¹ Yaweh atuba nda Moize ndenden: "Tshwag etay e Faraon, ntitshung etura ende ti itura i vear ande otshia, djwi ngyegni bidimu ime ne kati ewo. ² Eli mpi djwi yie, okabi aman ayie ti ankean ayie oshin nge emilieme vear a Ejipiti, mpi bidimu nge imikieme ne kati ewo, mby ojiagni gnugnun ndi Yaweh." ³ Moize ti Aaron s'atshiwo etay e Faraon, mby wokaba wuwun: "Yaweh, Nzeam e wayuda atuba ngean: 'Tii nsuka nonkagn eyatun yie na nkrangie ne nteang eme? Sianga vear ame wakien, djwi watsi nkie otshia ome. ⁴ Yug omitun na nsianga wo wakien, yen nampign asitum me abampay ne okiri oyie opfugn. ⁵ Abampay asidzub wo buu enkum, wapafi kug ngyen buu ve, asilawo vim amuu ayisatsuga, vim akawa na ewung enagn, asilawo eshung enkum elemen ne okwun. ⁶ Asiyuo wo to ne mvuru iyie, mvuru i vear ayie otshia wankum, ti ne mvuru i vear ankum EjipitiAtea ayie ti andundu ayie watotigni ngyen oshin o vii anagn ve tii eshuu e luo." Moize s'alim nde, s'atshinde etay e Faraon. ⁷ Vear a otshia e Faraon s'atubiwo wuwun: "Tii nsuka nonkagn wur ene eyate tsugaka nde mpaagn ne dzug ne dzug? Sianga vear ane wakien, watsu nsama Yaweh, Nzeam ewo. Opiyen ve yeyen Ejipiti elewe? ⁸ Mby wakea mvie Moize ti Aaron etay e Faraon. Atuba nda wo ndenden: "Tshwagagni, osamagni Yaweh Nzeam egnu.Mby vear awo asitsa eli wanagn?" ⁹ Moize akeara nddnden: "Siletsu ti enkwo esu, ti agnugn asu, ti aman asu ampeam, ti aman asu ankear, ti ameme asu, ti wangombe isu, ogniang eli okina esikiesu djwi na Yaweh." ¹⁰ Faraon atuba nda wo ndenden: "Yaweh ayi nda gnu ne oshin esosiangagni me okienagni, gnu ti aman agnu. Osugagni ko mpay ili nteang egnu. ¹¹ Kaku ve! Kaku ve! Gnu ampeam tshwagagni osamagni Yaweh, enagn wog vim eyiling gnu." Mby s'akmi wo Moize ti Aaron ne nteang e Faraon. ¹² Yaweh s'atubinde nda Moize ndenden: "Shima ewuo eyie ne okiri e Ejipiti, mby abampay asivean wo ne buu e Ejipiti, wale adjiu ankum ali ne buu, inkum iyisasugn ewung." ¹³ Moize asiang ikom inde ne okiri e Ejipiti, mby Yaweh atum opepe emog eyim etay epwe vuna eyia mpwe wiya, mbiiy enagn enkum ti otshuu opfugn. Ntangu emileam vuna, opepe enagn etiyia na abampay. ¹⁴ Abampay wavean ne buu e Ejipiti, wakuba ne endii enkum ne Ejipiti. Aiwo entsign, oshin ptotigniwo ngyen, mpi wapayafiyen oshin onagn ve. ¹⁵ Wadzub buu enkum, buu ekum mpib. Wala adjiu ankum ne buu, ti atub ankum ne eshung, vim ankum ayisatsuga ne ntangu eyi ewung. Ekafisayia ata na ekay e mvu emog ve ne oshung, ata ne adjiu ne okwun, ne buu enkum e Ejipiti. ¹⁶ Etean kaku, Faraon avie Moize ti Aaron, atuba ndenden: "Ntikie masumu ne nteang e Yaweh Nzeam egnu ti ne nteang egnu. ¹⁷ Kansi, ondolulagni masumu ime, ene eli mbala e nsuka, mpi samagni Yaweh Nzeam egnu, djwi andimi ndola ewa ene, etsu etey na me." ¹⁸ Moize s'apwinde ne evuru e Faraon, asama Yaweh. ¹⁹ Yaweh atum opepe emog eyim etay elog vuna, opepe e biu, evara abampay nkum, etsa ndogo ne nzey e kwi, ekafisatsuga ata na ibampay imog ve ne buu e Ejipiti opfugn. ²⁰ Kansi Yaweh, akeantshung eura e Faraon, mpi akasianga ve aman a Israel wakien. ²¹ Yaweh atuba nda Moize ndenden: "Shima ewuo eyie dzug djwi mpib elog ne buu e Ejipiti, mpi vear wakir mpib enagn." ²² Moize ashima ewuo ende dzug, mby mpib elog ne buu e Ejipiti enkum, ekie ko nshuu isar. ²³ Kaku wur esikug ngyen wur emuu ve, kaku mpi wur eyilim ne ondii oyikinde ve, tii ko nshuu isar. Kansi etay epier aman a Israel, ayiwo ko yele. ²⁴ Faraon avie Moize atuba ndenden: "Tshwagagni osamagni Yaweh. Ko ameme agnu ti wangombe ignu asisawo tsuga, aman agnu asikug wo ntsa ti gnu." ²⁵ Moize akeara ndenden: "Eli yie wur efwete mpea ne mbwo isu gnam iletshisu nkie empeab djwi na Yaweh Nzeam esu. ²⁶ Asitsasu ti wagnam isu, mpi kaku ata ekea emog esisatsuga ve, ogniang asiveyakasu ko ne wagnam inagn isikiesu otshia djwi na Yaweh Nzeam esu, tii ko eyakum su, sipijia ve gnam nge eyapeasu djwi na Yaweh." ²⁷ Yaweh adzign etura e Faraon, mpi akafileang nsianga wo wakien ve. ²⁸ Faraon atuba nda Moize ndenden: "Lim nendien! Oyafikum ne nteang eme ve, eshuu eyakum yie ne nteang eme, ayawayi." ²⁹ Moize akeara ndenden: "Yemie otituba, mpafiyia nkum mpi ne nteang eyie ve."