¹ Yaweh atuba nda Moize ndenden: ² "Ompi mon enkum e nsom eteang, mon enkum e msom eteang ne kati aman Israel, ti aman a vear, ti aman a wagnam, watikum imime." ³ Moize atuba nda aman Israel ndenden: "Kanagni eshuu e luo ene, eyipwignu ne buu e Ejipiti, ayikignu ampfumi mby Yaweh opuragni nde na biu ewuo ende, opayalakagni ve mampa imitsug wo ete e ngiyam. ⁴ Olapueagni luo ene, ne ngwon e antu. ⁵ Ntangu eyoshueragni Yaweh ne buu e Kanaana, e vear aHeth, e vear aAmore, e vear a Hevi, ti e vear a Yebusi, buu eyisili nde na mpea ya atea agnu, mabele ti vir a mpag ilekri soro-soro neti, ayakiakagnu ko oshin one ne ngwon ene djwi na Yaweh. ⁶ Nshuu ishambia, ayalakagnu ko mampa ikwon ete e ngiyam, mby ne eshuu ishambia enagn, ayakiakagnu okina djwi na Yaweh. ⁷ Ayalakagnu mampa ikwon ete tii ko nshuu ishambia, wapikug ngyen mampa ili na ete ne mvuru ignu ve, ne buu egnu enkum opfugn. ⁸ Mby ayakabagnu aman agnu gnugnun: 'Sikea nkana vii ayikii Yaweh djwi na su, ntangu eyitepur nde ne buu e Ejipiti. ⁹ Djwi na yie, ene ayayiawo kidimu emog ne ewuo eyie, mpi vim emog ne vy ayie eyakanaka yie, djwi nsiku i Yaweh isayia ne odzum oyie, ogniang opuragninde ne buu e Ejipiti na biu ewuo ende. Ofwete ndemfuka na onkwon one mvwe na mvwe, yug ntangu ewo etikug. ¹¹ ntangu eyoshweragni Yaweh ne buu e Kanaana oshin oyisili nde, ya gnu ti atea agnu, mby ntangu eyopeagni nde wog, ¹² ayapeagnu Yaweh aman agnu ankum a nsom eteang, ata aman anteang ne wagnam iyayiagnu na wo, aman ampeam ankum wali djwi na Yaweh. ¹³ Ayakeagnu nshum mon enkum e mpunda e wum, osongagni na imeme i wum, mby yug okakea nshumagni mon e mpunda enagn ve, buyagni nde mby-ote. Ayakeakagnu nshum mon enkum e nsom eteang ne kati e aman agnu apeam. ¹⁴ Yug mon yie atoyue eshuu emuu ndenden:'Enagn eling ntuba nge?' ayokeara yie yeyen: 'Yaweh atepur nde na biu ewuo ende ntangu eyikisu ampfumi ne buu e Ejipiti, ¹⁵ mpi ne oshin oyikike Faraon ote biu, akaleangaka ve atesiangi sikien, Yaweh s'adjag nde aman aman ankum a nsom eteang ne buu e Ejipiti, yim ko nsom eteang e vear tii nsom eteang e wagnam. Wog enagn epeasu empeab ene ya Yaweh, aman ampeam a nsom eteang ankum ne kati e aman asu.' ¹⁶ Enagn ayayiawo kamsi kidimu emog ne ewuo eyie, kamsi okanu ne vy ayie; ogniang eli na biu ewuo ende, Yaweh atepur nde ntangu eyikisu ampfumi ne buu e Ejipiti." ¹⁷ Faraon ntangu emisianga nde aman Israel na mpwe, Nzeam akaavara ve ne mbug e wiya e waFilistia, ata ayiwo mbug e ngibag, djwi Nzeam atubinde ndenden: "Aman Israel asikug wo nshima itura ntangu esiyenakawo wa mbaagn, asikeawo ntsa Ejipiti." ¹⁸ Kansi Nzeam akiinde aman Israel idjinga ne mbug e buu e zelo, etay e nzey e kwi. Aman Israel s'alim wo ne buu e Ejipiti na eta na vign. ¹⁹ Moize s'avey nde viyu i Yozefo, djwi Yozefo asilinde nda man Israel ndenden: "Nzeam ayayiande ondiragni mpi, ayavey gnu viyu ime ilim, itsu etey n'ondii one." ²⁰ S'alim wo ne Sukoti, watsa nkwung ne Etam, ne nsuka e buu e zelo. ²¹ Yaweh aletshikinde nteang ewo, mbiiy enkum ne edjinga djwi na ndag mbug, mby otshuu onkum ne ekb e tshiya djwi na mpea wo oveanga, mby s'alekienikiwo na mbiiy, na otshuu. ²² Yaweh akalimaka ne nteang ewo ve, ne edjinga mbiiy enkum, ata ekb e tshiya enagn ekalimaka ve otshuu onkum.