¹ Yakob asatsuga ne buu e Kanaana, ondii oyipierike tea nde. ² Yen aman okuu o Yakob. Ntangu emikum Yozefo na mvwe djum n'ishambia, nde ti ajii ande, alewungikiwo ameme awo; mon ene ayikinde ko mbeama na aman a Bila ti aman a Zilpa, aveari a tea nde. Yozefo aleangikinde tea nde vii ap,o ankeankum alekike atwung ande. ³ Israel aleangikinde Yozefo entsign, elenga aman ande ampeam amuu ankeankum, djwi aviy nde mon ewo ntangu emikum nde intsuru. Opinde eleam emog e ker-ker. ⁴ Atwung ande wayen tea wo oshin oleang nde Yozefo entsign, epa oshin omog ti wo ve, mby wayia na l'Impala djwi na nde. Wakafi sulaka ti nde wuo ve. ⁵ Yozefo ayen ndy, akaba atwung ande ndoy ewo, Walega ont un biu. ⁶ Akabinde ndenden: "Yugagni ndoy eyiyen me ene: ⁷ Atwung su ebuye antu ne ngnina evur; mby, obuye eme etiyima, kansi ebuye egnu emidjing obuye eme, ignu imibaba ne nteang e obuye eyime." ⁸ Atwung ande watuba wa nde wuwun: "Yie, ayavey yie ekub ne dzug isu? Yie wur eyayia nkum esu?" Mby walega ontun biu, djwi na wandoy inde, ti otuba onde. ⁹ Akea ngyen ndoy emuu, mpi Akea nkaba atwung ande, ndenden: "Atikea ngyen ndoy emuu! Ntiyen vuna, ngwon ti weer djum n'omog watinaba ne nteang eme." ¹⁰ Akaba tea nde ti atwung ande ndoy ewo. Tea nde s'ognianginde, ndenden: 'Ndoy emiyen yie enagn, elung ntuba nge? Ayayiawo nkr abong ne nteang eyie, me, mea yie ti atwung ayie?" ¹¹ Atwung ande wayia na l'Impala e biu wa nde, kansi tea nde, asawum ko vii ane n'etura. ¹² Atwung a Yozefo, ntangu emikum wo ne Sishem, djwi na mpea ameme a tea wo vim anda, ¹³ Israël atuba nda Yozefo ndenden: "Atwung ayie epa watitsa mpea ameme vim anda ne Sishem? Yag motum etay eli wo." Mby nde akeara ndenden: "Mean!" ¹⁴ . Israel okaba ndenden: "Ndawigna ya yie, tshwag pour yug atwung ayie wali wuo, mby oye nkea nkaba me." Mby Yakob s'otum nde yim obuu e Hebron, tii ko Sishem. ¹⁵ Wur emog asanga ti nde ntangu elekienikinde n'evur. Oyue ndenden: "Oling nge?" ¹⁶ Yozefo okeara ndenden: "Ndeling atwung ame; ndawigna ya yie, onkabi, etay enagn elepiwo ameme vim a nda?" ¹⁷ Wur ewo atuba ndenden: "Watilim nendien; ogniang ayug me watuba wuwun: 'Nsoagni Dotan.'" Yozefo mpi asadjie atwung ande, atsa ngyen ne Dotan. ¹⁸ Emoyen wo nde etey, aling nkum mbeama na wo, wakie mpfug djwi n'ondjag nde. ¹⁹ Watuba wog na wog wuwun: "Yen nkea ndoy ndign aleye. ²⁰ Yagagni opeane, sodjagagni, mby sotwomagni n'ibulu imuu, asikab su wuwun gnam emog e nkier atidjag, mby Asilir su wandoy inde iwo oshin osikum wo." ²¹ Ruben ntangu emiyug nde, s'ovuginde ne mbwo iwo. Atuba ndenden: "Sisiangi n'ondima ne luzingu." ²² Ruben atuba nda wo ndenden: "Oyapuragni aluung a wur ve. Twomagni nde n'ibulu i ndzum ene, mpi oyatsugagni ewuo ne djuung inde ve." ²³ Ntangu emikum Yozefo ondii oli atwung ande, wolima eleam ende ne djuung, eleam e ker-ker eyilwer nde. ²⁴ Wovey, wotwomo n'ibulu iwo. Ayiwo ibulu i ndzum, kaku vay ve. ²⁵ Mby wagneme djwi na nda. Ntangu emisiang wo vy dzug, wayen olwongo o vear à Ismaël wayim Galaad, wampunda iwo walevari vim a oyui ti ananagn a nsuu, ti mira, waletsu Ejipiti. ²⁶ Mby Yuda atuba nda atwung ande ndenden: "Vim nge esivea su yug simidjag otwung osu, mpi yug simidzub aluung ande? ²⁷ Yagagni, sosaragni ya vear a Ismael, mpi sikwon ntsug ewuo ne djuung inde, ali otwung osu, djuung isu." Atwung ande woyug. ²⁸ Ntangu elelegvear à Madian, walsar vim awo, wambur Yozefo n'ipug, mby s'osar wo ya vear a Ismael na akutu omab ekri, s'avariwo Yozefo ne buu e Ejipiti. ²⁹ Ruben ayia nkum n'ibulu, alir, Yozefo kaku nde ve. Ayara ileam i de, ³⁰ akea etay eli atwung ande, ndenden: "Mon akaku nde n'ibulu ve, mby me, asitsa me nonkagn?" ³¹ S'avey wo eleam e Yozefo, wadjag mbur, mby walogo eleam ewo ne aluung anagn. ³² Wajie eleam e ker-ker enagn etay eli tea wo, wuwun: "Yen, vim emisasu Yen! Lir yug ene epa eli eleam e mon yie." ³³ . Yakob akea njia eleam ewo, ndenden: ''Eli eleam e mon me! Gnam e nkier atola! Yozefo atikum mfuya-mfuya!" ³⁴ Mby s'avarinde ileam onde, aller ibwomo n'ikini inde, akie okio e mon nde nshuu entsign. ³⁵ Aman ande ankeankum ampeam ti ankear, wayia ondir djwi n'ondima nde ngy, akaleang ata wur emog ve olimi ngy. Atuba ndenden: "Ne ntangu emiyen me, asikra me ne wiya e bafwa etay eli mon me!" Mby s'alegikinde mon nde.