¹ Banzio inkeape wakum ne Sodomo epiyekwo; Loti ayinde ngigneme ne epfug e nshue ne Sodomo. Loti ntangu emayen nde, ayima djwi na ntsa ne nteang ewo, ababa, atsug elung ne buu. ² Mby atuba ndenden: "Yenagni ankum ame, ndawigna ya gnu na nshue ne evuru e wur egnu otshia, ovuragni neti, osuyagni nkuu, ne suka-suka, mby oyimagni, otsagni mbug eletshignu." Wavura wuwun: "Kaku, su, asivur su ko n'iyawiya." ³ Kansi Loti atsug inagn biu, mby s'ayiwo etay ende, mpi washue n'evuru ende. Apea vim a nda, akie na mampa ikwon ete e leviri, mby s'aliwo. ⁴ Watovur ata lwong ve, vear a wiya enagn, vear a Sodomo watshim evuru enkeankum, yim ko alieng tii ko antsuru, vear ankeankum wayia kog. ⁵ Wavie Loti, watuba wa nde wuwun: "Vear amishue otshuu one n'evuru eyie wali nonkagn? Pur wo djwi sitsu mvur ti wo." ⁶ Loti apwe nelien etay eli wo, ne epfug evuru, asadzub epfug ne mby ende. ⁷ Atuba ndenden: "Atwung ame, ndawigna ya gnu, oyakiagni ipwo ve! ⁸ Yenagni, ndi na aman ankear ape, watoji ata ampeam ve; ndopuragni wo nelien, mby asikiegnu ya wo vim enkum esileang gnu. Kansi oyakiagni ata vim ve djwi na vear ane, djwi watiyia ne ngie otwon ome evuru." ⁹ Watuba wa nde wuwun: "Lim nendien!" Wakea ntuba wa nde wuwun: "Yie, ayiyie mpier nendien oli ongingien, oling nkum wur ebag vii asu! Asitejiagnu, ti yie ti wo." Watuba wa Loti na nkier, watsa nteang djwi wabuyi epfug. ¹⁰ Kansi vear anagn washima ewuo nelien, wakea nshuer Loti neti evuru etay eli wo, mby wakea ntshung epfug. ¹¹ Mby wadzub vy a vear ayi ne mbwung evuru, yim ilieng tii ko intsuru, wakie mpay, wapikafiyen epfug etay eli wo. ¹² Vear anagn watuba wa Loti wuwun: "Nagn emuu eliyie ya nde nendien? Akiu ayie, aman ampeam ti ankear, ti vim enkeankum eliyie na wo, pur wog n'ondii one. ¹³ Djwi siladjag ondii one, elie emitsug wo djwi na vear apier neti etilega ne nteang e Yaweh, mby s'amitetum nde na ndjag wog." ¹⁴ Loti apwe, atuba nda akiu ande ayileang aman ande ankear ndenden: "Yimagni, pueagni nendien djwi Yaweh asidjag nde wiya ene." Kansi akiu ande ayen wo kamsi akie ikagn i mpama. ¹⁵ Ko ne ntangu eling nkeam vuna, banzio watuba wa Loti mbala na mbala wa Loti wuwun: "Vey wear yie ti aman ayie ankear ape ali nendien, yima tshwag, djwi okawa ne ntangu esiwa oluu o wiya ene." ¹⁶ Ntangu emiyiande etean na mpwe, vear anagn wokir n'ewuo, nde, wear nde ti aman ande ankear ape, djwi Yaweh aleang nde asawum wo ne luzingu, mby wavara tii nelien e oluu o wiya. ¹⁷ Ntangu emapur wo, emog ne kati ewo atuba ndenden: "Vug djwi na luzingu eyie; oyafilir mby eyie ve, mpi oyayima ne mbug ve, tshwag etay e ombimi djwi okawa." ¹⁸ Loti atuba ndenden: "Nkum, epa oshin onagn! ¹⁹ Yen, mean ntivea ngrasia ne vy ayie, otiyegne onen o ngy eliyie na wo etay eme n'oshin omingwum yie na luzingu, kansi kaku mpila e ntsa etay ombimi ve, ipwo inkamvea ne mbug, enagn asiwa me." ²⁰ Yen, oluu o wiya ene eli pipi, ntsi nzuba neti, mpi eli wiya e kieg. O, sianga ntsi nzuba neti, ....Epa eli okieg? Moyo eme eyi na luzingu!" ²¹ Mby nde mpi atuba ndenden: "Yen, ntopea diaka ngrasia ene, mpi mpadjag wiya etuba yie enagn ve. ²² Tshwag eveang, okagni nzuba neti, mpakie ata vim ve yug yie otokum neti ve." Wog enagn eyipiwo wiya enagn dzin i Tsoar. ²³ Vuna ayiwo elekeam ntangu eyishwi Loti ne Tsoar. ²⁴ Mby Yaweh s'atum nde, yim olung, etug ti tshiya, eyim ya Yaweh, s'alogikiwo ne Sodomo ti Gomore. ²⁵ Adjag oluu o viya inagn, okwun onkeankum, ti vear a viya inagn inkeankum, eshung enkeankum ne buu. ²⁶ Wear e Loti akea ndir mby, s'akum nde itari okwa. ²⁷ Abraam atsa ne suka-suka, ne ondii oyiyiminde ne nteang e Yaweh. ²⁸ Alir ngie etay e Sodomo ti Gomore, ti n'okwun onkeankum enagn, ayen edjinga emog elevean yim buu kamsi edjinga eyim n'ondii ofum wo vim. ²⁹ Nzeam ntangu eyidjag nde oluu o viya i buu enagn, akea nkana Abraam, mby s'aliminde loti ne kati e vii apwo anagn, eyidjag nde viya iyipierike Loti. ³⁰ Loti alim ne Tsoar, s'avean nde ne ombimi, apier mpiog, ti aman ande ankear ape, djwi ayug nde womo na mpier ne Tsoar. Atsa mpier ne evuru emog ti aman ande ankear ape. ³¹ Mon onkear intsuru atuba nda okwom ndenden: "Tea su ndean atikum ognugn; etitign ene mpi kaku ampeam ve asikug ngyia etay esu, kamsi etsa nkie vear ankeankum ne buu. ³² Yag, sipi tea su veana, sivur ti nde djwi siwum wub e tea su." ³³ Wapea tea wo veana otshuu onagn, mby mon onkear intsuru atsa mvur ti tea nde: tea akajia ata ntangu emiyia nde mvur, ata ntangu emikeande ngyima. ³⁴ Mpimpign enagn, mon onkear intsuru atuba nda okwom ndenden: "Yen, ntivur otshuu one ti tea su; yag sikey mpea tea su veana otshuu one, mby yie oletsu mvur mbala ene djwi siwum wub e tea su." ³⁵ Wapea tea wo veana otshuu onagn, agnua, mby okwom atsa mvur ti nde. Tea akajia ata ntangu emiyiande, ata ntangu emiyima nde. ³⁶ Aman ankear ankeape s'avey wo djim i tea wo. ³⁷ Mon onkear e nteang awur mon ompeam, opea dzin inde Moab: eli ndug tea e vear a Moab tii ko eshuu e luo. ³⁸ Mon onkear ilieng awur mpi mon ompeam, opea dzin inde Ben Ammi: eli ndug tea e vear Ammonite, tii eshuu e luo.