¹ Yakob akea ndana ko mbug ende, mby banzio i Nzeam wasanga ti nde. ² Ntangu emayen nde, yakob atuba ndenden: "Ene eli ntn e Nzeam!"Mby s'aviinde ondii onagn Maanaim. ³ Yakob atum vear nteang ende, watsa etay eli jii nde Ezau, ne buu e Seir, ne ntn e buu e Edom. ⁴ Atuba nda wo ndenden: "Yenagni vii amituba gnu ya nkum eme Ezau: 'Wur eyie otshia, Yakob, atuba ndenden: Atshime papier etay e Laban, ayikime mpiog tii opeane; ⁵ ndi na wangombe, wampunda, ameme, vear otshia ampeam ti ankear, mby s'amitum me vear etay eyie nkum eme, djwi mvea ngrasia ne vy ayie."' ⁶ Vear ayitum nde wakea etay e Yakob, wuwun: "Sitikum etay e jii yie Ezau, aleye nsanga ti yie, na vear nkama inign ne mby ende." ⁷ Yakob ayug womo entsign, akum ko ngy-ngy. Atsug vear ayinde nda wo ne ntn ipe, na ameme, wangombe ti wampunda.; ⁸ mby atuba ndenden: "Yug Ezau amiyia ntag me na mbaagn ne ntn emog, ntn esisatsuga asivug wo." ⁹ Yakob atuba ndenden: "Nzeam e tea me Abraama, Nzeam e tea me Izaak, Yaweh eyinkabi ndenden: 'Kea ntsa buu eyie, n'ondii eyowur wo, ayokieme yie vii a wuo!" ¹⁰ Ndi ko mon ilieng i mpama, na wangrasia ti ekaagn enkeankum emitsug yie ya me wur eyie otshia; djwi abag me nzey e Yordani ene n'ikom ime n'ewuo, mby opeane, mean ndatsug ntn ipe. ¹¹ Ndawigna ya yie, ondimi ne mbwo i jii me, ne mbwo i jii me Ezau! Djwi ndalur akayia, akandjag me, na mea ti aman. ¹² Mby yie, si atubiyie yeyen: 'Ayokieme yie vii a wuo, ayapur me aman ayie ayakum wo entsign n'0shin oli wapayakug na ntanga isuu iwo ve.'" ¹³ Yakob avur nde otshuu onagn ko n'ondii onagn. Avey vim eyikir nde n'ewuo djwi na mpea makabu ya jii nde Ezau: ¹⁴ mbur aveari nkama ipe ti mbur awum omab, ameme aveari nkama ipe ti ameme awum omab, ¹⁵ washamo aveari osar ti aman awo wagnua aviyo, wangombe aveari onign ti wangombe awum djum, wampunda aveari omab ti awum djum. ¹⁶ Apea wog ya vear ande otshia, itwung n'itwung, nginama n'emuu, mby atuba nda vear ande otshia ndenden: "Legagni nteang eme, namagni ndwong n'itwung imuu." ¹⁷ Atuba nda vear a ndwong enteang ndenden: "Ntangu esisanga jii me Ezau nda gnu, yug amiyue ndenden: 'Oli wur e nagn? Oletsu nonkagn? Itwung i wagnam ili nteang ene eli e nagn?' ¹⁸ Asovura yie yeyen: 'Eli e wur eyie otshia Yakob, eli makabu imitum nde djwi na nkum eme Ezau, nde mpi ndign aleseye ne mby esu.'" ¹⁹ Atuba ko oshin omog nda vear a ndwong ozole, vear a ndwong otatu, mpi ti ya vear ankeankum aleseyike ne mby atwung a wagnam inagn: "Enagn wog oshin ositubagnu ya nkum eme Ezau, ntangu esisanga gnu ti nde." ²⁰ Asitubagnu gnugnun: "Yen, wur eyie otshia, Yakob, ndign mpi aleseye ne mby esu." Djwi atubikinde ndenden: "Asokomo me ne makabu iletsu nteang eme ene, mby asisanga me ti nde elung n'elung, mbala emuu asingyama nde wuo." ²¹ Makabu ileg nteang ende, mby nde, asatsuga otshuu onagn ne ntn. ²² Ayima ko otshuu onagn, avey aveari ande ape, vear ande otshia ankear ankeape, aman ande djum n'omog, asab nklingi e Jabok. ²³ Avey, asaba ne mbing e vay, asaba ti vim ankeankum ayinde na wo. ²⁴ Yakob asatsuga ko ndemie. Mby wur emog ayia ndwa mbaagn ti nde, tii ko pipi na nkeam e vuna. ²⁵ Ntangu emiyen wur enagn ndenden apakug n'onunga nde ve, wur enagn onang n'ikini, mby wuyu ikini e Yakob emog ko ne ntangu elwawo nda wur enagn. ²⁶ Atuba ndenden: "Onsiangi me nkien, djwi vuna eling nkeam." Mby Yakob okeara ndenden: "Mposianga ve okien yug otonsakumuni me ve." ²⁷ Oyue ndenden: "Dzin iyie nagn?" Mby nde okeara ndenden; "Yakob" ²⁸ Akeantuba ndenden: "Dzin iyie ipafiyia Yakob ve, kansi ayoviaka wo Israel, ogniang otilwa mbaagn ti Nzeam ti ya vear, mpi otinunga." ²⁹ Yakob atyue wur enagn ndenden: "Ndawigna ya yie, nding njia dzin iyie." Wur enagn okeara ndenden: "Djwi na nge eyue yie dzin ime?'' Mby s'osakumuni nde kog enagn. ³⁰ Yakob apea ondii onagn dzin iwo Peniel: ogniang atubinde ndenden: " Ntiyen Nzeam elung n'elung, moyo eme kog etivug.'' ³¹ Vuna ayiwo elung nkeam, ntangu elelegikinde ne Peniel. Yakob abana nteme n'ikini inde. ³² Wog enagn tii n'eshuu e lwo ene, aman Israël wapitsimpea ntag e gnam eli n'ikini; djwi Nzeam amoginde Yakob wuyu eli n'ikini inde.