¹ Krisru atevugi nde djwi sikwon ngya ampfum. Djwi na wo, yiagni inaagn, mpi oyaleangagni na nkum ampfum ve. ² Yenagni, me, Polo, ndokabagni memen yug ojiragni na mbag djuung, Kristu apayia na mfunu ve djwi na gnu ata ne djwi imog. ³ Ndakaba wur enkum, mbala iky diaka, memen wur enkum eleang na mbag djuung afwete nkie oshin oleang onkwon onkum. ⁴ Gnu gnankum emivug djwi na nsiku, otipweagni ne mbug e Kristu. Opizingagni diaka na ngrasia ve. ⁵ Djwi na su, ne lukwikilu, sikwung ne Mpeve, ekaagn e busantu. ⁶ Djwi ne kati e Yezu Kristu, mbag djuung to nkwon mbag djuung kakuwo na mfunu ve. Kansi vim e mfunu eli etshia e lukwikilu esiyen vear ne lutondo. ⁷ Alekimikignu wuo. Wur ewo nagn emotshungagni mbug djwi okwon ndemfukagni ya masonga? ⁸ Luzolo e nkie ngwign epayum ya wur eyoviagni ve ! ⁹ Ivivim i levir atsawo mvean potopoto enkum e mampa. ¹⁰ Ndi n'ekaagn ma gnu ne kati e Nkum Yezu Kristu memen opabansagni oshin iky ve. Kansi wur esoshweragni mavwanga, ata ali nagn, asivarande ndemie ndola ende. ¹¹ Atwung, yug ndalong diaka vii a mbag djuung, djwi na nge elefempii wo me mpay? Oshin onagn vim ekir kulunsi etilim. ¹² Nding vear aloshweragni ne mbug epwo walim nkeanga wo ne kati egnu. ¹³ Djwi, atwung, Nzeam oviagninde na nkwon ngya ampfumi. Kansi oyayenagni ve, yug epa olagni ampfumi ewo, eli kamsi mbug e nzinga n'osugn. Wog enagn, sarisagni gnug na gnug na lutondo. ¹⁴ Djwi onkwon onkum omikea nkug ko n'otuba omog one: "Asileang yie otwung oyie kamsi yie yemie." ¹⁵ Kansi yug olemagagni vin mpi olelwagni gnug na gnug, osug, amuu wakadjag amuu iky. ¹⁶ Ntuba memen kienagni oshin otuba Mpeve mpi opalemfukagni ve ne mpuy djuung. ¹⁷ Djwi mpuy djuung ipitsunkien ve mbug emog ti Mpeve, mpi mpuy i Mpeve ipitsunkir ve na djuung. Mpuy ipe inagn ipitsunkien mbug emog ve. Nsuka ewo eli k'opakie ve vim aling yie nkie. ¹⁸ Kansi yug Mpeve elovari, epa oli diaka ne ngie onkwon ve. ¹⁹ Opean, etshia osugn itipwe nelien. Eli mpite, vii a mbiin, itaay, ²⁰ nsama biteke, ilog, kimbeni, ashia, zuwa, nkier, nkabwana, binzambi-nzambi, ²¹ mpuy, ngyuyi vean, oliu entsign mpi vim oshin onagn. Ndokabagni, oshin oyokabagnime nteang, memen vear alekii vii ane wapayashwe ve n'ekub e Nzeam. ²² Kansi mbeam i Mpeve eli ngaagn, osiang, ngemba, ndjia nkwung, lutondo, ²³ mawete, lukwikilu, boboto mpi ndjia ntshung etura. Kaku ata onkwon omog ve etsampum vii ane. ²⁴ Vear a Yezu Kristu wamikwog ne kulunsi osugn ti ileang-leang na mpuy inde ipwo. ²⁵ Yug sizinga na Mpeve, sikienike ko oshin oleang Mpeve. ²⁶ Sikwon ngyiagni vear a lulendo, vear aling ontsum sug na sug, vear aleang, sug na sug, vim atwung.