¹ Kansi yug nkea oleama-nzo ali diaka ilieng, ntuba memen ali oshin omog ti mpfumi, ata ali nkum e vim ankum. ² Djwi ali na vear alelir vii ande tii ko ntangu eyisawong teande. ³ Su k'oshin omog, ntangu eyikisu alieng, ayikisu ampfumi i wansiku okiri. ⁴ Kansi ntangu emikug nshuu iwo, Nzeam atetuminde mon nde, eyiwur wo ya onkear, eyiwur wo ne ngie e nsiku. ⁵ Djwi akey nshum vear ayi ne ngie e nsiku, djwi sikum aman amiwungawo kamsi aman a Nzeam. ⁶ Ogniang olagni aman, Nzeam amitum n'itura isu Mpeve e Mon nde, Mpeve ewo adzama: "Abba, Tea !" ⁷ Wog enagn, epa oli diaka mpfumi ve, kansi oli mon, mpi yug oli mon, oli mpi nkea oleama-nzo e ngrasia e Nzeam. ⁸ Nteang, djwi ayiwo opijiagni Nzeam ve, ayikignu ampfumi a vim akayiaka wanzeam i kieleka ve, ⁹ kansi opean emijiagnu Nzeam, mpi ntangu eli Nzeam amojiagni gnu, oshin nge elekey gnu ntsandog ne wansiku i mpama mpama ilokey ontsugagni diaka ampfumi? Olingagni osayiagni ampfumi otshwag otshwag? ¹⁰ Olelanagni wanshuu, wangwon, ntangu ti wamvwe ! ¹¹ Ndeyug womo djwi na gnu n'otshia oyikime ti gnu ekafiyia otshia o mpama. ¹² Atwung, ndoleamagni gnu, yiagni kamsi me djwi me ko ndi kamsi gnu. ¹³ Otonkiagni ata ipwo imog ve. Ojiagni gnugnun ayiwo djwi na mpay ime i djuung s'olongagni me oshwong o wuo mbala enteang. ¹⁴ Mpi, ntangu eyikime na mpay ne djuung, okantunagni ve mpi okantweagni ve, kansi amveygnu kamsi wanzio e Nzeam, kamsi Yezu Kristu ndemie. ¹⁵ Kidimu osiang ognu eli nonkagn opean ? Djwi ndokabagni, yug eyi na mpila, anakeagagnu viy djwi ompeagni me wog. ¹⁶ Ntikum mbeni egnu oshin oyokabagnime masonga ? ¹⁷ Osag oliwo na wo djwi na gnu epa eli e wuo ve, djwi waling onkabulagni ti su djwi oyiagni n'osag djwi na wo. ¹⁸ Eli wuo na ngya n'osag djwi na vim ali wuo mpi ntangu enkum, epa ko ntangu elime kog ne kati egnu ve. ¹⁹ Aman ame, ndayug diaka osayu ongwur djwi na gnu tii ko ntangu eyatsug gnu Kristu n'itura ignu. ²⁰ Ndi na mfunu e ngya opean pipi na gnu, mpi nding nsongo otuba, djwi ndagnie entsign djwi na gnu. ²¹ Onkabagni, gnu vear aleling ngya ne ngie e nsiku, ng'opijiagni nsiku ? ²² Djwi wamifugn wuwun Abrama ayinde n'aman ape, emog nd'onkear oyi mpfumi, emuu nd'onkear okayia mpfumi. ²³ Kansi mon e mpfumi owur wo n'oshin osugn, mby mon onkear okayia mpfumi owur wo n'oshin oyipiiwo elaga. ²⁴ Vii ane ali kamsi itsig, djwi ankear anagn wayegne alien ape. Emog eli ilien ombimi o Sinai eyiwur aman a mpfumi: eli Agar. ²⁵ Djwi Agar eli ombimi o Sinai ne Arabia mpi ekug na Yeruzalem e lwo eyi ne kati e ampfumi, olwong onde aman. ²⁶ Kansi Yeruzalem e dzug epa eli e ampfumi ve, eli measu. ²⁷ Djwi wamifugn: "Yia n'osiang, yie wur epitsungwur ! Yen kiese mpi tsug elie, yie wur ekayug osayu ongwur ! Djwi aman onkear oyiseangiwo ayayiawo entsign ndenga aman onkear oyiyike n'ivea." ²⁸ Kansi djwi na gnu, atwung, kamsi Izaki, olagni aman elaga; ²⁹ Mpi oshin omog kamsi ne ntangu e ntama, mon eyiwur wo n'oshin osugn apiinde mpay entsign ya mon eyiwur wo n'oshin oyitubi Mpeve. Lwo mpi eli k'oshin omog. ³⁰ Kansi Masonama etuba nge ? "Kma mpfumi ti mon nde djwi mon e mpfumi apasavea vim oleama-nzo ve ondii omog nda mon onkear oyikayia mpfumi." ³¹ Wog enagn, atwung, epa sili aman onkear o mpfumi ve, kansi aman onkear oyi n'ivea.