¹ Mby Yaweh atuba nda Abrama ndenden: "Lim ne buu eyie ne ondii opier yie, ne evuru e tea yie, tshwag ne buu esokaba me. ² Ya yie, ayapur me aman entsign, ayosakumuna me, dzin iyie ayakum eninen, mpi ayayia yie itsin i lusakumuna. ³ Ayasakumuna me vear ayosakumuna yie, mpi ayashing me vear ayoshing yie; mpi wafamilia inkeankum ne buu ayaveaka wo lusakumuna eyim ya yie." ⁴ Abrama s'atshinde oshin eyokabi Yaweh, Loti mpi atsa ti nde. Abrama ayinde na mvwe oshambia n'itean ntangu eyipwinde ne Sharan. ⁵ Abrama s'avey nde wear nde Sarai ti Loti, mon ontwung onde, na vim ankeankum ayiwo na wo, mpi ti vear ande otshia eyivey nde ne Sharan. Alim wo djwi na ntsa ne buu e Kanaana, mby s'akum wo ne buu e Kanaana. ⁶ Abrama atear ne buu enkum, tii ko ne ondii oviewo Sishem, tii ko ne eshung enen-enen e More. Vear a Kanaana ayiwo waloko ne buu ewo. ⁷ Yaweh apwe ya Abrama, okaba ndenden: "Ayapeame bu ene ya ankean ayie." Kog enagn, Abrama s'atwung nde evuru djwi na Yaweh ne oshin eyopwinde. ⁸ Alim kog, atsa ne embimi, etay etsa mpwe vuna e Bethel, mby s'atwung nde mvuru inde i kapo. Oshin oli Bethel etay etsandog vuna, ti Ai etay etsampwe vuna, akea ntwung evuru emuu kog djwi na Yaweh, mby s'aviikinde dzin i Yaweh. ⁹ Abrama akea nkien, atsa etay e sudi. ¹⁰ Nziya emog eshwe ne wiya, mby Abrama s'akrinde buu e Ejipiti, na gneme ntete mpiog, djwi nziya ayiwo biu ne wiya. ¹¹ Ntangu emivanga nde mbeama na buu e Ejipiti, atuba nda wear nde Sarai ndenden: "Njia memen oli entieng onkear n'elung eyie. ¹² Vear a Ejipiti ntangu esoyen wo, asituba wo wuwun: " Eli wear nde!' Asindjag wo me, wososugn yie ne luzingu. ¹³ Ndawigna ya yie, wuo otubi yeyen oli nkignam me, djwi wamvey wuo djwi na yie, mpi moyo eme eyii na luzingu djwi na yie." ¹⁴ Ntangu emikum Abrama ne Ejipiti, vear a Ejipiti wayen wuwun onkear owo ali entieng onkear. ¹⁵ Antsuru ali etay e Faraon woyen, watsa nkaba Faraon na entieng onkear onagn, mby s'avariwo onkear onagn etay e Faraon. ¹⁶ Wavey Abrama wuo djwi na nde, mby s'apiiwo Abrama ameme, wangombe, wampunda aveari ti awum, vear otshia ampeam ti ankear, ti washamo. ¹⁷ Kansi Yaweh apea ndola eninen ya Faraon ti vear ali ne evuru ende, djwi na Sarai, wear e Abrama. ¹⁸ Mby Faraon s'aviinde Abrama, ndenden: "Vim nge emikie yie ene? Djwi na nge ekankaba yie yeyen ene eli wear yie? ¹⁹ Djwi na nge eyitubi yie yeyen: 'Eli nkignam yie?' Mpi ntovey, atikum wear me.Opeane, yen, wear yie ndean. Vey nde, tshwag ya nde!" ²⁰ Mby Faraon s'atum nde vear n'onkaba akien, nde ti wear nde, ti vim ande ankeankum.