¹ Nziya emog eshwe ne wiya, kansi nziya eyi nteang eyishwi ne ntangu eyii Abraama; mby Izaak s'atshinde etay e Abimelek, vwi e wa filitia, ne Gerari. ² Yaweh apwe, atuba ndenden: "Oyatsa Ejipiti ve, satsuga ko ne buu esokaba me. ³ Pier ne buu enagn, me, ndi ma yie, mpi ayosakumuna me, djwi ayopea me yie buu eli etitign ene enkeankum, ti ya aman ayie, ayakie me ko lusilu eyisili me ya ndundu yie Abraama. ⁴ Ayapur me aman ayie wakum entsign, kamsi weer n'olung, ayapea me ya aman ayie buu eli etitign ene enkeankum, mby vear a okiri enkeankum ne buu ayavea wo lusakumuna ya aman ayie, ⁵ djwi Abraama alemfukinde n'otuba ome, amikie vii ayotum me, nsiku ime, onkwon ome." ⁶ Mby Izaak s'asande tsuga ne Gerari. ⁷ Vear a wiya enagn, ntangu emoyuwe wo nde djwi na wear nde, nde atuba ndenden: "Eli kignam me," djwi alurikinde ndenden vear a wiya enagn wakodjag, djwi ayinde entieng onkear. ⁸ Nshuu inde kog ayiwo iletsu o nteang, eshuu emuu, Abimelek, vwi e wafilistia, alir ne madikisi, ayen Izaak alakagn nda wear nde Rebeka. ⁹ Abimelek atum wur na mvie Izaak, ndenden: "Vii-a-vii, eli wear yie. Oshin onkagn eyitubi yie yeyen: 'Ali nkignam me'?" Izaak akeara ndenden: Atubi me oshin onagn djwi wakandjag me ogniang na nde." ¹⁰ Mby Abimelek atuba ndenden: "Vim nge emikie yie ya su ene? Asawo tsuga ko fioti, wur emog avur nda wear yie, enagn anateyen yie vear apwo." ¹¹ Mby Abimelek s'apinde nsiku ene ya vear ande: "Wur eyakir ompeam one to wear nde, ayodja wo." ¹² Izaak afuy ivur n'okiri enagn, mvwe enagn, avea vim nkama na nkama, djwi Yaweh osakumuninde. ¹³ Wur ewo akum n'otsun , otsun onde elega ntsa ko nteang, mby s'akum nde nkea otsun o biu mpenza. ¹⁴ Ayinde na itwung itwung i wagnam ikieg-kieg, ti wagnam inen-inen, ti vear otshia entsign. Wog enagn vear a filistia s'ovey wo nde na kimpala. ¹⁵ Abulu a vay ankeankum ayitsumuke vear otshia e tea nde Abraama, ntangu tea nde aliko, vear a filistia wadzub wog, wakna buu neti. ¹⁶ Mby Abimelek s'atubinde nda Izaak ndenden: "Lim ne buu esu djwi otilenga na biu." ¹⁷ Izaak s'alim nde kog, s'atshinde ne buu e Gerari, s'agneminde mpiog. ¹⁸ Izaak s'akey nde ntsum abulu a vay ayitigniwo ntsum ne ntangu eyii tea nde Abraama, abulu ayidzub vear a Filistia ne mby e ewa Abraama; mpi akeampea ko vn ayiviike tea nde. ¹⁹ Vear otshia e Izaak watsum mpi ne obuu onagn, wayen etog e vay a gnwa. ²⁰ Vear a Gerari itsandir wagnam, wabin ashia ti vear atsandir wagnam i Izaak, wuwun: "Vay ane eli esu." Mby Izaak s'apinde etog e vay anagn dzin iwo "Esek", djwi agnuniwo ti nde. ²¹ Vear ande otshia wakeantsum ibulu imuu, ekakea mbin ashia ve, mby apea dzin iwo "Sitna". ²² Yim kog, atsa nkeantsum ibulu i vay amuu, ekakea mbin ashia ve, mby apea dzin iwo "Reobot", djwi atubinde ndenden: "Yaweh atitetsug vear aninen, ne okiri one, siletsu ko nteang." ²³ Yim kog, s'avean nde, atsa ne Beer Sheba. ²⁴ Yaweh opwe othuu onkum, ndenden: "Ndi Nzeam e tea yie Abraama, oyayug womo ve, ndi ma yie; ayosakumuna me mpi ayopura me aman entsign, ko djwi na wur eme otshia Abraama." ²⁵ Atwung kunda emog kog enagn, avie dzin i Yaweh, mby s'atwung nde evuru e kapo. Vear otshia e Izaak watsum ibulu i vay kog. ²⁶ Abimelek ayim Gerari, s'ayinde etay eli nde, ti ewur ende Ahuzati, ti nkum ende ayer-nkuu, Pikol. ²⁷ Izaak atuba nda wo ndenden: "Djwi na nge elefeyignu etay eli me, djwi gnu, omintunagni, ominkmagni ne buu egnu?" ²⁸ Wokeara wuwun: "Silayen Yaweh ali nda yie. Wog enagn emituba su susun: 'Wuo siki lusilu emog djwi na su, mpi djwi na su ti yie, mby sisakie alien asu ti yie. ²⁹ Kie lusilu yeyen opatekie ata ipwo imog ve, oshin omog mpi su, kaku ata ipwo imog iyokiesu yie ve, okikisu yie ko vii a wuo, mpi osiangisu yie omikien na ngemba. Opeane, Yaweh ndean amosakumuna yie." ³⁰ Izaak aleama vim a nda, wala mpi wagnwa. ³¹ Wabiy ne suka-suka enagn, watinaba wog na wog na lusilu enagn. Izaak asiang s'akien, mby s'alim wo kog na ngemba. ³² Ko eshuu enagn mpi, vear otshia e Izaak wayia onkaba djwi n'ibulu i vay iyitsumiki wo, wuwun: "Sitiyen vay neti." ³³ Mby apea dzin iwo "Shiba". Wog enagn eyipiwo dzin oluu o wiya enagn Beer Sheba, tii n'eshuu e lwo ene. ³⁴ Ezau emikum nde mvwe onign, s'atsug nde aveari ande, Judith mon e Beeri, wur e Heth, ti Basmath, mon e Elon, wur e Heth. ³⁵ Ankear awo apikiwo etura e Izaak ti e Rebeka mpay entsign.