¹ Yozefo akafikug ntshung etura ve ne nteang e vear ali ondii oli nde. Adzama na biu, ndenden: "Puragni vear ankeankum!" Ekafiyia na wur emuu ve ne ntangu emikaba nde atwung ande ogniang wojii nde. ² Adzama otuba na biu, aliye. Vear a Ejipiti oyug wo, ti vear ayii n'evuru e Faraon mpi ayug wo. ³ atuba nda atwung ande ndenden: "Eli mug Yozefo! Tea me ali ne luzingu? Kansi atwung ande wakakug n'onkeara mvutu ve, djwi ontwong otiyung emoyen wo. ⁴ Yozefo atuba nda atwung ande ndenden: "Vangagni mbeama na me!" Wo mpi, wayia mbeama na nde. Atuba ndenden: "Me, ndi Yozefo, otwung ognu eyisar gnu djwi wotum Ejipiti. ⁵ Opeane, oyayiagni na ngy ve, mpi oyayugagni nkier ve n'oshin oyinsar gnu ti eminjiewo nendien, ogniang Nzeam antum nde nendien djwi n'omvugagni gnu. ⁶ Yenagni, nziya etishwe ne buu, etikug lwo mvwe ipe; etisatsuga mvwe itean imuu, epayayia n'evur eyatshiwo ve, kaku vim ayakeaga wo n'ivur ve. ⁷ Nzeam antum nde nteang egnu djwi oviyagni ondii ne buu ene, djwi oyiagni na luzingu, olimagni ne mpay ininen. ⁸ Epa gnu vear ayintum nendien ve, kansi eli Nzeam wur eyintsug, mikum tea e Faraon, nkum evuru ende opfugn, mpi nkum e mbumater ne buu e Ejipiti opfugn. ⁹ Kea mveanagni eveang etay eli tea me, mpi kabagni nde gnugnun: "Mon yie Yozefo atituba ndenden: 'Nzeam amintsug nkum ne buu e Ejipiti opfugn, yag etay eli me, oyafiyia etean ve. ¹⁰ Asiyia yie mpier ne buu e Gozen, asiyia yie mpi mbeama na me, yie ti aman ayie, ti ankean ayie, ameme ayie ti wangombe iyie, ti vim ayie ankeankum aliyie na wo. ¹¹ Mpiog enagn, ayopeaka me vim anda, djwi etisatsuga ko mvwe itean i nziya, oshin onagn, opawa ve, ti yie tie vear ankeankum ali n'evuru eyie, ti vim ayie ankeankum aliyie na wo.'" ¹² Oyenagni gnemie na vy agnu, ata okwom me Benjamin ndemie ayen ndenden eli mug wur etuba nda gnu. ¹³ Kabagni tea me, nkembo elime na wo ne buu e Ejipiti, ti vii ankeankum amiyen gnu, mby okagni nkragni ti tea me eveang- eveang." ¹⁴ Ayama Benjamin ne nking, aliye; Benjamin mpi aliye ne nking ende. ¹⁵ Ayama mpi atwung ande ankeankum na iluu. Ne mby ewo, atwung ande s'asulikiwo ti nde.