¹ Yaweh akaba Moize ti Aaron ne buu e Ejipiti ndenden: ² Ngwon ene, djwi na gnu, eli ngwon enteng ne mvwe. ³ Kabagni aman ankum Israel gnugnun: 'Ne nshuu djum i ngwon ene, ayavey gnu imeme imog-imog ne konso opeang, imeme imog-imog ne konso evuru. ⁴ Yug evuru enagn kaku vear entsign ve djwi na imeme imog enagn, asilagnu ti vear ali mbeama na gnu, oshin osikug isuu i vear. ⁵ Asiyiawo imeme i wum, eli kaku ekom ve, emikug mvwe emog; asikug gnu mvey imeme to mbur. ⁶ Ayawum gnu wog tii ko ne nshuu djum na inign e ngwon ene; mby aman Israel enkum asidjag wo imeme iwo ne ngnina otshuu. ⁷ Oveyagni aluung ande, mby okwiagni ne abaya ankeape e ngiyima ti ne ibaya i dzug e epfug evuru ondii oyalagnu. ⁸ Ko otshuu onagn, ayalagnu eky e ngifum obwo, ayalagnu ti mampa ikwon ete, ti nkay asagn oluu. ⁹ Opikug ndagni ve, yug etowung ngya ve na tshiya, mpi opatokisagni wog ve ne mpuug, kansi obwo ne tshiya, ti ote, ti nseanga, ti nsob iwo neti. ¹⁰ Opasasugngni ata vim emog ve esikeama vuna ne suka, wuo esalunga ne tshiya. ¹¹ Ntangu eyalakagnu, ayatshung gnu okaba ne ikini ignu, olweragni antwum ne nkuuikom ignu ne ewuo, mpi okagni ndagni wog eveang-evang. Enagn eli Pake e Yaweh. ¹² Yaweh atuba ndenden: "Otshuu onagn, ayaleg me ne buu e Ejipiti, mby ayadjag me aman ankeankum a nsom eteangne buu e Ejipiti, yim ko vear tii wagnam iwo, mpi ayabag me ewu e wanzeam inkum i Ejipiti; me ndi Yaweh. ¹³ Aluung anagn ayayiawo kidimu ne mvuru ignu, yug ntiyen aluung, mby asileg me ko mpama, kaku ata ndola emog e ewa eyalog ya gnu ve. ¹⁴ Ayasagnukir vii a eshuu enagn, ayakiakagnu okina onagn djwi na lokumu e Yaweh, ayakiakagnu okina eshuu enagn enkum esakum onkwon o mvwe na mvwe djwi na aman agnu. ¹⁵ Ayakiegnu nshuu ishambia, olelakagni ko mampa itotsug wo ete. Ko ne eshuu enteang enagn, ete e mampa epikug mfiyia ne mvuru ignu ve, djwi wur enkum esila mampa imitsug wo ete, yim eshuu enteang tii ne nshuu ishambia, ayolimasu ne kati aman Israel. ¹⁶ ayayiawo na esangu e santu, ti eshuu ishambia, ayayiawo na esangu e santu. Opayakiangi ata otshia ve ne nshuu inagn. Wur na wur asikug nde ndeam vim asilande. Enagn otshia eyakug gnu nkie. ¹⁷ Ayakiakagnu mpi okina o mampa ikwon ete, djwi enagn eli eshuu eyipur me ayer-nkuu agnu ne buu e Ejipiti, ayasagnu kir eshuu enagn esayia onkwon o mvwe na mvwe ya aman agnu. ¹⁸ Ne ngwon enteang, ne nshuu djum na inign, epiyekwo, ayalakagnu mampa ikwon ete tii ko epiyekwo e eshuu omab n'emog. ¹⁹ Ne nshuu ishambia inagn, ete e mampa epikug mfiyia ne mvuru ignu ve, ogniang wur enkum esila mampa imiyam n'ete, ayolimawo ne kati e aman Israel, ata ongingien, ata nkea wiya. ²⁰ Opayalagni ve mampa imiyam n'ete ne epeang egnu, ayalagnu ko mampa itotsug wo ete.'" ²¹ Mby Moize s'aviinde antsuru a Israel, akaba ndenden: "Tshwagagni, veyagni wagnam ignu djwi na vear a epeang egnu enkum, mpi djagagni djwi na okina o pake. ²² Mby oveyagni obuye e nkay, otubagni ne ilongo aluung anagn, mby okwiagni ne ibaya idzug ti ne abaya ape ali ngiyima ne epfug evuru; okwiagni aluung ali n'ilongo ininen enagn, tii ko eyakeam vuna, kaku wur eyakug mpwe nelien ve. ²³ Ntangu esileg Yaweh djwi na ndjag aman a Ejipiti, asiyen nde aluung ne abaya ape a ngiyima ti ne ibaya idzug epfug evuru, asilenga nde, apakie ata vim ve, apapea mbug ve ya wanzio eledjag na nshwe ne mvuru ignu djwi n'ondjagagni. ²⁴ Ene eli onkwon ognu eyakiakagnu mvwe na mvwe djwi na gnu ti aman agnu. ²⁵ Ntangu eyashwegnu ne buu esopeagni Yaweh, oshin omisila nde, ayakiakagnu ko oshin onagn. ²⁶ Mby yug aman agnu watoyueagni wuwun: 'Vii akiegnu ane eling ntuba nge?' ²⁷ ayakearagnu gnugnun: 'Eli empeab e Pake djwi na lokumu e Yaweh, asab nde mvuru aman Israel ne Ejipiti, asadjag ko aman a Ejipiti, kansi avuga mvuru isu. Vear s'ababiwo ne nteang e Yaweh, wafukama. ²⁸ Mby aman Israel s'akien wo, wakie ko oshin oyitubi Yawehya Moize ti Aaron, wakie vii awo anagn. ²⁹ Ne ngnina otshuu, Yaweh s'adjag nde aman ankum a nsom eteang e Ejipiti, yim ko mon e nsom eteang e Faraon emigneme ne nkway ende ekub tii ko nsom eteang e wur e bolog ende, mpi ti wansom eteang e wagnam. ³⁰ Faraon abiy otshuu onagn, nde ti vear ande otshia, ti vear ankeankum a Ejipiti, ogniang kaku ata evuru emog ve eyikwon odjuu. ³¹ Otshuu onagn, Faraon s'aviinde Moize ti Aaron, atuba nda wo ndenden: "Yimagni, pueagni ne buu eme, na gnu, na aman Israel. Tshwagagni, osamagni Yaweh oashin oyitubikignu. ³² Veyagniameme agnu ti wangombe ignu, tshwagagni oshin oyitubikignu, mby onsampeagni me lusakumuna." ³³ Vear a Ejipiti wakub aman Israel na nkagni mpwe eveang-eveang ne buu ewo, ogniang atubikiwo wuwun yug kaku, wankeankum asishir wo ewa. ³⁴ Aman Israel wavey poto-poto iwo i mampa ikwon ete. Watsug ne ileam iwo, mby s'avariwo ne nsiam apag. ³⁵ Aman Israel s'akiwo ko oshin oyitubi Moize, mby s'aling wo alongo a iwuu ti alongo a wolo, ti ileam. ³⁶ Yaweh akie djwi aman Israel waviy ngrasia ne viy a vear a Ejipiti, s'atshiwo ngwigna vim ya wo. Mpi washira vear a Ejipiti vim awo ankum. ³⁷ Aman Israel s'alim wo ne Ramsesi, watsa Sukoti etitign e ampeam awug nkama isom, yug okatanga ti aman. ³⁸ Oluy o vear amuu wakayia vear a Israel ve atshiwo ti wo, ayiwo na wagnam iwoentsign, ameme ti wangombe. ³⁹ Wakie minkati na poto-poto iyikiwo ikwon ete, poto-poto iyivey wo ne Ejipiti, djwi akmiwo ne buu e Ejipiti djwi wakwon mfiyia etean, mpi wakavey ata vim a nda ne mbug ve. ⁴⁰ Epier e aman Israel ne buu e Ejipiti ayiwo mvwe nkama emog na osar. ⁴¹ mby ne nsuka e mvwe nkama inign n'osar inagn, eshuu enagn, ayer-nkuu ankeankum a Yaweh s'apwiwo ne buu e Ejipiti. ⁴² Enagn eli otshuu oyakiakawo okinadjwi na lokumu e Yaweh, djwi ndug wur eyapur ne buu e Ejipiti otshuu onagn, aman ankum a Israel ti aman ayawurakawo ayakiakawo okina djwi na lokumu e Yaweh. ⁴³ Yaweh atuba nda Moize ti Aaron ndenden: "Yenagni vim efwetegnu nkiaka djwi na Pake: Kaku ata ongingien emog ve eyala ti gnu. ⁴⁴ Mpfumi emishum gnu n'ekri, yug otibagagni djuung inde mby asiyiande nda ti gnu. ⁴⁵ Wur epier nda gnu, ti ongingien wapala ve. ⁴⁶ Ayalagnu olio o pake ko neti e evuru. Opapuragni ata oky emog nelien ve mpiopamogagni wuu na akaag ve. ⁴⁷ Aman ankeankum Israel ayakiegnu okina o Pake. ⁴⁸ Yug ongingien epier nda gnu aling nda olio o pake e Yaweh, wafwete mbag djuung ompeam onkum eli ne opeang onde, mby asivanga nde ondii oli gnu djwi na nkie okina, mpi asikum nde kamsi nkea wiya, kansi wur enkum etobag wo djuung ve, apala Pake ve. ⁴⁹ ko onkwon omog onagn eyayia djwi na ankea wiya ti angingien alepier ne kati egnu." ⁵⁰ Aman ankum a Israel s'akiwo ko oshin oyitubi Yaweh nda Moize ti Aaron, wakie ko ngwign. ⁵¹ Ko eshuu enagn mpi, Yaweh s'apurnde aman Israel ne buu e Ejipiti na ayer-nkuu awo.