1
Yaweh atuba nda Moize ndenden:
2
"Kaba aman Israel, watshim, watsu nkwungne nteang e Pi Hairoti, ne ngnina e Migdol ti e nzey, ne nteang e Baal Zefon; eli wog ne nteang e ondii onagn esitsagnu ngya, mbeama na nzey.
3
Faraon asituba nde djwi na aman Israel ndenden: 'Watijinga ne mbug e zelo.'
4
Asitshung me etura e Faraon, mby asisande adjie wo; kansi Faraon ti ayer-nkuu ande ankeankum asiyegne wo lokumu eme, mby vear a Ejipiti asijiawo wuwun me, ndi Yaweh." Aman Israel mpi wakie ko oshin onagn.
5
Watsa nkaba nkum e Ejipiti wuwun aman Israel watilur. Mby etura e Faraon ti e vear ande otshia etshim etay e aman Israel. Watuba wuwun: "Nge emikiesu ene, djwi na nsianga aman Israel wakien, sipafivea vear akie etshia ve?"
6
Mby Faraon awong mpunda ende, s'avey nde vear ande.
7
Avey wampunda i ayer-nkuu nkama isom, ti wampunda inkeankum ili ne Ejipiti. Ne wampunda inagn, ayiwo ko na ayer-nkuu neti djwi na ndua mbaagn.
8
Yaweh atshung etura e Faraon, nkum e Ejipiti mby nkum enagn s'asande djieaka aman Israel. Aman Israel apwiwo mbwo ne dzug.
9
Vear a Ejipiti wasadjie; wampunda inkeankum ti ayer-nkuu ande ankeankum, watsamvea wo watikum mbeama na nzey, etay e Pi Hairoti ti ne nteang e Baal Zefon.
10
Ntangu emikum Faraon mbeama na wo, aman Israel wasiang vy awo, wayen vear aEjipiti waleseye mby ewo. Mby aman Israel wayug womo entsign, wadzama eie etay e Yaweh.
11
Watuba wa Moize wuwun: "Nge ne Ejipiti ekayia na aluma ve, emitevara yie siye ngwa ne buu e zelo nendien?
12
Ene epa vii ayokabikisu ne Ejipiti susun: 'Sianga siyi ata ampfumi a vear a Ejipiti, djwi sileang wuo siyi ata ampfumi awo kansi epa djwi siye ngwa ne buu e zelo nendien ve."
13
Moize akeara aman Israel ndenden: "Oyaluragni vim emog ve, yiagni ko kog, mpi liragni oshin esovugagni Yaweh luo ene. Djwi vear a Ejipiti eyen gnu luo ene, opafi ayenagni diaka ve.
14
Yaweh asiluande mbaagn djwi na gnu, kansi gnu, yiagni ko puo."
15
Mby Yaweh akaba Moize ndenden: "Moize, djwi na nge ekiegnu oshuru ngean? Kaba aman Israel wakien.
16
Yie, siang ikom iyie dzug, shima ewuo eyie ne dzug i nzey, mpi bag wog itign ipe, mby aman Israel asishue wo ne ngnina ondii omiyum nzey.
17
Mby me, asitshung me itura i vear a Ejipiti ene, djwi wo mpi wasashue ne mby ewo, mby Faraon ti ayer-nkuu ande ankeankum, wampunda inde ti vear ali neti, asiyegne wo lokumu eme.
18
Mby vear a Ejipiti asijiawo wuwun me, ndi Yaweh ntangu esiyegne Faraon ti wampunda inde, ti ayer-nkuu ande lokumu eme."
19
Wazio e Mzeam eletshike ne nteang aman Israel, asayia ne mby ewo, mpi ti edjinga eyike nteang ewo, etsa, esayima ne mby ewo.
20
Esayima ne ngnina e vear a Ejipiti ti aman Israel. Edjinga enagn akum wo etay emuu mpib, etay emuu epea oveanga otshuu onkum. Wog enagn, vear a Ejipiti wakayia na mpila evanga wo ve mbeama na aman Israel otshuu onagn opfugn.
21
Moize s'ajir nde ewuo ende ne dzug i nzey. Mby Yaweh atum opepe emog e biu eyim etay epwe vuna, otshuu onagn opfugn, nzey eyum, esug itign ipe.
22
Aman Israel s'ashwikiwo ne ngnina e nzey ngiyum, vay atsug epy ne wum ewuo ti ne wear ewuo.
23
Vear a Ejipiti mpi wasadjie, wampunda i Faraon ti vear ali neti wasashwe ne ngnina e nzey, ne mby ewo.
24
Ne suka enagn, ne kati e edjinga ti tshiya enagn, Yaweh alir etay eli vear a Ejipiti, ashwer oshuru etay ewo.
25
Alima wapini i ikaru iwo, mpi ekafikienaka wuo ve. Mby vear a Ejipiti watuba wuwun: "Siluragni aman Israel ene, djwi Yaweh ali etay ewo, alua mbaagn ine nda su."
26
Yaweh atuba nda Moize ndenden: "Shima ewuo eyie ne dzug i nzey, mby vay asikeawo ondii omog, asidzub wo vear a Ejipiti ti ikaru iwo, ti vear ali ne wampunda."
27
Moize mpi ashima ewuo ne dzug i nzey. Ne suka enagn, nzey ekea nkir opepe, mby Yaweh atsigna vear a Ejipiti ne ngnina e nzey.
28
Vay akea ondii omog, mpi wampunda, ikaru ti ayer-nkuu ankeankum a Faraon ayishwi ne ngnina e nzey, ne mby e aman Israel wadzig ne vay, kaku ata emog eyivug ve.
29
Aman Israel asab wo ndzum ne ngnina e nzey, vay atsug wo epy ne wum ewuo ti ne wear ewuo.
30
Eshuu enagn, Yaweh avuginde aman Israel ne m,bwo i vear a Ejipiti, mpi aman Israel wayen ne nky emuu enagn, oshin owa vear a Ejipiti.
31
Aman Israel ayen wo biu e ewuo e Yaweh eyitag nde vear a Ejipiti. Mby vear s'ayug wo womo e Yaweh, mby s'adjir wo Yaweh ti wur ende otshia Moize.