¹ Yaweh atuba nda Moize ndenden: ² "Kaba aman Israel, watshim, watsu nkwungne nteang e Pi Hairoti, ne ngnina e Migdol ti e nzey, ne nteang e Baal Zefon; eli wog ne nteang e ondii onagn esitsagnu ngya, mbeama na nzey. ³ Faraon asituba nde djwi na aman Israel ndenden: 'Watijinga ne mbug e zelo.' ⁴ Asitshung me etura e Faraon, mby asisande adjie wo; kansi Faraon ti ayer-nkuu ande ankeankum asiyegne wo lokumu eme, mby vear a Ejipiti asijiawo wuwun me, ndi Yaweh." Aman Israel mpi wakie ko oshin onagn. ⁵ Watsa nkaba nkum e Ejipiti wuwun aman Israel watilur. Mby etura e Faraon ti e vear ande otshia etshim etay e aman Israel. Watuba wuwun: "Nge emikiesu ene, djwi na nsianga aman Israel wakien, sipafivea vear akie etshia ve?" ⁶ Mby Faraon awong mpunda ende, s'avey nde vear ande. ⁷ Avey wampunda i ayer-nkuu nkama isom, ti wampunda inkeankum ili ne Ejipiti. Ne wampunda inagn, ayiwo ko na ayer-nkuu neti djwi na ndua mbaagn. ⁸ Yaweh atshung etura e Faraon, nkum e Ejipiti mby nkum enagn s'asande djieaka aman Israel. Aman Israel apwiwo mbwo ne dzug. ⁹ Vear a Ejipiti wasadjie; wampunda inkeankum ti ayer-nkuu ande ankeankum, watsamvea wo watikum mbeama na nzey, etay e Pi Hairoti ti ne nteang e Baal Zefon. ¹⁰ Ntangu emikum Faraon mbeama na wo, aman Israel wasiang vy awo, wayen vear aEjipiti waleseye mby ewo. Mby aman Israel wayug womo entsign, wadzama eie etay e Yaweh. ¹¹ Watuba wa Moize wuwun: "Nge ne Ejipiti ekayia na aluma ve, emitevara yie siye ngwa ne buu e zelo nendien? ¹² Ene epa vii ayokabikisu ne Ejipiti susun: 'Sianga siyi ata ampfumi a vear a Ejipiti, djwi sileang wuo siyi ata ampfumi awo kansi epa djwi siye ngwa ne buu e zelo nendien ve." ¹³ Moize akeara aman Israel ndenden: "Oyaluragni vim emog ve, yiagni ko kog, mpi liragni oshin esovugagni Yaweh luo ene. Djwi vear a Ejipiti eyen gnu luo ene, opafi ayenagni diaka ve. ¹⁴ Yaweh asiluande mbaagn djwi na gnu, kansi gnu, yiagni ko puo." ¹⁵ Mby Yaweh akaba Moize ndenden: "Moize, djwi na nge ekiegnu oshuru ngean? Kaba aman Israel wakien. ¹⁶ Yie, siang ikom iyie dzug, shima ewuo eyie ne dzug i nzey, mpi bag wog itign ipe, mby aman Israel asishue wo ne ngnina ondii omiyum nzey. ¹⁷ Mby me, asitshung me itura i vear a Ejipiti ene, djwi wo mpi wasashue ne mby ewo, mby Faraon ti ayer-nkuu ande ankeankum, wampunda inde ti vear ali neti, asiyegne wo lokumu eme. ¹⁸ Mby vear a Ejipiti asijiawo wuwun me, ndi Yaweh ntangu esiyegne Faraon ti wampunda inde, ti ayer-nkuu ande lokumu eme." ¹⁹ Wazio e Mzeam eletshike ne nteang aman Israel, asayia ne mby ewo, mpi ti edjinga eyike nteang ewo, etsa, esayima ne mby ewo. ²⁰ Esayima ne ngnina e vear a Ejipiti ti aman Israel. Edjinga enagn akum wo etay emuu mpib, etay emuu epea oveanga otshuu onkum. Wog enagn, vear a Ejipiti wakayia na mpila evanga wo ve mbeama na aman Israel otshuu onagn opfugn. ²¹ Moize s'ajir nde ewuo ende ne dzug i nzey. Mby Yaweh atum opepe emog e biu eyim etay epwe vuna, otshuu onagn opfugn, nzey eyum, esug itign ipe. ²² Aman Israel s'ashwikiwo ne ngnina e nzey ngiyum, vay atsug epy ne wum ewuo ti ne wear ewuo. ²³ Vear a Ejipiti mpi wasadjie, wampunda i Faraon ti vear ali neti wasashwe ne ngnina e nzey, ne mby ewo. ²⁴ Ne suka enagn, ne kati e edjinga ti tshiya enagn, Yaweh alir etay eli vear a Ejipiti, ashwer oshuru etay ewo. ²⁵ Alima wapini i ikaru iwo, mpi ekafikienaka wuo ve. Mby vear a Ejipiti watuba wuwun: "Siluragni aman Israel ene, djwi Yaweh ali etay ewo, alua mbaagn ine nda su." ²⁶ Yaweh atuba nda Moize ndenden: "Shima ewuo eyie ne dzug i nzey, mby vay asikeawo ondii omog, asidzub wo vear a Ejipiti ti ikaru iwo, ti vear ali ne wampunda." ²⁷ Moize mpi ashima ewuo ne dzug i nzey. Ne suka enagn, nzey ekea nkir opepe, mby Yaweh atsigna vear a Ejipiti ne ngnina e nzey. ²⁸ Vay akea ondii omog, mpi wampunda, ikaru ti ayer-nkuu ankeankum a Faraon ayishwi ne ngnina e nzey, ne mby e aman Israel wadzig ne vay, kaku ata emog eyivug ve. ²⁹ Aman Israel asab wo ndzum ne ngnina e nzey, vay atsug wo epy ne wum ewuo ti ne wear ewuo. ³⁰ Eshuu enagn, Yaweh avuginde aman Israel ne m,bwo i vear a Ejipiti, mpi aman Israel wayen ne nky emuu enagn, oshin owa vear a Ejipiti. ³¹ Aman Israel ayen wo biu e ewuo e Yaweh eyitag nde vear a Ejipiti. Mby vear s'ayug wo womo e Yaweh, mby s'adjir wo Yaweh ti wur ende otshia Moize.