¹ Ne mby e mvwe ipe, Faraon ayen ndoy. Ayen nde atiyima mbeama na nzey. ² Ayen ngombe ishambia inen-inen, djuung wuo, walepwi ne nzey, waletsu nda adjiu. ³ Ngombe ishambia imuu, ngishie- ngishie, djuung ipwo, wasapwe mby ewo ne nzey, watsa mbeama na wo n'ikri i nzey. ⁴ Wangombe i ngishie- ngishie ti djuung ipwo inagn, s'aliwo wangombe ishambia inen- inen ti djuung wuo. Mby Faraon s'abiy nde. ⁵ Emikea nde mvur, ayen ndoy ozole. Ayen nde ebiy antu ishambia inen- inen mpi i wuo, ilevean n'oshung owo. ⁶ Mby ebiy antu ashambia, ngishie- ngishie, mpi imilunga n'opepe eyim etay epwe vuna, esayia mby ewo. ⁷ Ebiy antu a ngishie- ngishie emign ebiy antu ashambia inen- inen i wuo inagn. Mby Faraon s'abiy nde ne lwong. Enagn ndoy ewo. ⁸ Ne suka enagn, faraon akayia na ngemba ve, s'atum nde vear na mvie wanganga inkeankum ti vear ali n'ontiegnankeankum ali ne buu e Ejipiti. Akaba wandoy inde. Kansi kaku ata emog eyikug na ntendula Faraon ve. ⁹ Mby nkum elir veana a vwi avey otuba, akaba faraon ndenden: "Lwo ene, ndakea nkana ipwo ime. ¹⁰ faraon ayug nde nkier nda vear ande otshia, mby s'antum nde me ne bolog, n'evuru e nkum ayer- nkuu, me ti nkum elir oliu e vwi. ¹¹ Ayen su ndoy wur na wur, ko otshuu omog, mby wur na wur avea mpi ntendula e ndoy ende eyiyen nde. ¹² Ayiwo kog ti mon onkwo emog, wur e Yuda, mpfumi e nkum ayer- nkuu. Ntangu emokaba su wandoy isu, s'atenduli nde wog. ¹³ Vii awo amilog mpi ko oshin oyitubi nde. Faraon ndean aminkeara ne otshia ome, Nkum ekir vim à nda mpi ndean sampler okor." ¹⁴ Faraon s'atum nde vear na mvie Yozefo. S'okagn wo ompur eveang- eveang- ne bolog. Akwo ndey inde, asongo ileam ne djuung, mby s'atshinde etay e Faraon. ¹⁵ Faraon atuba nda Yozefo ndenden: "Ayen me ndoy. Kaku ata wur ekug ntendula ewo ve. Mpi ntiyug wuwun atsa yie ntendula ndoy, ko yug otiyug ndoy ewo." ¹⁶ Yozefo akeara Faraon ndenden: "Epa me ve, eli Nzeam ndug esipea mvutu i wuo ya Faraon." ¹⁷ Mby Faraon atuba nda Yozefo ndenden: "Ayen me ne ndoy eme, ntiyima n'ikri i nzey. ¹⁸ mby miyen wangombe ishambia inen- inen mpi i djuung wuo, wamipwe ne nzey, s'alikiwo adjiu. ¹⁹ Wangombe ishambia imuu isapwe ne mby ewo, ngishie- ngishie, mpi ipwunu yug olir na vy, eky emishir ne djuung: ntotigni ngyen ve, ne buu e Ejipiti opfugn, wangombe ili ipwunu kamsi wo. ²⁰ Wangombe i ngishie- ngishie mpi ili ipwunu inagn, wamila wangombe ishambia inen- inen inagn. ²¹ Watamign ne apfugn awo, opayen mpi ve yeyen watishwe ne apfugn awo, waliko ipwunu kamsi eyiki wo nteang.. mby s'abiy me ne lwong. ²² S'akey me ngyen ne ndoy emuu, ebiy antu ishambia, imiyuo to na mbeam, mpi i wuo, ilevean ne oshung owo emog. ²³ Ti ebiy antu amuu ishambia, kaku ata mbeam antu neti ve, ngishie- ngishie, imilunga n'opepe eyim etay epwe vuna, itisamen ne mby ewo. ²⁴ Ebiy antu a ngishie- ngishie etimign ebiy antu ashambia inen- inen, i wuo enagn. Ntikaba wanganga, kaku ata emog emipea ntendula ewo ve." ²⁵ Yozefo atuba nda Faraon ndenden: "Ndoy imiyen Faraon inkeape ili ko vim emog; Nzeam atikaba Faraon vii ayakie nde. ²⁶ Wangombe ishambia i wuoinagn, ili mvwe ishambia; mpi ebiy antu a wuo ili mvwe ishambia; eli ko ndoy emog. ²⁷ Wangombe ishambia i ngishie ili ipwunu inagn, iyisavean ne mby imuu i nteang inagn, ili mvwe ishambia; mby ebiy antu ishambia ikwon mbeam , ili ngilunga n'opepe eyim etay epwe vuna enagn, ayayia wo mvwe ishambia i nziya. ²⁸ Wog enagn oshin omikaba me Faraon, Nzeam atikaba Faraon vim efwete nde nkie. ²⁹ Yen, ayayia wo na mvwe ishambia iyavea