¹ Abrama s'alim nde n'Ejipiti akea etay e sudi, nde ti wear nde, ti vim andeankum, ti Loti mpi ayinde nda wo. ² Abrama ayinde n'otsun entsign, wagnam, ekri na wolo. ³ S'akien nde yim sudi tii ko Bethel, tii ko ondii oyitwung nde imon evuru e kapo e nteang, ne ngnina e Bethel ti Ai, ⁴ ne ondii eyitigni nde ntwung evuru e nteang. Kog enagn, Abrama s'aviinde dzin i Yaweh. ⁵ Loti elekienikinde ti Abrama, ayinde mpi na ameme ande, ti wangombe inde, ti mvuru inde i kapo. ⁶ Etitign enagn, vim akakugaka ve djwi wayii ondii omog, djwi ayiiwo na wagnam entsign, ekafikug ve wayii ondii omog. ⁷ Ashia s'apwiwo ya vear awo alir wagnam, vear Abrama ti vear a Loti. Ne ntangu enagn, vear a Kanaana ti vear a Ferezia ayiwo wapier ko ne buu enagn. ⁸ Abrama s'atubinde nda Loti ndenden: "Ndawigna ya yie, ashia akwon ngya ne kati eme ti yie, ata ne kati e vear alir wagnam ime ti vear alir wagnam iyie, djwi sili atwung. ⁹ Buu ene enkum opfugn epa eli ne nteang eyie? Naam ya me, yug oletsu wear ewuo, me asitsa me wum ewuo, yug oletsu wum ewuo, me asitsa me wear ewuo." Loti asiang vy dzug, ayen okwun o Yordani, ayiwo eli ko opfugn. Ntangu eyii Yaweh atodjag Sodom ti Gomore ve, tii ne Tsoar, mpiog ayiwo kamsi evur e Yaweh, kamsi buu e Ejipiti. ¹¹ Mby s'ason nde okwun oyii n'ikri i Yordani, atsa tii etay epwe vuna. Enagn eli oshin oyinaam wo. ¹² Abrama apierikinde ne buu e Kanaana; mby Loti apierikinde ne viya inen iyii ne buu inagn, atwung mpi vuru i kapo tii ko Sodom. ¹³ Vear a Sodom ayiiwo vear apwo, mpi vear a biu na masumu ne nteang e Yaweh. ¹⁴ Ntangu eminaam Loti nda Abrama, Yaweh s'okabinde ndenden: "Siang vy ayie dzug, ondii oli yie enagn, lir etay e nodi ti etay e sudi, etay epwe vuna, ti etay elog vuna. ¹⁵ Djwi buu enkum eyen yie enagn, ayopeame yie ti aman ayie otshwag-otshwag. ¹⁶ Ayopeame aman na ankean entsign kamsi nkege i buu, yug eli na wur eyakug ntanga nkege i buu, mby akug ntanga isuu aman ayie. ¹⁷ Yima, tear buu ene enkum n'otey ewo ti n'onen ewo; djwi ayopeame wog." ¹⁸ Mby Abrama s'aliminde wamvuru inde i kapo, s'atshinde mpier ne ngnina oshung e Mamre, eli mbeama na Hebroni. Atwung nde mpi kunda djwi na Yaweh.