¹ Ne ntangu enagn, Yuda anam nda atwung ande, atsa etey, etay e wur emog e Adulam, dzin inde Hira. ² Mpiog enagn, Yuda s'ayen nde mon onkear omog e wiya e Kanaana, dzin i tea nde Shua, s'avey nde wear, wagneme wape. ³ Avey djim, mpi awur mon ompeam, opea dzin inde Et. ⁴ Akea mvey djim imuu, awur mon ompeam omuu, opea dzin inde Onan. ⁵ Akea ngwur mon ompeam, opea dzin inde Shela. Yuda ayinde kog ne Kzib ntangu eyiwur nde mon enagn. ⁶ Yuda atsuga mon e nteang eviewo Er, wear, dzin inde Tamar. ⁷ Er, mon e nsom eteang e Yuda, ayinde wur epwo ne nteang e yaweh, mby Yaweh s'odjag nde. ⁸ Mby Yuda atuba nda Onan ndenden: "Tshwag etay e wear e jii yie, vey nde, osawuragni aman ti nde djwi na jii yie." ⁹ Onan oshin oyijinde ndenden aman anagn wapayia aman ande ve, ntangu eyikirikinde war e jii nde, apayikinde ne buu djwi akwon ngwur aman djwi na jii nde. ¹⁰ Vim ennagn, Yaweh akaleangaka wog ve,mby s'odjag nde mpi. ¹¹ Mby Yuda s'atubinde nda okiu nde Tamar ndenden: "Sayia ko nsakwe n'evuru e tea yie, tii ko yug mon me Shela atikum intsuru." Atubikinde oshin anagn djwi na womo, ndenden mon nde Shela akafiwa kamsi ajii ande. Tamar s'akien nde, atsa mpier n'evuru e tea nde. ¹² Nshuu ileg, mby mon onkear e Shwa, wear e Yuda awa. Ntangu emishira Yuda okio, vean, atsa Timna, djwi na mbag viey i ameme, nde ti ewur ende Hira, wur e Adulam. ¹³ Watsa nkaba Tamar wuwun: "Yen, okiu yie ndign aletsu Timna djwi na ntsa mbag viey ameme ande." ¹⁴ Mby s'aliminde ileam inde i nsakwe, adzub ileam ne djuung inkeankum, agneme ne nsor e wiya e Enain, ne mbug e Timna, djwi ayenikinde Shela amikum intsuru, kansi wakaleangaka n'ompea ya nde ve djwi akum wear nde. ¹⁵ Yuda oyen, ovey kamsi onkear o nduma, djwi adzub nde elung ende. ¹⁶ Asula nda nde ne mbug ndenden: "Sianga ngi mvur ti yie." Djwi nde, akajia ve ndenden eli okiu nde onkear. Atuba ndenden: "Vim nge esimpea yie yug omiyia mvur ti me?" ¹⁷ Akeara ndenden: "Asotuma me imon i mbur ne kati e wambur ime" Onkear onagn atuba ndenden: "Asimpea yie vim emog esikir me djwi na njia memen asitum yie mbur ewo." ¹⁸ Akeara ndenden: "Vim nge esopea me? Okeara ndenden: "Tampo eyie, okaba eli n'ikini iyie, ti ikom ili n'ewuo eyie enagn." Opea mpi vim anagn. Mby s'atshinde mvur etay ende, avey mpi djim inde Yuda. ¹⁹ . Ayima, akien; alima eleam eyidzub nde, akea ndwer eleam e nsakwe. ²⁰ Yuda s'atum nde imon i mbur ewo ya ewur ende e wur Adulam, djwi nde mpi, akey mvey vim ayipinde ya onkear onagn na nkir. Kansi akayen onkear owo ve. ²¹ Ayue vear ali kog ndenden: "Onkear o nduma etsangyia ne enain nendien, ne nsor mbug, ali nonkagn?" Wokeara wuwun: "Nendien kaku onkear o nduma ve." ²² Atshim ,s'akey nde etay e Yuda, ndenden: "Nkoyen ve. Ata vear ali kog watuba wuwun: 'Nendien kaku onkear o nduma ve.' ²³ Yuda atuba ndenden: "Awum ko vim ali nde na wo enagn, kaku mpila esipur su djuung ve djwi siyug nsogn. Yen, mean ntitum imon i mbur, wean okoyen ve." ²⁴ Ne mby e ngwon ata isar, wayia nkaba Yuda wuwun: "Okiu yie Tamar ndign amikum nkie kinduma; ne kinduma ewo, ndign amivey djim." Mby Yuda atuba ndenden: "Puragni nde, bwoagni nde tshiya!" ²⁵ Ntangu elopurikiwo, atum wur na nkaba okiu nde ndenden: "Eli nkeanga vim ane wur emintsug me djim; ndawigna ya yie, tokea nkana wuo, tampo, okaba ti ikom ili n'ewuo ene eli e nagn?" ²⁶ Yuda akea njia vim awo, atuba ndenden: "Eli mug wur emikie ipwo elenga endinde, djwi nkopea nde ya mon me Shela ve." Mby akafijiaka djuung onkear owo ve. ²⁷ Ne ntangu emiyug nde lwon, yen, ayiwo n'aman ape n'ipfugn inde. ²⁸ Mby ne ntangu e ngwur, mon emog apur ko ewuo. Onkear eyosarisike na ngwur atwung oshong e kwi n'ewuo e mon ewo, ndenden: "Ene eli mon emipwe nteang." ²⁹ Kansi mon ewo akea mbin ewuo, mby otwung onde s'apwinde. Onkear eyosarisike na ngwur atuba ndenden: "Otipwe ne mbug nge!" Mby s'opinde dzin i Perez. ³⁰ Ne mby ende, otwung onde asapwe, nde mon eyitshung wo oshing o kwi; mby s'opiwo dzin i Zerash.