¹ Yaweh atuba nda Moize ndenden: "Tshwag etay e Faraon, kaba nde yeyen: 'Yaweh, Nzeam e aman a Israel atuba ndenden: Sianga vear ame wakien, watsi nkie empeab djwi na me. ² Kansi yug otun na nsianga wo, yug omakeankir, ³ yen, ewuo e Yaweh asiyiawo ne dzug i wagnam ili ne okwun, ti ne wagnam ignu inkum ne wiya, asishir wo ngwa. ⁴ Yaweh asinama nde wagnam i aman a Israel ti wagnam i aman a Ejipiti. Kaku ata gnam emog e mon e Israel esiwa ve. ⁵ Yaweh atsug elaag ndenden: "Nampign ndakie vii ane ne buu ene." ⁶ Yaweh akie vii awo ko mpimpign enagn. Wagnam inkum i vear a Ejipitiiteana ewa, kaku ata gnam emog e mon e Israel eyiwi ve. ⁷ Wakab Faraon vii anagn, atsa ndir mpi akayen ata gnam emog ve eyiwi ne itwung i wagnam aman Israel. Kansi Faraon atshung ko etura, akasianga aman a Israel na nkien ve. ⁸ Yaweh atuba nda Moize ti Aaron ndenden : Yuragni mbwo ignu n'etug e tshiya, Yie Moize, otwomi wog dzug ne viy a Faraon, ne ntangu eyog nde. ⁹ Etug enagn asisawokum okub, asidzub wo buu enkum e Ejipiti, asipur wo wampura ne djuung i vear ti wagnam inkum ne buu e Ejipiti, mpura isipwe ti atwo." ¹⁰ Moize ti Aaron wavey etug e tshiya, mpi watsa ne nteang e Faraon. Moize atwomo wog dzug, mby epur wampura ne djuung i vear ti wagnam, ipur ti atwo. ¹¹ Ankea alog wakafikug ve na mpwe ne nteagn e Moize djwi wampura ti atwo anagn ayiwo ne djuung iwo ti vear ankum a Ejipiti. ¹² Yaweh alega ntshung etura e Faraon, Faraon mpi akaleang ngyug Moize ti Aaron ve, ko oshin oyitubi Yawehnda Moize. ¹³ Mby Yaweh atuba nda Moize ndenden: "Asibiy yie ne suka-auka, pwe ne nteang e Faraon. Asokaba yieyeyen: 'Yaweh, Nzeam e wayuda, atuba ngean: Sianga vear ame wakien, watsu nkie otshia ome.' Ogniang, mbala ene, asitum me ndola ime inkum ya yie yemie, ti vear ayie otshia, ti vear a okiri oyiedjwi ojii yeyen kaku emog ve eyer nda me ne buu opfugn. ¹⁵ Yug anashima me ewuo eme djwi modjag yie ti vear a okiri oyie, anashir gnu otshwag ne buu. ¹⁶ Kansi ntoyugagni ngy, ntosiangagni ne luzingu djwi oyen biu ome mpi djwi dzin ime ipagn ne buu opfugn. ¹⁷ Yug omikea ngyima na ntag vear ame, mpi yug okasianga ve wakien, ¹⁸ yen nampign, asilogo meewung emog e biu ko ne ntangu emikum su ene, oshin o ewung enagn etotigni ndog ve ne buu e Ejipiti, yim ko eyikime ewung tii opeane. ¹⁹ Tum ko vear wawum wagnam iyie wuo ti ili ne okwun. Ewung asilog wo ne djuung i vear ankumti wagnam inkum ili ne okwun, ti wagnam itotigni yie ngwunga ne evuru, asiwawo."" ²⁰ Vear a otshia e Faraon amuu ayiyug womo otuba o Yaweh, s'alimiwo vear awo otshia mpi ti wagnam iwo washwer ne mvuru. ²¹ Kansi amuu akaleang mvey otuba o Yaweh ne itura iwo, wasasugn vear awo otshia ti itwung i wagnam iwo ne okwun. ²² Yaweh atuba nda Moize ndenden: "Shima ewuo eyie ne dzug djwi ewung elog ne buu e Ejipiti opfugn, ne djuung i vear, ne djuung i wagnam, ti ne dzug i adjiu ankum ne buu e Ejipiti." ²³ Moize s'ashimi nde ikom inde, ajir dzug; mby Yaweh s'atum nde ipfung i mvuye ewung ti tshiya elekien ne dzug i buu. Yaweh alogo ewung enteang ne okiri e Ejipiti. ²⁴ Ewung elog, mby tshiya esiama ti ewung enagn, ayiwo biu kaku mpila ve, yim ko Ejipiti emikum wo okiri, watotigni ngyen oshin onagn ve. ²⁵ Ewung elog ne buu e Ejipiti opfugnvim ankum ayike ne okwun, vear tii wagnam washir, ewung edjag adjiu ankum ne okwun, elogo ti eshung e nkum ne okwun. ²⁶ Kansi ne buu e Gshen, ondii oyike aman a Israel, ewung ekayia ve. ²⁷ Faraon atum vear na mvie Moize ti Aaron. Atuba nda wo ndenden: "Mbala ene, ntikie disumu. Eli Yaweh ndug eli na lunungu. Me ti vear a okiri ome, sitilog. ²⁸ Samagni Yaweh djwi apfung ti ewung ene eshir, mby asosiangagni me okienagni, kaku wur esokiragni ve." ²⁹ Moize atuba nda nde ndenden: "Ko esipwe me nendien, asisiang me mbwuo dzug etay e Yaweh, apfung asishir wo, mpi ewung epafiyia ve, djwi ojii yeyen buu ene eli e Yaweh. ³⁰ Kansi me, ndajia, yie ti vear ayie otshia, opatoluragni ve womo o Yaweh, Nzeam." ³¹ Lin ti orge awiwo ognianglin ti orge ayiwo etiwur, ebiy mpi ayiwo etipur bintuntu; ³² Mby froment ti epautre ekawa ve, ogniang ntangu etsawo mpwe ayiwo etokug ve. ³³ Moize ntangu emipwe nde etay e Faraon, ajir mbwo inde dzug etay e Yaweh, apfung ti ewung s'ashir wo, mpi mvuye ekafiteang ne buu ve. ³⁴ Faraon ntangu emiyen nde kaku diaka apfung, mvuye ti ewung, akea nkie ko masumu, akea ntshung etura, ti nde, ti vear ande otshia. ³⁵ Faraon akum na etura ntsug, mpi akasianga ve aman a Israel wakien, oshin oyitubi Yaweh nda Moize.