¹ Ndjua ayikinde na waagn emog epwo ne kati wagnam inkum iyikii Nzeam ne okwun. Atuba nda onkear ndenden: "Nge eli djwi-djwi, Nzeam atubinde ndenden: 'Opilagni eshung enkum eki ne opeang one?' " ² Onkear atuba nda ndjua ndenden: "Kaku, atsasu nda eshung eli ne opeang one. ³ kansi djwi na oshung oli ne ngnina opeang one, Nzeam atubinde ndenden: 'Oyalagni wog ata itaang ve, yug kaku asiwagnu.'" ⁴ Mby ndjua s'akabinde onkear ndenden: "Opawagni ve. ⁵ Kansi Nzeam ajia ndenden eshuu eyalagnu atub ali ne oshung onagn, vy agnu ayangam wo, ayakum gnu kamsi wanzeam, ayajia gnu ipwo na iwuo." ⁶ Onkear ayen ndenden oshung owo eli wuo na nda, eli mpi nsa yug olir na vy, mpi eli wuo djwi na ngama waagn, s'avey nde itub iwo, s'alinde; apea mpi wum nde, ayinde mbeama na nde, s'alinde mpi. ⁷ Vy a wur na wur angam, wajia wuwun kaku ileam ne djuung iwo, mby s'adzub wo nkaya i figi, s'alwer wo ne ikini kamsi okaba. ⁸ Mby wayug, epiekwo, otuba o Yaweh Nzeam alekien ne opeang; wum ti wear watsa nzuba etey ne nteang e Yaweh Nzeam, ne ngnina eshung eli ne opeang onagn. ⁹ Kansi Yaweh Nzeam avie ompeam, atuba ndenden: "Oli nonkagn?" ¹⁰ Akeara ndenden: "Ntiyug otuba oyie ne opeang one, ntiyug womo djwi kaku me n'eleam ne djuung, mby s'amizuba me." ¹¹ Mby Yaweh Nzeam atuba ndenden: "Nagn emokaba yie ndenden kaku yie n'eleam ne djuung? Nge otila oshung eyopum me na nda?" ¹² Ompeam akeara ndenden: "Onkear eyitsug yie mbeama na me ene, atimpea itub iyim ne oshung onagn, mby s'alime." ¹³ Yaweh Nzeam s'atubinde nda onkear ndenden: "Djwi na nge emikie yie oshin onagn?" Onkear okeara ndenden: "Ndjua atindjim, mby s'alime." ¹⁴ Yaweh Nzeam s'atubinde nda ndjua ndenden: "Djwi otikie oshin onagn, oli na nkuu ne kati e wagnam inkum ili ne okwun, ayakearaka yie ko n'ipfugn, ayalaka yie ko wamfuya i buu nshuu inkum i luzingu eyie. ¹⁵ Ayashwer me kimbeni ne kati eyie ti onkear, ne kati aman ayie ti aman ande; onkear ayobuyaka nde yie ote, mby yie, ayokamaka yie nde dzin ne ibuu ekuu." ¹⁶ Atuba nda onkear ndenden: "Ayatsug me mpay iyie i lwon ikum entsign, ayawuraka yie na mpay, vim enkum eli yie na mfunu ewo, ayakeaka yie nding ko etay e wum yie; wum yie ayayiaka nde na ekub ne dzug iyie." ¹⁷ Atuba nda ompeam ndenden: "Djwi otiyug ko otuba o wear yie, otila oshung eyopum me memen: "Oyala oshung one!' Ayashing me buu djwi na yie. Ayaveaka yie olio na mpay, na obibiu, konso eshuu e luzingu eyie. ¹⁸ Buu ayapuraka wo atiene ti abaag ne ntangu eyalaka yie asagn ne evur. ¹⁹ Ayalaka yie amugn ototigna mpur ntete mbiiy ne elung eyie, tii ko eyakea yie ne buu etay eyim yie, djwi oli mfanga i buu, ayakea yie ko ne mfanga i buu." ²⁰ Adamu s'apinde wear nde dzin i Eva, djwi ndug wur eyii mea e vear ankum azinga. ²¹ Yaweh Nzeam s'akinde ileam i mpuy ignam, s'alwer nde Adamu ti wear nde. ²² Yaweh Nzeam s'atubinde ndenden: "Yenaka wur ndean atikum kamsi su, ndean atijia ipwo na iwuo. Sopig ko mbug djwi akwon ntsug ewuo ne oshung o luzingu, akafila wog djwi akazinga otshwag-otshwag. ²³ Mby Yaweh Nzeam s'okminde ne opeang o Edeni, djwi atsu mfuy ivur ne buu etay eyim nde. ²⁴ Enagn wog oshin oyikminde Adamu, mby s'atsug nde banzio, na wakeribe, ne opeang o Edeni etay epwe vuna, s'agnugikiwo ompien e vur epe epiey tshiya, djwi wasaliraka mbug e oshung e luzingu.