¹ Yakob akir mbug, s'atshinde wiya e vear ali etay epwe vuna. ² Alir, ayen ibulu i vay imog iwean n'okwun; ayen n'ikri iwo, atwung asar ameme wayor, djwi apikiwo vay a gnua ne ibulu i vay anagn. Mpi itari ili ne otwung i etog e vay awo, ayiwo onen entsign. ³ Ameme ankeankum asangikiwo kog enagn, alimikiwo itari ne itwunu etog e vay djwi na mpea ameme vay, mby wakey ndzub itari ne ondii owo. ⁴ Yakob atuba nda vear awo ndenden: "Atwung ame, oyimagni nonkagn?" Wokeara wuwun: "Siyim Sharan." ⁵ Ayue ndenden: "Ojiagni Laban, mon e Nashor?" Wokeara wuwun: "Silojia." ⁶ Ayue ndenden: "Ali wuo?" Wakeara wuwun: "Ali wuo, yen, mon nde onkear Rashel, ndean aleseye ti itwung iwo ameme." ⁷ Yakob atuba ndenden: "Yen, vuna eli ko dzug, ntangu e ntsug ameme ondii omog etokug ve, peagni wo vay, mby watsu nkea nda nkaya." ⁸ Wakeara wuwun: "Sipakug ve, sikwung ko tii ameme ankeankum wayii ondii omog, mby asilima su itari n'itwunu etog e vay djwi na mpea ameme vay wagnwi." ⁹ Ko ne ntangu etuba nde mpi, Rashel Ayia mpwe na itwung ameme i tea nde, ogniang ndug wur eyilirike ameme awo. ¹⁰ Yakob, ntangu emiyen nde Rashel e mon e Laban, nkignam e mea nde, na itwung ameme e Laban, avanga, alima itari n'itwunu etog e vay, mby s'apinde ameme a Laban, nkignam e mea nde, vay a gnua. ¹¹ Mby Yakob apea Rashel mwaa, adzama olie na biu, aliye. ¹² Yakob akaba Rashel ndenden ali otwung o tea nde, mon e Rebeka. Mby s'alim nde iveang, atsa nkaba tea nde. ¹³ Ko ntangu emikabawo Laban djwi na Yakob mon e nkignam nde, akim iveang, Ayia ne nteang ende, oyama mpi opea mwaa, mby s'avarinde ne evuru ende. Yakob akaba Laban vii ankeankum anagn. v 14 Laban atuba ndenden: "Vii-a-vii, oli wuyu eme, mpi djuung ime. Yakob akir ngwon emog ne evuru e Laban. ¹⁵ Mby Laban atuba nda Yakob ndenden: "Djwi oli otwung ome, mby asinkir yie konotshia o mpama? Onkabi, ifutu iyie ili kwe?" ¹⁶ Kansi Laban ayinde na aman ankear ape: intsuru dzin inde Lea, mby ilieng dzin inde Rashel. ¹⁷ Lea ayinde na contient i vy, kansi Rashel ayinde entieng onkear, wuo ti n'elung. ¹⁸ Yakob aleang nde Rashel, mby atuba ndenden: "Ayokieme yie otshia mvwe ishambia djwi na Rashel, mon yie okobo." ¹⁹ Mby Laban Wakeara ndenden: "Ndaleang wuo mopii nde ya yie kansi epa ya ompeam omuu ve. Gneme ya me nendien!" ²⁰ Wog enagn, Yakob s'awinde otshia mvwe ishambia djwi na Rashel. Mvwe ishambia enagn ayiwo kamsi ko ivim i nshuu, djwi oleang nde entsign. ²¹ Mby Yakob atuba nda Laban ndenden: "Ompii wear me djwi ntangu eme etikug: ekug ngyabondii omog ti nde." ²² Laban avie vear ankeankum a wiya enagn, akie okina. ²³ Epiyekwo, avey mon nde onkear Lea, atsa opea ya Yakob, s'ayinde mbeama na nde. ²⁴ Mby Laban apea mon nde onkear Lea wur otshia onkear, dzin inde Zilpa. ²⁵ Mpimpign enagn, emiyen Yakob ndenden eli Lea, Yakob atuba nda Laban ndenden: "Vim nge eminkie yie ene? Otshia omikie me etay eyie epa djwi na Rashel ve? Djwi na nge emindjim yie?" ²⁶ Laban atuba ndenden: "Ne nsiku ili ne ondii one, wapitsimpea mpea okwom wum ne nteang e jii ve. ²⁷ Shira ko mposo ene opfugn ya ene, mby ayopeame emuu ene n'otshia omuu, ayakea yie nkie mvwe ishambia imuu." ²⁸ Yakob akie mpi ko oshin onagn, ashia mposo enagn nda Lea, mby Laban opea wear, mon nde onkear Rashel. ²⁹ Mby Laban apea mon nde Rashel wur otshia onkear, dzin inde Bila. ³⁰ Yakob atsa ngyia ondii omog ti Rashel eyileangikinde entsign, elenga oshin oleang nde Lea, mby akea nkie otshia ya Laban mvwe ishambia imuu. ³¹ Yaweh, ntangu emiyen nde wapileang Lea ve, apea Lea opfugn i ngwur, mby Rashel ayia ekuba. ³² Lea avey djim, awur mon ompeam. Apea mon ewo dzin i Ruben, djwi na ntuba ndenden: "Yaweh atiyen oshin ont un wo, opeane wum me ayindeang." ³³ Akea mvey djim, awur mon ompeam, atuba ndenden: "Yaweh amiyug ndenden wapindeang me ve, mby s'amikeande mpea me mon ene." Mby opea dzin i Simeon. ³⁴ Akea mvey djim, awur mon ompeam, mby atuba ndenden: "Mbala ene, wum me asibeam nde djuung etay eme, djwi ntowura aman ampeam asar." Wog enagn eyipiwo dzin i Levi. ³⁵ Akea mvey djim, awur mon ompeam, atuba ndenden: "Mbala ene, ayopeame Yaweh lokumu." Wog enagn eyipiwo nde mon ewo dzin i Yuda. Mby asiang na ngwur.