¹ Dina, mon onkear eyiwur Lea nda Yakob, apwe na ndir aman ankear ali ne buu enagn. ² Sishem, mon e Amor, mon e vwi okiri onagn, oyen. Okama, atsa mvur ti nde, opea nsogn. ³ Etura ende etsa ko ya Dina e mon e Yakob; aleangikinde osig onkear owo, okaba mpi oshin omikana nde n'etura ende. ⁴ Mby Sishem s'atshinde etay e tea nde Amor ndenden: "Ompi mon onkear one akum wear me." ⁵ Yakob ajia ndenden atipea mon nde Dina nsogn, mpi djwi aman ande ampeam ayiwo watitsa okwun ti wagnam inde, Yakob ayia ko pwo tii ko eyikey wo. ⁶ Amor, tea e Sishem, atsa nsuka nda Yakob. ⁷ Aman à Yakob mpi walekey yim okwun, ntangu emiyug wo vii anagn, wayug nkier entsign, ogniang Sishem atikie djwi imog ipwo ne Israel, oshin omitsande mvur ti mon onkear e Yakob, vim emikuy wo nkie ve. ⁸ Amor atuba ndenden: "Etura e mon me Sishem etitsa ko etay e mon gnu onkear; ndawigna ya gnu, ompiagni na nde, ayi wear e mon me. ⁹ Kiagni alien ti su, otepiagni aman agnu ankear, oveyagni mpi aman asu ankear. ¹⁰ Ayapier gnu ti su, mpi buu ene ayasawo kum djwi na gnu, ayasarakagnu mpi ayashumakagnu endii." ¹¹ Sishem atuba nda tea ti a nkignam a Dina ndenden: ''Mviy ngrasia ne vy agnu, esipeame mpi vim enkeankum esituba gnu. ¹² Wignagni ovin oninen ti makabu entsign, asipeame inkum isitubagnu; kansi ompiagni ko mon onkear one qui wear me." ¹³ Aman a Yakob Wakeara mvutu ya Sishem ti tea nde Amor watuba n'oshin o waagn , djwi na Sishem emipea nde nkignam wo Dina nsogn. ¹⁴ Watuba ya wo wuwun: ''Eli vim epikug su nkie ve, Sipakug mpea nkignam su ve ya wur etobag wo djuung ve. Enagn eli vii a nsogn djwi na su. ¹⁵ Asijir su nginu ignu ko yug omikumagni kamsi su, ompeam enkeankum ne kati egnu wobag djuung. ¹⁶ Mby asopeagni su aman asu ankear, su mpi asivey su aman agnu ankear, asipier su ti gnu, mpi asikum su ko wur emog. ¹⁷ Kansi yug okaleangagni na ngyug vii asu ve, djwi obagagni djuung ignu, asivey su mon su onkear mpi asikien su." ¹⁸ Otuba owo akir wo n'etura e Amor ti e Sishem, mon e Amor. ¹⁹ Mon ompeam one akayiaka etean ve na nkie vii awo, djwi aleangikinde mon onkear e Yakob enagn entsign. Ne oleang o tea nde, oveyikiwo wur eninen. ²⁰ Amor ti mon nde Sishem Watsa n'epfug e wiya enen, s'atubikinde ya vear a wiya wuwun: ²¹ "Ane wali vear a ngemba djwi na su, wayii ne buu esu, wasar vim awo, okiri eli onen entsign djwi na wo. Ayavey su aman awo ankear wakum aveari asu, mpi ayapea su aman asu ankear wakum aveari awo. ²² Kansi vear awo asileang wo na mpier na mpier ti su, siyi ko wur emog, su ti wo, ko yug ompeam onkeankum ne kati esu watobag djuung, oshin oli wo, wamabag djuung. ²³ Wagnam iwo, vim awo ti wangombe iwo, ipasakum isu? Sijir ko oshin oleang wo djwi wasapier ti su." ²⁴ Vear ankeankum ayinkum n'epfug e ,wiya enen wayug vii ayitubike Amor ti mon nde Sishem, ti ampeam ankeankum, wabag djuung iwo, wankeankum eyikum n'epfug e wiya enen. ²⁵ Eshuu otatu, ntangu eliwo ko n'osayu ne djuung, aman a Yakob ape, Simeoni ti Levi, ankignam a Dina, s'avey wo wur na wur, ompien e vur epe, walog ne wiya enen eyiyeniki,o wuwun eli na ngemba, mby s'adjag wo ampeam ankeankum. ²⁶ Wadjag mpi n'empien ewo, Amor ti mon nde Sishem, walima Dina n'evuru ewo mby s'apwiwo. ²⁷ Aman a Yakob walog ne dzug edjuu, s'avey vim ankeankum ali ne wiya enen, djwi wamopea nkignam wo nsogn. ²⁸ Wavey ameme a vear anagn, wangombe iwo, wampunda iwo, iyike ne kati e wiya ti iyike n'okwun, ²⁹ Wavara otsun owo onkeankum, kamsi vim amivey wo ne mby e mbaagn, ti aman awo, ti ankear awo, ti vim ayike ne mvuru iwo. ³⁰ Mby Yakob atuba nda Simeoni ti Levi ndenden: "Otimpeagni ontwong osayu, otitsugagni me wur epwo ne nteang e vear papier ne buu ene, vear a Kanaana ti vear a Ferezia. Ndi ko na vear itaang, asisanga wo wankeankum djwi na ntag me mbaagn, asindjag wo; asiwame, na me, na oleang ome." ³¹ Mby Simeoni ti Levi Wakeara wuwun: "Sishem afwete mvey nkignam su kamsi onkear o nduma?"