¹ Izaak s'avinde Yakob, osakumuna, mby atuba nda nde ndenden: "Opayavey wear ne Kanaana ve. ² Yima, tshwag ne Padan Aram, n'evuru e Betuel, tea e mea yie, mby ovey wear ne kati e aman ankear a Laban, Nkignam e mea yie. ³ Nzeam nkea biu osakumuni yie, iwur aman, mpi wakum entsign, djwi okum na vear entsign. ⁴ Opii yie lusakumuna e Abraama, ya yie ti ya aman ayawur yie, djwi osavey buu epier yie neti kamsi ongingien ene, buu eyipinde ya Abraama." ⁵ Mby Izaak s'asianginde Yakob akien, atsa Padan Aram, etay e Laban mon e Betuel, wur e Aram, nkignam e Rebeka, mea e Yakob ti Ezau. ⁶ Ezau ntangu emiyen nde Izaak amisakumuna Yakob mpi atotum na ntsa Padan Aram djwi na mvey wear mpiog, mpi ntangu amosakumuna nde, atokaba ndenden: "Opayavey wear ne Kanaana nendien ve." ⁷ Ayen mpi Yakob atilemfuka ya tea nde ti mea nde, ndean mpi atitsa Padan Aram. ⁸ Ezau s'ayiminde ndenden tea nde Izaak akayiaka n'osiang ve na aman ankear a Kanaana. ⁹ Mby Ezau s'atshinde etay eli Ismael, avey wear emuu, Maalat, mon e Ismaël e mon e Abraama, mpi nkignam e Nebayot, ti ankear amuu Ayinde nda wo nteang. ¹⁰ Yakob alim ne Beer Sheba, atsa Aran. ¹¹ Akum ondii omuu, avur neti otshuu onagn, djwi ayiwo vuna otijie. Avey itari ayab ote ne dzug iwo, mby s'avur nde ne ondii onagn. ¹² Avur ndoy kog. Ayen kibandulu etiyima ne buu, mby nsor ewo etita n'olung. Mby s'atubikinde banzio i Nzeam wavean wakra ne kibandulu enagn. ¹³ Mby ayen Yaweh ne dzug iwo atuba ndenden: "Ndi Yaweh, Nzeam e tea yie Abraama, ti Nzeam e Izaak. Buu ene ondii omivur yie, ayopeame yie wog, ti aman ti ankean ayie. ¹⁴ Aman ayawur yie ayayiawo kamsi mfanga i buu; ayanam yie etay elog vuna ti etay epwe vuna, etay e nordi ti etay e sudi; mby vear ankeankum ne buu ayavey wo lusakumuna eyim ya yie ti ya aman ayawur yie. ¹⁵ Yen, mean ndi ma yie, ayoliraka me etay enkeankum eyatsaka yie, mby ayokeara me tii ko ne buu ene, djwi mpayosianga ve, yug ntokii vii atuba me ma yie ene." ¹⁶ Yakob abiy ne lwong, atuba ndenden: "Vii-a-vii, Yaweh ali n'ondii one, kansi me, nkajiaka ve." ¹⁷ Ayug Womo, ndenden: "Ondiinone eli Womo! Nendien eli evuru e Nzeam; nendien eli epfug e dzug olung!" ¹⁸ Mby Yakob ayima ne suka-suka, avey itari iyiyab nde ote ne dzug iwo, asayim kamsi ignignig, mby amwang vir ne nsor ewo. ¹⁹ Apea ondii onagn dzin iwo Bethel ; kansi wiya onen enagn, dzin iwo nteang ayikiwo Luz. ²⁰ Yakob asila ndenden: "Yug Nzeam ali nda me mpi amindir wuo ne ekien eme ene, yug atimpea mampa i nda ti ileam i ndwer, ²¹ yug mikea na ngemba ne evuru e tea me, enagn Yaweh asiyiawo nde Nzeam eme; ²² itari imisame tsug ignignig ene, ayayiawo evuru e Nzeam; mby ayopeame ikab imog ne akab djum i vim ankeankum atimpea yie me."