden: "Nkatubaka ma gnu mememn: 'Oyakiagni ipwo ya mon ene ve?' kansi gnu okaleangakagni na ngyug me ve. Yenagni, aluung ande wean ekea ndog ya su." ²³ Wakajia ve wuwun Yozefo ajia vii anagn, djwi asulikinde nda wo mby wur emuu atendula n'otuba owo. ²⁴ Atsa etey na wo, atsa ndiye. Akea, mby s'atubikinde nda wo, mby s'avey nde Simeon ne vy awo, s'otshung nde nkori. ²⁵ Yozefo atum vear na ngyia abwomo awo n'antu, na onkeara ekri antu neti ibwomo i wur na wur, mby s'amikeande vim a nda amuu asilawo ne mbug. S'akien mpi bo oshin onagn. ²⁶ Watsug antu ne dzug i wampunda iwo, mby s'akien wo. ²⁷ Emog ne kati ewo, angama ibwomo inde djwi na mpea mpunda vim a nda, ne ondii oyivur wo otshuu onagn, ayen ekri ne ote ibwomo. ²⁸ Mby akaba atwung ande ndenden: "Watikeara ekri eme, yenagni ewean n'ibwomo ime. Mby itura iwo isug; watuba wog na wog, na ekukuma ne djuung wuwun: " Nge emitekie Nzeam ngean? ²⁹ Wakea etay e tea wo Yakob, ne buu e Kanaana, esokaba vii ankeankum amileg ya wo. Watuba wuwun: ³⁰ "Wur eli nkum e buu ewo amituba nda su vii a biu- biu, atitevey kamsi vear apwo amitum wo. ³¹ Okabisu susun: 'E masonga, epa silivear apwo amitum wo ve. ³² Sili aman ampeam djum n'ipe, aman a tea emog; emog kaku nde diaka ve, mby mon okobo atisatsuga lwo ene ti tea su ne buu e Kanaana. ³³ Mby wur ewo eli nkum e buu, atuba nda su ndenden: 'Yenagni oshin oyajiame yug olagni vear a masonga. Sasugnagni ko wur emog ne kati egnu, veyagni vim a nda tshwag opiagni n'opeang egnu, mpi onjiagni okwom gnu e nsuka enagn. ³⁴ Mby asijiame memen epa olagni vear apwo ve, olagni vear a masonga, mby asokearagni me otwung ognu, asikug gnu nkien na ngemba. ³⁵ Ntangu emipur wo vim ankeankum ne abwomo awo, wayen obuye ekri e wur na wur n'ibwomo inde, mby s'ayug wo womo. ³⁶ Tea wo Yakob atuba nda wo ndenden: "Olendimagni ko aman ame! Yozefo ndean kaku nde diaka ve, Okey mveyagni Benjamin!Enkum enagn ekea ndog ko ya me." ³⁷ Ruben s'atubinde nda tea nde ndenden: "Ayadjag yie aman ame ampeam ankeape yug nkakea ti Benjamin; ompii na nde n'ewuo eme mpi ayokeara me ya yie." ³⁸ Yakob atuba ndenden: "Mon me apakra nda gnu ve, yug ipwo imilog ya nde ne mbug eletsignu, djwi otwung onde amiwa, amisatsuga ko ndemie; enagn olingagni ndogo awuu ame a siy- siy , na osayu ome, ne wiya e wabafwa."