¹ Atwung, ata omitshungagni wur akie ipwo, ekug wuo gnu, vear alekien ne Mpeve, okearagni ne mbug na mawete. Osugagni gnu gnemie, djwi okwon ndogagni ne mpukumuna. ² Sarisagni gnug na gnug na mvara odzuru ognu, mpi oshin onagn, asilemfukagnu n'onkwon o Kristu. ³ Djwi yug eli na wur ebansa ndenden ali wur eninen, ali ko wur emog e mpama, adjim oyang ya nde ndemie. ⁴ Wur na wur alir epier ende ndemie, mby asiyen nde oshin osikug mvey lokumu ende ndemie, apafitesa nda wur iky. ⁵ Djwi wur enkum ayavarande odzuru onde. ⁶ Wur elezig otuba o Nzeam, afwete mpea ikab i vim ande ya wur elolong. ⁷ Oyajingagni ve, wapitsungywe Nzeam two ve, djwi wur atsande nkwomo ko vim ayifuynde. ⁸ Djwi wur emifuy ne djuung inde asikwomonde ko vim a djuung, asiteanande k'ewa. Kansi wur esifuy djwi na Mpeve, asikwomonde luzingu ekwon nsuka e Mpeve. ⁹ Sikwonagni ndem na nkie vii a wuo, djwi yug simitsug inaagn, asikwomosu mbeam eshuu ekug. ¹⁰ Wog enagn, yug mpila eliko, sikii vii a wuo ya wur enkum. Kansi nteang nteang ya atwung asu alisu ti wo ne lukwikilu. ¹¹ Liragni enkean enen emofugnagnime na mbwo ime memie. ¹² Vear alotumagni na biu na mbag djuung waleling ko wayen ne viy a vear djwi na nkwon ngyen mpay ogniang na kulunsi e Kristu. ¹³ Djwi ata vear amibag wo djuung wapilekug ngwum onkwon ve, kansi wo waling ko wobagagni djuung djwi wavey lokumu n'osugn ognu. ¹⁴ Kansi me, ntun na mvey lokumu ne vii amuu aky, lokumu eme ko ne kulunsi e Nkum Yezu Kristu. Ko ne mbug e kulunsi enagn akwog wo okiri ne kulunsi djwi na me, mpi ankwog wo ne kulunsi djwi n'okiri. ¹⁵ Djwi mbag djuung to nkwon mbag djuung eli mpama, mpitsug onenen ve, kansi vim enen djwi na me eli nkum wur empa. ¹⁶ Ya vear ankum ayazinga ne mbug onkwon one, ngemba ti ndolula eyi ya wo ti ya Israel e Nzeam. ¹⁷ Yum lwo, kaku wur emog ve eyafimpea mpay, djwi ndi na bidimu i Yezu ne djuung ime. ¹⁸ Ngrasia e Nkum esu Yezu Kristu eyi ya mpeve egnu, atwung ame. Amen.