¹ Sarai, wear Abrama akawur ata mon ve. Ayinde na wur otshia emog onkear e Ejipiti, dzin inde Agar. ² Mby Sarai s'atubinde nda Abrama ndenden: "Yen, Yaweh ndean amintsug me ekuba; yag, ndawigna ya yie, etay e wur eme otshia onkear, mbala emuu ya nde, asivea me aman." Abrama ayug otuba o Sarai. ³ Mby Sarai, wear Abrama, s'avey nde wur ende otshia eyim Ejipiti, Agar, s'opinde ya wum nde Abrama djwiakum wear nde. Kog, Abrama ayiwo atikie mvwe djum emiyiande mpier ne buu e Kanaana. ⁴ Atsa etay e Agar, mby s'avey nde djim. Ntangu emiyen nde ativey djim, akum ndir nkum ende onkear elir epwo. ⁵ Mby Sarai s'atubinde nda Abrama ndenden: "Itii imintwe wo ene, ekea ndog ya yie, ntopea wur eme otshia ne mbwo iyie, ntangu emikum nde na djim, ankea ndir me elir epwo. Yaweh abag vii ame ti yie!" ⁶ Abrama akeara Sarai ndenden: "Yen, wur eyie otshia ali ne ngie ekub eyie, djwi na nde, kie oshin onkeankum esileang yie." Mby Sarai s'opikinde mpay, mby Agar mpi s'alur nde etey na Sarai. ⁷ Wanzio e Nzeam oyen mbeama na nto e vay amog ne buu e ndzum, mbeama na nto eli ne mbug e Shur. ⁸ Atuba ndenden: "Agar, wur otshia e Sarai, oyim nonkagn, mpi oletsu nonkagn?" Akeara ndenden: "Ntilur etey na nkum eme Sarai." ⁹ Wanzio e Nzeam atuba nda nde ndenden: "Tshim, kea ntsa etay e nkum eyie onkear, baba ne mbwo inde." ¹⁰ Wanzio e Nzeam okaba ndenden: "Ayatsug me aman ayie wakum entsign, entsign oshin oli wapikug ntanga isuu iwo ve." ¹¹ Wanzio e Nzeam okaba ndenden: "Yen, wean oli na djim, ayawur yie mon ompeam, ayopea yie dzin Ismael, djwi Yaweh atoyug ngy ne mpay iyie. ¹² Ayayiande kamsi mpunda okwun, ewuo ende epayaleangaka vear ankeankum ve, mpi mbwo i vear ankeankum epayoleangaka nde ve. Ayapieraka nde ko ne nteang atwung ande ankeankum." ¹³ Nde s'apinde wur emokaba djwi ine dzin i Atta El Roi, djwi atubinde ndenden; "Nge nkayen ata vim ve ne ntangu eyingyen nde?" ¹⁴ Wog enagn eyisakawo vie ibulu i vay inagn, ibulu i vay i Lashai Roi; eli ne ngnina e Kades ti Bared. ¹⁵ Agar awura Abrama mon ompeam, mpi Abrama apea dzin Ismael ya mon emopea Agar. ¹⁶ Abrama ayinde na mvwe oniani n'isom ntangu emowura Agar Ismael.