¹ Mby Yaweh atuba nda Moize ndenden: "Ndakea mpea Faraon ndola emuu, ti okiri e Ejipiti. Ne mby ewo asosiangagni nde okienagni. Ntangu esowung nde onsiangagni djwi okienagni, asokmagni nde ngikma. ² Kaba aman a Israel, wur na wur, mpi onkear na onkear, awigni ya otwung oli mbeama na nde wampuug i iwuu ti wampuug i wolo. ³ Yaweh akie djwi aman a Israel waviy ngrasia ne viy a vear a Ejipiti, ata Moize ndemie mpi, ovey wo wur emog eninen ne buu e Ejipiti ti ne vy a vear a otshia e Faraon, ti ne vy a vear ankum a Ejipiti. ⁴ Moize atuba ndenden: "Yaweh atuba ngean: 'Ne ngnina otshuu e luo ene, asileg me ne buu enkum e Ejipiti; ⁵ mby aman ankum a nsom eteang ne okiri e Ejipiti asiwawo, yim ko nsom eteang e Faraon emigneme ne nkway ende ekub tii ko nsom eteang e onkear o mfumi elekii ivur, ti aman a nsom eteang e wagnam inkum. ⁶ Asiyiawo aluu ne okiri e Ejipiti opfugn, aluu atotigniwo ndiye , mpi oshin aluu anagn epayafiyia diaka ve. ⁷ Kansi ne kati e aman Israel, yim ko vear tii ko wagnam iwo, kaku ata mva emog eyapur elim ende ve, djwi ojiagni gnugnun Yaweh apaalakie vii oshin omog ve ne kati aman Israel ti vear a Ejipiti.' ⁸ Mby vear ayie otshia ankeankum eneayakrawo etay eme, ayakr wo abong ne nteang eme, atubi ndenden: 'Pwe, ti yie, ti vear alosodjii yie ene', ne mby ewo, asipweme." Moize s'apwinde ne evuru e Faraon, na nkier imog i biu. ⁹ Yaweh atuba nda Moize ndenden: "Faraon apoyugagni gnu ve, djwi bidimu ime ilegi nkum entsign ne buu e Ejipiti." ¹⁰ Moize ti Aaron akikiwo bidimu inkum inagn ne nteang e Faraon, mpi Faraon akaleangaka ve na nsianga aman Israel na mpwe ne wiya nde.