¹ Watum Yozefo ne buu e Ejipiti; mby Potifar, nkum ayer-nkuu e Faraon wur e Ejipiti, s'oshum nde ya vear a Ismael, wog vear ayotum nde mpiog. ² Yaweh ayinde nda nde, mby vii ande s'aletshikiwo ko nteang. Apierikinde n'evuru e nkum ende, wur e Ejipiti. ³ Nkum ayen ndenden mkum ali nda nde, mpi Yaweh aletumiki nde vii ankeankum alekikinde ne mbwo inde iletsu ko wuo. ⁴ Yozefo avea ngrasia ne vy a nkum ende, mby s'opinde na nkiaka etshia ende. Otsug nkum n'evuru endeopea otshia na ndir vim ande ankeankum. ⁵ Ko ntangu emotsug Potifar nkum n'evuru ende ti na ndir vim ande ankeankum, Yaweh asakumuna evuru e wur Ejipiti enagn, ko djwi na Yozefo; mby lusakumuna e Yaweh s'ayiwo ne vim ankeankum ayinde na wo, ata n'evuru ata n'okwun. ⁶ Asasugn vim ande ankeankum ne mbwo i Yozefo, otshia eyisande tsuga na wo ko oliu esila nde. Kansi Yosefo ayinde entieng ompeam, ti n'elung, ti ne djuung. ⁷ Ne mby e vii ane, wear e nkum ende atsug elir ko etay e Yozefo, atuba ndenden: "Vur ti me!" ⁸ Atun, atuba nda wear e nkum ende ndenden: "Yen, nkum eme apinjia me ata na djwi imuu ipwo n'evuru ene ve, vim ankeankum alinde na wo, amipea ne mbwoime. ⁹ Apa andenga me n'onen ve n'evuru ene, mpi atompum me ata vim emog ve, ko yie, djwi oli wear nde. Djwi na nge esikie me ipwo ininen oshin onagn, mpi nki disumu etay e Nzeam?" ¹⁰ Onkear owo atubikinde nda Yozefo vii awo konso eshuu, kansi nde, atunikinde na mvur ti nde mpi na ngyia ti nde. ¹¹ Eshuu emuu, ntangu emishwe nde n'evuru djwi na nkie otshia onde, mpi ekayia na wur emuu iky ve, ¹² onkear owo ayia onkir nde n'eleam, ndenden: "Vur ti me!" Ososugna eleam n'ewuo, mby s'akim nde nelien. ¹³ Ntangu emiyen nde atososugna eleam n'ewuo, mpi atikim nelien, ¹⁴ avie vear a evuru ende, atuba nda wo ndenden: "Yenagni, Potifar amitejie wur e Yuda ene djwi aye nkagn nda su. Wur ene atiyia etay eme ndenden aye mvur nda me, mby s'amidzama me eie na biu. ¹⁵ Mby ntangu emiyug nde ndadzama elie na biu, s'amisande sugn eleam ende mbeama na me, atikim nelien." ¹⁶ Mby aky eleam e Yozefo mbeama na nde, tii ko eyikey wum nde n'evuru. ¹⁷ Mby okaba ngean: "Mpfumi e wur e Yuda emitejie yie nendien, atiyia etay eme djwi na nkagn nda me. ¹⁸ Ko ntangu emijir me otuba dzug, emidzama me olie, atisasugn eleam ende mbeama na me, s'akim nde nelien." ¹⁹ Emishir nde ngyug otuba o wear nde, emituba nde ndenden: "Lir vii aminkie mpfumi eyie!" nkum e Yozefo ayug nkier biu. ²⁰ Avey Yozefo, otsug ne bolog, ondii omog ti vear a bolog a vwi; s'ayiki nde kog ne bolog. ²¹ Yaweh ayikinde nda Yozefo, mby ayegne wuo onde ne kati ende. Opea ngrasia ne vy a nkum e bolog. ²² Mby nkum e bolog opea ekub e ndir vear ankeankum amitshung wo kog, mpi vim ankeankum ko ndug wur eyikike. ²³ Nkum e bolog akajiaka ve vim nge ayike ne mbwo i Yozefo, ogniang Yaweh ayikinde nda nde. Mby Yaweh s'apikinde lunungu ne vim ankeankum ayikikinde.