¹ Buu opfugn atubikiwo ko otuba omog, wameaga ko oshin omog. ² Alim wo etay epwe vuna, watsa ngyen ondii omog eli kaku embimi ve, ne buu e Shinear, mby s'apier wo neti. ³ S'atubiwo wog na wog wuwun: "Yagagni, sikiagni wambriki, sibuoagni wog tshiya." Mby wambriki inagn ikum kamsi atari, wakie ti poto-poto djwi na shema. ⁴ Wakeantuba wuwun: "Yagagni sitwungagni oluu o wiya, enen, ti evuru etitey, nsor ewo ekir olung, mby su, sivey ko dzin imog djwi sikafipagn sankeankum ne buu opfugn." ⁵ Yaweh akr djwi na ndir oluu o wiya enen ti evuru etitey eletwung aman a vear ne buu. ⁶ Mby Yaweh s'atubinde ndenden: "Yen, wankeankum wali ko wur emog, watuba ko otuba omog, mby s'alekiiwo vim ane. Opeane, kaku vim esapig mbug ve na nkie vim amikana wo ne nginu iwo. ⁷ yagagni, sikragni, sitsu ntsug mavanga ne otuba owo, djwi wog na wog wakwon mfiyug vii atuba wur emuu. ⁸ Mby Yaweh apagna vear anagn etey ne buu opfugn, wankeankum, mby s'asiangi wo na ntwung wiya enen ewo. ⁹ Wog enagn, s'aviiwo wiya enagn ne dzin i Babel, djwi eli ne wiya enagn, Yaweh atsug nde mavanga ne otuba o vear ankeankum, s'apagninde vear ne buu opfugn. ¹⁰ Yen aman ayisapwe ne okuu o Sem. Sem, ntangu emikug nde mvwe nkama, s'awur nde Arpakshad, ne mby e mvwe ipe, ntangu emishir mpiye e mvuye. ¹¹ Ne mby emiwur nde Arpakshad, Sem asazinga mvwe nkama itean, awur nde mpi aman ampeam ti aman ankear amuu. ¹² Arpakshad, emikug nde mvwe osar n'itean, awur Shelak. ¹³ Ne mby emiwur nde Shelak, Arpakshad asazinga mvwe nkama inign n'isar, awur mpi aman ampeam ti aman ankear amuu. ¹⁴ Shelak, emikug nde mvwe osar, awur Heber. ¹⁵ Ne mby emiwur nde Heber, Shelak asazinga mvwe nkama inign n'isar, awur nde mpi aman ampeam ti aman ankear. ¹⁶ Heber, ntangu emikug nde mvwe osar n'inign, awur Peleg. ¹⁷ Ne mby emiwur nde Peleg, Heber asazinga mvwe mvwe nkama inign, awur nde mpi aman ampeam ti aman ankear. ¹⁸ Peleg, ntangu emikug nde mvwe osar, awur Rehu. ¹⁹ Ne mby emiwur nde Rehu, Peleg asazinga mvwe nkama ipe n'iwua. Awur nde mpi aman ampeam ti aman ankear. ²⁰ Rehu, emikug nde mvwe osar n'ipe, awur Serug. ²¹ Ne mby emiwur nde Serug, Rehu asazinga mvwe nkama ipe n'ishambia, awur mpi aman ampeam ti aman ankear. ²² Serug, ntangu emikug nde mvwe osar, awur Nashor. ²³ Ne mby emiwur nde Nashor, Serug asazinga mvwe nkama ipe; awur mpi aman ampeam ti aman ankear. ²⁴ Nashor, ntangu emikug nde mvwe omab n'iwua, awur Terash. ²⁵ Ne mby emiwur nde Terash, Nashor asazinga mvwe nkama emog na djum n'iwua; awur mpi aman ampeam ti aman ankear. ²⁶ Terash, ntangu emikug nde mvwe oshambia, awur Abrama, Nashor ti Haran. ²⁷ Yenagni okuu o Terash: Terash awur Abrama, Nashor ti Haran. Haran awur Loti. ²⁸ Mby Haran awa ne vy a tea nde Trash., ne buu eyowur wo, ne Ur, ne buu e wa Shaldea. ²⁹ Abrama ti Nashor watsug aveari: wear e Abrama dzin inde Sarai, mby wear e Nashor dzin inde ayiwo Milka, mon e Haran, ndug wur eyii tea e Milka ti Jiska. ³⁰ Sarai ayinde ekuba: akayia ata na mon ve. ³¹ Terash avey mon nde Abrama, ti Loti, mon e mon nde, ti Sarai okiu nde onkear, wear e mon nde Abrama. S'apwiwo wankeankum ndwong emog, walim ne Ur, ne buue wa Shaldea, s'atshiwo ne buue Kanaana. Wakum tii ne Sharan, mby s'apier wo kog. ³² Nshuu i luzingu e Terash ayiwo mvwe nkama ipe n'itean, mby Terash s'awinde ne Sharan.