¹ Mby Moize ti aman Israel washuwe Yaweh lim ene: watuba wuwun: "Ndashuwe lim djwi na Yaweh, ogniang atiyegne biu ende, atishina ne nzey, mpunda ti wur emigneme ne dzug iwo. ² Yaweh ali biu eme, mpi wur efwete me mpea lokumu, eli ndug wur emimvuga. Ali Nzeam eme, ayopeaka me lokumu, ali Nzeam e tea me, ayopeaka me lokumu. ³ Yaweh ali wur e biu elua mbaagn, dzin inde Yaweh. ⁴ Atitwomo ne nzey, ikaru i Faraon ti ayer-nkuu ande; ayer-nkuu ande a biu watidzig ne nzey e kwi. ⁵ Mbing e vay etadzub, watidzig tii ne ngie e vay, kamsi itari. ⁶ Wum ewuo eyie, Yaweh, etiyegne biu ende, wum ewuo eyie, Yaweh, etibuye mbeni. ⁷ Ne onen ekub eyie, otilogo wambeni, otipur nkier iyie: nkier iyie itabwo wo tshiya kamsi elieng. ⁸ Ko n'opepe epwe ne atwunu a mbwomo ayie, mbing e vay etitsug atura, mbing e vay etiyima kamsi epy, vay atidzima biu ne ngnina e nzey. ⁹ Mbeni atubikinde ndenden: 'Ndasalana, asaveame, asakuma me vim awo, asikearame mbela e biu, asinang me opien e vur epe, ewuo eme asadjag wo.' ¹⁰ Otifebe opepe na elim eyie: nzey etadzub, watidzig kamsi ewuu, tii ko ne ngie e vay. ¹¹ Nagn eli kamsi yie ne kati e wanzeam ine, Yaweh? Nagn elenga na wuo, osantu kamsi yie, ekug na lokumu, ekie bidimu? ¹² Otishima wum ewuo eyie, buu etamign wo. ¹³ Na ngy eyie, otivara vear ane, otavuga, na biu oyie s'elavariyie etay eli evuru eyie e santu. ¹⁴ Vear wajii, mpi wayii na ekukuma: womo ekir vear a Filistia; ¹⁵ Ankum a Edomi wayii na womo; ekukuma evey vear a lua mbaagn i buu e Moab, vear apier ne buu e Kanaana walog wankeankum. ¹⁶ Womo asavey wo na biu e ewuo eyie, asitshung wo edzum ewo kamsi itari, tii ko esishir ndeg vear ayie, Yaweh! Tii ko esishir ndeg vear ayie, vear ayisoon yie. ¹⁷ Ayavara yie vear ayie mpi ayatsug yie ne dzug ombimi e oleamanzo eyie, ne ondii oyiwong yie djwi na gneme, Yaweh! Ne ondii o santu, Nkum! eyikii yie na mbwo iyie. ¹⁸ Yaweh ayayiande Nkum mvwe na mvwe, mpi otshwag-otshwag." ¹⁹ Ogniang wampunda i Faraon, ti vear amikwuna neti watishwe ne nzey, mby Yaweh atikeara vay a nzey ayim etay n'etay etadzub; kansi aman Israel watikien ne ngnina e nzey ngiyum." ²⁰ Ngunsa onkear, Maria, nkignam e Aaron, avey ngom emogne ewuo ende, alebur, mby ankear ankeankum wayia ne mby ende, ti wangom mpi, walekaagn. ²¹ Maria akearinde mvutu ya aman Israel ndenden: "Shweagni lim djwi na Yaweh, ogniang atiyegne nkembo ende, atitsigna mpunda ti wur emikwuna ne dzug iwo, watidzig ne nzey." ²² Moize s'aliminde aman Israel ne nzey e kwi. S'avey wo mbug e buu e zelo e Shur, mpi ne mby e ekien e nshuu isar ne buu e zelo enagn, wakayen ata vay a gnua ve. ²³ Watsankum ne Mara, kansi wakakug na gnua vay a Mara ve, djwi vay awo ayiwo oluu. Wog enagn eyipiiwo ondii onagn dzin i Mara. ²⁴ Vear wagnie djwi na Moize, watuba wuwun: "Asignuasu nge?" ²⁵ Moize s'adzaminde etay e Yaweh, mby Yaweh s'olag nde oshung omog, atwomo oshung owo ne vay, mby vay awo ekea nkum wuo. Enagn wog ondii oyipii Yaweh enkwon ti ilag, ko ondii onagn mpi eyitesi nde aman Israel. ²⁶ Atuba ndenden: "Yug owung ngyug wuo-wuo otuba o Yaweh Nzeam eyie, yug omikie vim eli ne mbug e wuo ne vy ande, yug omileang itii ne enkwon ende, mpi yug omikir wansiku inde inkeankum, mpayodjag ata na nkeang emog ve oshin oyidjagikime vear a Ejipiti; ogniang me ndi Yaweh etsaomvuga yie na nkeang." ²⁷ Watsankum ne Elim, ondii oyi nto i vay djum na ipe ti ava ashambia, s'agnemiwo kog, mbeama na vay anagn.