¹ Rashel ntangu emiyen nde apiwuri Yakob aman ve, ayia na kimpala nda jii nde, mby atuba nda Yakob ndenden: "Ompiinaman yug kaku asiwame!" ² Nkier i Yakob imog ya Rashel, mby atuba ndenden: "Me ntikum n'ondii o Nzeam djwi mopum yie na ngwur?" ³ Atuba nda nde ndenden: "Yen Bila, wur eme otshia ndean, tshwag etay ende, awur aman ne abong ame, etay ende, asibeam mpi aman ampeam." ⁴ Mby opea Bila, wur ende otshia, akum wear nde. Yakob atsa mvur mpi etay ende. ⁵ Bila avey djim, aura Yakob mon ompeam. ⁶ Rashel atuba ndenden: "Nzeam atimpea lunungu, atiyug otuba ome, mby s'amikeande mon ompeam." Wog enagn eyopinde dzin i Dan. ⁷ Bila, wur otshia e Rashel akea mvey djim, mpi awura Yakob mon ozole. ⁸ Rashel atuba ndenden: "Ntilua mbaagn ne vii a Nzeam, ti jii me, mpi ntinunga." Mby apea mon ewo dzin i Neftali. ⁹ Lea emiyen nde ndenden amisianga na ngwur, s'avey nde Zilpa, wur ende otshia, opea ya Yakob akum wear nde. ¹⁰ Zilpa, wur otshia e Lea awura Yakob mon ompeam. ¹¹ Lea atuba ndenden: "Osiangisu nge eli ngean!" Mby opea dzin i Gad. ¹² Zilpa wur otshia e Lea, awura Yakob mon ompeam ozole. ¹³ Lea atuba ndenden: "Ndi n'osiang! djwi aman ankear ayamviewo nkea osiang." Mby apea mon ewo dzin i Aser. ¹⁴ Ruben apwe ne ntangu ekiewo antu n'ivur, mby ayen momo n'ivur. Ajie wog ya mea nde Lea. Mby Rashel atuba nda Lea ndenden: "Ndawigna ya yie, ompii ivim i momo imojie mon yie." ¹⁵ Okeara ndenden: "Nteang omivey wum me, olung nkea mvey momo i mon me?" Mby Rashel atuba ndenden: "Kaku djwi! Asivug nde nda yie otshuu o lui ene djwi na momo i mon yie enagn." ¹⁶ Epiyekwo, ntangu emikra Yakob yim evur, Lea atsa nsanga ti nde, atuba ndenden: "Asiyiawo yie etay eme, djwi ntoshum yie na momo i mon me." Mby s'atshinde mvur ti Lea otshuu onagn. ¹⁷ Nzeam ayug bisamu i Lea, avey djim mpi awura Yakob mon ompeam otanu. ¹⁸ Lea atuba ndenden: "Nzeam atimpea ifutu ime, djwi apiime wur eme otshia ya wum me." Mby opea dzin inde Isakar. ¹⁹ Lea Akea mvey djim, mpi akea ngwura Yakob mon ompeam, wakum osom. ²⁰ Lea atuba ndenden: "Nzeam atimpea makabu i wuo; mbala ene, wum me asisande pier ko etay eme,xdjwi ntowura aman ampeam asom." Mby apea mon ewo dzin inde Zabulon. ²¹ Ne mby ewo, Akea ngwur mon onkear, opea dzin inde Dina. ²² Nzeam akea nkana Rashel, ayug bisamu inde, mby s'akey nde ngwur aman. ²³ Avey djim, mpi awur mon ompeam, atuba ndenden: "Nzeam atinkuma ne nsogn." ²⁴ Mby apea mon ewo dzin inde Yozefo, ndenden: "Yaweh akey mpea me mon emuu!" ²⁵ Rashel ntangu emiwur nde Yozefo, Yakob atuba nda Laban ndenden: "Onsiangagni me ndekey ntsa wiya me, ne buu eme, ne buu eme. ²⁶ Ompii aveari ame ti aman ame, akiime otshia etay eyie djwi na wo, ndetsu djwi ojia otshia nge emikieme djwi na yie." ²⁷ Laban atuba nda nde ndenden: "Asikug me mvea ngrasia ne vy ayie! Ndayen wuo même Yaweh aminsakumuna me djwi na yie. ²⁸ Onkabi ko ekri kwe esofuta me, mopii." ²⁹ Yakob okaba ndenden: "Ojia otshia emokieme yie, oshin omikum ameme ayie djwi na me; ³⁰ ogniang ivim itaang iyikiyie na wo ne nteang eme, wean emikum entsign, mpi Yaweh amosakumuna yie ne ekien eme. Opeane, ntangu enagn eyakieme otshia djwi n'evuru eme?" ³¹ Laban atuba ndenden: "Vim nge esopea me?" Mby Yakob avura ndenden: "Kaku ata vim esimpea yie ve. Yug oleang djwi isituba me ene, nkey mpea ameme ayie vim a nda, makeandir. ³² Asilir me ameme ayie, ne kati e ameme anagn, asilima yie n'ikri, ameme ankeankum ali na atono, ti aman ameme ankeankum ali por-por; mby djwi na wambur, mbur enkeankum eli na atono. Enagn wog ifutu ime. ³³ Masonga eme ayokeara wo mvutu nampign, ntangu eyayia yie ndir ifutu ime; enkeankum epayayia na atono, ne wambur, epayayia e pour ve, enagn ayayiawo kamsi ntikie wumu." ³⁴ Laban atuba ndenden: "Kaku djwi! Eyii ko oshin amituba yie." ³⁵ Ko ne mvuye enagn mpi, avey wambur ili na atono, awum ti aveari, ankeankum ayie na atono a siy, ti ameme ankeankum a por-por, apea ne mb,o aman ande ampeam. ³⁶ Mby anam nda Yakob, n'ekien e nkuu e nshuu isar; mby Yakob s'awinde wunga wagnam i Laban imisatsuga enagn. ³⁷ Yakob avey atab eshung e mvu enen-enen, awiye mpuy iwo i por-por, alima ivm i mpuy imuu djwi ekum na enduu e siy-siy. ³⁸ Mby s'atsug nde atab amiwiye nde enagn, ne nteang e vim etsawo mpea ameme vay a gnua, ne nteang ameme aleyike gnua vay, djwi wayug tshiya ntangu eleyiwo gnua. ³⁹ Ameme alimikiwo ne tshiya, mbeama na atab eshung enagn, mby s'awurikiwo aman ali n'enduu ti atono ne djuung. ⁴⁰ Yakob s'anamikinde ameme, atwung ali n'enduu ti amuu ayii por-por ne itwung i Laban. Akie mpi ko oshin onagn n'itwung imuu ikatsug nde ondii omog ti itwung i Laban. ⁴¹ Mbala inkeankum iyike ameme anen-anen watikum na tshiya, , Yakob atsugikinde atab eshung enagn ne vim etsawo mpea wagnam vay ti vim anda, ne vy à ameme aveari, djwi wakum na tshiya, mbeama na atab eshung. ⁴² Yug ameme aveari ayiwo akieg-kieg, akatsugaka ve; djwi ikieg-kieg inagn ayiwo djwi na Laban, mby inen-inen djwi na Yakob. ⁴³ Mby wur enagn s'alegikinde Nkum na otsun entsign, avez wagnam inagn entsign, ti vear otshia ankear ti ampeam, ti wampunda ti washamo entsign..