¹ Yaweh opwe ne ngnina eshung enen e Mamra, n'oshin oyinde ngigneme ne mbwung evuru ende e kapo, mbiiy enkum. ² Ntangu emisiang nde vy, alir: yenaka vear asar wawean watiyima mbeama na nde. Ntangu emayen nde, akim iveang, yim mbwung evuru ende e kapo, atsa ne nteang ewo, akr abong ne buu. ³ Atuba ndenden: "Nkum, yug ntivea ngrasia ne vy ayie, ndawigna ya yie, oyaleg ve, djwi na ntsa etey na me wur eyie otshia. ⁴ Tokwungagni, wojiagni ivim i vay osuyagni nkuu, mpi otoyoragni ne ngie oshung one. ⁵ Ndetsu mvey etign e mampa djwi otokearagni ivim i biu n'etura, mby okey nkiragni mbug egnu, ogniang na wo mby s'amileg gnu mbeama na m wur egnu otshia." Wakeara wuwun: "Kiaka oshin omituba yie." ⁶ Abraam s'atshinde eveang-eveang etay e Sara ne evuru ende e kapo, ndenden: "Kie eveang, vey akob a fufu asar, keang enkata." ⁷ Mby Abraam akim etay eli wagnam inde, avey imon i ngombe e wuo, s'apinde wur emog, s'akagninde ondjag. ⁸ Avey mpi miliki, avey mpi ti eky imon i ngombe emileam wo enagn, atsug wog ne nteang ewo. Ndemie agneme ti wo ne ngie oshung onagn, mby s'alikiwo. ⁹ Mby watuba wa nde wuwun: "Wear yie Sara ali nonkagn?" Avura ndenden: "Ali mpign n'evuru e kapo." ¹⁰ Emog ne kati ewo atuba ndenden: "Ko ne elug ene, ayayiame etay eyie; yen, wear yie Sara ayawur nde mon ompeam. Sara ayugikinde vii anagn ne evuru e kapo, djwi ayikiwo ko ne mby ende. ¹¹ Abraam ti Sara ayiwo watikum antsuru; mvwe iwo itikum entsign: Sara akafiyia n'ekaagn e mvea aman ve. ¹² Aywe two ndemie, ndenden: "Opeane mean ntignuign, asifiyia me na mfunu aman? Nkum eme mpi ndean amignuign." ¹³ Yaweh s'atubinde nda Abraam ndenden: "Djwi na nge Sara eywe nde two, ndenden: 'Me ko ayafivea me mon, me wur emignuign?' ¹⁴ Kaku vim e ngituka ve atay e Yaweh? Yug ntangu ewo etikug, ayakeame etay eyie, ko ne elug ene; Sara ayayiande na mon ompeam." ¹⁵ Sara asan, ndenden: "Me ntoywi two ve." Djwi ayug nde womo> Kansi nde wur enagn atuba ndenden: "Odjiim, aywi yie two." ¹⁶ Vear awo s'ayimiwo djwi wakien, mby walir etay e Sodomo. Abraam atshinde antsigna ne nsor mbug. ¹⁷ Mby Yaweh atuba ndenden: "Asifiziya me Abraam vim eling me ntsa nkie?... ¹⁸ Abraam ayayiande na aman entsign ti biu, mpi, vear ankeankum ne buu ayavey wo lusakumuna eyim ya nde. ¹⁹ Oson me nde djwi atubi nda aman ande ti aman ankeankum opeang onde, ayasayia mby ende na ngwum mbug e Yaweh, wakii ko vii ali ne mbug ti ne masonga, mpi djwi Yaweh akii vii amipeande elaga ya Abraam." ²⁰ Mby Yaweh atuba ndenden: "Elie etsug wo djwi na Sodom ti Gomore etilega, masumu iwo mpi itilega. ²¹ Wog enagn elekri me mpiog, asiyen me yug wamikie vii awo emikum oshuru tii ya me, yug epa ngwign ve mpi, asijia me." ²² Vear anagn atshiwo etey, atshiwo etay e Sodomo. Kansi Abraam ayikinde ko ne nteang e Yaweh. ²³ Abraam avanga mbeama na nde, ndenden: "Enagn asidjag yie wur e wuo ti wur epwo? ²⁴ Yug kamsi eli na vear otean a wuo ne oluu o wiya enagn, asadjag yie mpi, opalolula oluu o wiya enagn ve djwi na vear otean a wuo enagn? ²⁵ Ndjaag wur e wuo ti wur epwo, djwi wur e wuo na wur epwo wayi ko na ndola emog, wuo ekwon ngyia ngwign! Ekwon ngyia ngwign! Wur etsambag ewu e buu opfugn apakie vii a masonga?" ²⁶ Mby Yaweh atuba ndenden: "Yug ne Sodomo ntiyen vear a wuo otean, asilolula me wiya enkeankum ko djwi na wo." ²⁷ Abraam akea mvey otuba ndenden: "Mean ntituba ti Yaweh, me wur eli ko okub ti etugu e mpama. ²⁸ Mbala emuu ne vear otean enagn, ekwon ko vear atean; yug ekwon ko itean, asidjag yie wiya opfugn?" Mby Yaweh atuba ndenden: "Yug miyen vear a wuo onign n'itean neti, mpadjag ve." ²⁹ Abraam akea ntuba nda nde ndenden: "Mbala emuu yug eli ko vear onign a wuo." Mby atuba ndenden: "Mpakie vim ve djwi na vear onign enagn." ³⁰ Abraam atuba ndenden: "Yaweh akwon ngyug nkier, ndakea ntuba ngean: mbala emuu ekug ngyia ko vear osar a wuo. Mby Yaweh atuba ndenden: "Yug miyen vear osar a wuo, mpakie vim ve." ³¹ Abraam atuba ndenden: "Yen mean ndatuba ma Nkum. Mbala emuu esikug ngyia neti ko vear omab a wuo. Mby Yaweh atuba ndenden: "Mpadjag ve djwi na vear omab enagn." ³² Abraam atuba ndenden: "Nkum akwon ngyug nkier, ndatuba o mbala ene, mpafituba ve. Mbala emuu neti asikug wo nyia ko vear djum a wuo. Mby yaweh atuba ndenden: "Mpadjag ve djwi na vear djum a wuo anagn." ³³ Ntangu emishir ntuba Yaweh nda Abraam, s'akien nde. Mby Abraam mpi akea ne evuru ende.