vear vim entsign n'okiri e Ejipiti opfugn. ³⁰ Mvwe ishambia i nziya ayasawo yia ne mby ewo, mby ayajing su oluy o vim entsign emivea su ne buu e Ejipiti, mby nziya ayalog wo ne buu esu. ³¹ Nziya ewo eyasayia, ayayia wo e biu, opafiyenagni vim a nda entsign ve ne buu esu. ³² Yug Faraon atiyen ndoy emog enagn etikea mbala ozole, elatuba wuwun djwi inagn eyim ya Nzeam, mpi Nzeam asitum nde wog eveang, djwi iwo asilog wo. ³³ Opeane, Faraon ason wur emog e waagn ti ontiegn, otsug nkum e Ejipiti. ³⁴ Faraon atsug ankum amuu ne buu esu djwi wale veyike ikab imog i vim alekeagiwo n'ivur, ne akab atean, ne buu e Ejipiti, ne mvwe ishambia iyapwe vim entsign. ³⁵ Mby watsug ondii omog vim ankeankum amivey wo ne mvwe ishambia inagn, waki wog oshin ositum Faraon n'ekub ende, wawum antu ne viya enen- enen, eyi na vear alir wog. ³⁶ Vim amiwum wo anagn, ayayia wo djwi na buu esu, djwi na mvwe ishambia i nziya iyasayia ne buu e Ejipiti, djwi okiri osu ekwon ndog ne nziya." ³⁷ Otuba onagn apiwo osiang entsign ya Faraon ti ya vear ande otshia ankeankum. ³⁸ Mby Faraon atuba nda vear ande otshia ndenden: "Asikug su ngyen wur eli kamsi nde ene, eli na Mpeve e Nzeam?" ⁴² Faraon alima kieng ende n'ewuo, alwer Yozefo n'ewuo ende, olwer mpi eleam e marikagn, olwer mpi ti ayag a wolo ne nking. ⁴³ Otsug ne dzug i mpunda ⁴² Faraon alima kieng ende n'ewuo, alwer Yozefo n'ewuo ende, olwer mpi eleam e marikagn, olwer mpi ti ayag a wolo ne nking. ⁴³ Otsug ne dzug i mpunda ozole elesedjike mpunda ende, mby vear waletsu elle nteang ende, wuwun: "Kr abong ne buu!" Enagn wog oshin eyopi Faraon ekub ne buu Ejipiti opfugn. ⁴⁴ Akea ntuba nda Yozefo ndenden: "Me, ndi Faraon! Yug yie kaku ve, wur emog apikug njir ewuo ende to ekuu ende dzug ve ne buu enkeankum e Ejipiti. ⁴⁵ Faraon apea Yozefo dzin i Zafenat Paenashi; mpi opea wear dzin inde Asnat, mon e Potifera, nganga- nzambi e On. Mby Yozefo s'apwinde ntsa ndir buu e Ejipiti. ⁴⁶ Ntangu emikum Yozefo ne nteang e Faraon, vwi e Ejipiti, ayiwo atikug mvwe osar, alim etay e Faraon, s'atear nde ne buu e Ejipiti opfugn. ⁴⁷ Ne mvwe ishambia iyipwi vim n'ivur, buu ayiwo na mafuku entsign. ⁴⁸ Yozefo avey vim ankeankum ayikeagiwo ne ivur, ne buu enkeankum e Ejipiti, ne mvwe ishambia inagn, awum wog ne viya inen- inen; atsug ne konso wiya enen, vim amikeaga wo ne ivur ili mbeama na wo. ⁴⁹ Yozefo atsug antu kamsi zelo i nzey. Atsug nde wog entsign, wapikug na ntanga abwomo ve, djwi wakajiaka isuu iwo ve. ⁵⁰ Ne nteang e mvwe i nziya inagn, Yozefo awur nde aman ampeam ape, eyowuri Asnat, mon e Potifera, nganga- nzambi e On. ⁵¹ Yozefo apea mon e nteang dzin inde Manase, djwi atubinde ndenden: "Nzeam atintum me na njing mpay ime ti opeang o tea me enkeankum." ⁵² Mby mon ozole, opea dzin inde Efraim, atuba ndenden: "Nzeam atimpea na ngwur ne okiri olime ne mpay." ⁵³ Mvwe ishambia iyiviy wo vim entsign ne buu e Ejipiti eleg. ⁵⁴ Mby mvwe ishambia i nziya ibana, ko oshin oyikab Yozefo. Nziya eshwe ne okiri imuu inagn, kansi ne buu e Ejipiti, vim a nda ayiwo. ⁵⁵ ntangu emisashwe nziya ne buu e Ejipiti opfugn, vear s'aling wo ya Faraon djwi api vim a nda. Faraon akaba vear ankeankum a Ejipiti ndenden: "Tshwagagni etay eli Yozefo, kiagni vim enkeankum esituba nde." ⁵⁶ Nziya ekum ne buu opfugn. Yozefo s'angaminde mvuru inkeankum iyiwumikiwo vim, s'asarikinde antu ya vear a Ejipiti. Nziya elega nshwe biu ne buu e Ejipiti. ⁵⁷ Mby vear ayim buu imuu etay n'etay, s'ayikiwo nshum antu ya Yozefo; djwi nziya ayiwo biu ne okiri opfugn.