¹ Yaweh akea nkana vii ayitubinde djwi na Sara, mby Yaweh s'akinde vii ayipinde elaga djwi na Sara. ² Sara s'avey nde djim, mpi awura Abraam mon ompeam ne ntangu emikum nde ognugn, ko ne ntangu eyitubi Nzeam nda nde. ³ Abraam s'apinde mon ewo dzin Izaak, mon emowura Sara. ⁴ Abraam abag djuung i mon nde Izaak ntangu emikug nde nshuu iniani, oshin oyitubi Nzeam nda nde. ⁵ Abraam ayinde na mvwe nkama ne ntangu emiwur wo mon nde Izaak. ⁶ Mby Sara atuba ndenden: "Nzeam atintsug me wur eyuewo ywo; djwi wur enkeankum esiyug vii ane asingwe nde me two." ⁷ Akea ntuba ndenden: "Nagn eyikug ntuba nda Abraam ndenden: 'Sara ayakug nde mpea aman aviyo?'Opeane, mean ntowura mon ne ntangu emikum nde ognugn." ⁸ Mon afuye, alim ne aviyo; mby Abraam akie okina oninen eshuu eyilim Izaak ne aviyo. ⁹ Sara ayen mon e Agar ayue two, mon e onkear ejipiti, eyiwurinde Abraam. ¹⁰ Mby akaba Abraam ndenden: "Kma wur otshia onkear one ti mon nde, djwi mon e wur otshia ene apayavey oleama-nzo ve ti mon me izaak." ¹¹ Otuba onagn ne vy a Abraam, akayia na osiang na wo ve, ko djwi na mon nde enagn. ¹² kansi Nzeam atuba nda Abraam ndenden: "Opikug ngyen wog ipwo ve ne vy ayie djwi na mon ti wur eyie otshia onkear. Pea ya sara vim enkeankum esiwigna nde, djwi aman ayie penza ayayim wo ya Izaak. ¹³ Ayakieme mpi okiri omuu djwi na mon e wur eyie otshia onkear, djwi nde mpi, ali mon yie." ¹⁴ Abraama ayima ne suka-suka, avey mampa ti iwung i vay, apea ya Agar, otsuga ne nsiam ipag; opea mpi mon, mby s'okmi nde. Akien, atsa njinga ne buu e zelo e Beer Sheba. ¹⁵ Ntangu emishir vay n'iwung, asaky mon ne ngie oshung omog, ¹⁶ mby atsa gneme ontinteang, (kamsi ne otey e wign emibug wo), mby atuba ndenden: "Wuo nkwon ngyen ondii osiwa mon me!"Atsagneme, akeandir etay eli mon, mby abana ndiye na biu. ¹⁷ Nzeam ayug otuba e mon, mby wanzio e Nzeam ne dzug avie Agar, atuba ndenden: "Nge eli yie na wo, Agar? Oyayug womo ve, djwi Nzeam atiyug otuba o mon ondii oli nde. ¹⁸ Yima, vey mon, kir nde n'ewuo eyie; djwi ayapur me okiri oninen ya nde." ¹⁹ Mby Nzeam ongama vy, mby ayen ibulu i vay, atsa, ayura iwung na vay, mby apea mon agnua. ²⁰ Nzeam ayinde nda mon enagn, afuye, s'asande pier ko ne buu e zelo kog, mby akum wur ebug ota. ²¹ Apierikinde ne zelo i Paran, mby mea nde oveye wear ne buu e Ejipiti. ²² Ne ntangu enagn, Abimelek alekien nda nkum ayer-nkuu ande, pikol, atuba nda Abraama ngean: "Ne vii ankeankum alekii yie, Nzeam ali nda yie. ²³ Sila opeane, ko nendien, ne dzin i Nzeam, opandjim me ve, ata aman ame, ata ankean ame, ayandir yie me wuo tii ko ne buu eyatsa yie mpier neti, kamsi me emolir me yie nendien." ²⁴ Abraama akeara ndenden: "Ndasila." ²⁵ Kansi Abraama atuba nda Abilelek djwi na ibulu i vay amog iyikumi vear otshia e Abimelek. ²⁶ Abimelek okeara ndenden: "Mpijia wur eyikii vii anagn ve, ontonkabi wog mpi ve, ndayug kolwo ene." ²⁷ Mby Abraama avey ameme ti wangombe, apea Abimelek, mby wakie alien wankeape. ²⁸ Abraama alima ameme aveariashambia, atsug n'ikri. ²⁹ Mby Abimelek atuba nda Abraama ndenden: "Ameme aveari ashambia emitsug yie n'ikri enagn eling ntuba nge?" ³⁰ Okeara ndenden: "Jir ovey n'ewuo eme, ameme aveari ashambia ane, djwi eyii ntiegn ya me, djwi eli mug wur eyitsum ibulu i vay anagn." ³¹ wog enagn etsawo mvie ondii onagn Beer Sheba, djwi eli wog ondii onagn eyisili wo wankeape. ³² S'akiiwo alien ne Beer Sheba. Ne mby ewo, Abimelek ayima nda Pikol, nkum ayer-nkuu ande, wakea ne buu e wafilistia. ³³ Abraama afuy oshung ne buu e Beer Sheba, kog mpi, avie dzin i Yaweh, Nzeam e mvwe na mvwe. ³⁴ Abraama apier nde mvwe entsign ne buu e wafilistia.