¹ Aman Israel s'alim wo wankeankum ne Elim wakum ne buu e zelo e Sin, eli etitign e Elim ti Sinai, eshuu e djum na itean ne ngwon ozole emipwewo ne buu e Ejipiti. ² Aman Israel, wankeankum, wagnie etay e Moize ti Aaron. ³ Aman Israel watuba ya wo wuwun: "Djwi na nge Yaweh akatedjag nde ne buu e Ejipiti, ntangu eyikisu mbeama na wampuug eky, ntangu eyilikisu mampa siyur? Djwi, otitevaragni ne buu e zelo nendien djwi otedjagagni na nziya, oluy o vear ane ankum." ⁴ Yaweh s'atubinde nda Moize ndenden: "Yen, mean ndatwomo mampa djwi na gnu, mampa iyim dzug olung. Vear ayapweakawo, watongike konso eshuu, oluy o mampa oshin osileang wo, djwi matesi na ndir, yug ayakienakawo ne nsiku ime to kaku. ⁵ Ne nshuu isom, ntangu eyawung wo nda mampa imitongo wo, ayayenakawo oluy i mampa imitongowo eshuu n'eshuu etiyuo mbala ipe." ⁶ Moize ti Aaron s'akabiwo aman Israel ankum wuwun: "Ekwo e luo ene, asijiagnu gnugnun eli Yaweh wur eyopuragni ne buu e Ejipiti. ⁷ Nampign ne suka, ayayen gnu nkembo e Yaweh, djwi atiyug emignie gnu etay ende; ogniang su, sili vim nge djwi gnu ogniagni ne nteang esu?" ⁸ Moize atuba ndenden: "Yaweh asopeagni nde eky esilagnu, mby nampign ne suka, mampa. Ogniang Yaweh atiyug ignie ignu djwi na nde, su ko sili wanagn? Okagniagni djwi na su ve, eli djwi na Yaweh." ⁹ Moize akaba Aaron ndenden: "Kaba aman ankeankum Israel yeyen: 'Vangagni mbeama na Yaweh, djwi nde, atiyug ignie ignu.'" ¹⁰ Ntangu eyitubike Aaronnda aman Israel, wankeankum, watshima elung etay e buu e zelo, wayen nkembo e Yaweh epwe ne mafuba. ¹¹ Yaweh atuba nda moize ndenden: ¹² "Ntiyug ignie aman Israel. Kabawo, ne ngnina otshuu one, asilagnu eky. Mby ne suka, asilagnu mampa, mby asijiagnu gnugnun ndi Yaweh, Nzeam egnu." ¹³ Epiekwo, wamfuru iviewo Kay, ikra, idzub buu ondii onagn onkum, mpi ne suka enagn, buu ebura vay, edjing ondii onkum oyikiwo. ¹⁴ Ntangu emiyum vay anagn, ne ngnina e buu e zelo enagn, vim amog apwe kamsi mbeam, vim amog kamsi mvuye, atari ne dzug i buu. ¹⁵ Aman Israel walir vim awo, watuba wog na wog wuwun: "Egni ko nge?" Ogniang wakajiaka vim ewo ve. Mby Moize s'atubinde ndenden: "Eli mampa imopeagni Yaweh djwi na nda. ¹⁶ Yugagni vii amituba Yaweh ndenden: 'Wur na wur atongi ne oshin osikug nde djwi na nda. Esag emog ya wur emog, ne isuu i vear alignu na wo: wur na wur atongi djwi na vear alinde nda wo ne mvuru ignu i kapo..'" ¹⁷ Aman Israel wakie mpi ko oshin onagn; watongo wog, amuu wavea entsign, amuu wavea okieg. ¹⁸ Mby s'ayerikiwo ne esag, wur eyitongi entsign, ekashuna ya nde ve, mpi wur eyitongi okieg akakwon vim ve. Wur na wur atonginde vim ekug na olio onde. ¹⁹ Moize akaba wo ndenden: "Kaku wur eyasasugn wog ekeami vuna ve." ²⁰ Wakayug Moize ve, vear amuu wasasugn, ekeama vuna, kansi etsug mfuya, epwon. Moize ayug nkier nda vear anagn. ²¹ Konso suka, wur enkum atongikinde ne oshin okug nde djwi na olio onde, mby ntangu esipwe mbiiy, ebani nkiye. ²² Ne nshuu isom, watongo djwi na nda, oluy o mampa eyer isag ipe-ipe ya wur emog. Ankum a aman Israel wayia nkaba Moize. ²³ Mby Moize atuba nda wo ndenden: "Eli oshin oyitubi Yaweh. Nampign eli eshuu eyor vear, eshuue obing djwi na Yaweh. Yug oling mfumagni, fumagni; yug oling ntokisagni, tokisagni; mby ikab isisatsuga, wumagni tii ne suka." ²⁴ Wasawum wog tii ne suka enagn, oshin oyitubi Moize, mpi ekapwon ve, ekatsug ata mfuya ve. ²⁵ Moize s'atubinde ndenden: "Lagni wog luo ene, ogniang eli eshuu e obing, opayenagni wog luo ene ve. ²⁶ Ayatongakagnu wog nshuu isom, kansi ne eshuu ishambia, eli eshuu e obing, epayayia na wo ve." ²⁷ Eshuu e ishambia, vear amog-amog wapwe djwi na ntongo wog, wakavea ve. ²⁸ Mby Yaweh atuba nda moize ndenden: "Tii nsuka nonkagn eyatunakagnu na ndemfuka na wansiku ime ti enkwon eme? ²⁹ Kiragni gnugnun Yaweh amopeagni eshuu e obing djwi oyoragni; wog enagn emopeagni nde ne eshuu isom, vim anda djwi na nshuu ipe. Wur na wur afwte nsatsuga ko ne ondii oli nde, mpi wur apikug mpwe ve ne ondii oli ndene eshuu ishambia." ³⁰ Mby vear s'ayorikiwo eshuu ishambia. ³¹ Aman Israel s'apiwo vim elawo enagn dzin iwo Mana. Ayikiwo yug olir, kamsi ebeam e .....(coriandre), ayiwo djuung iwo siy, nsaa kamsi enkata emitsug wo mpag. ³² Moize atuba ndenden: "Yugagni vii amituba Yaweh: 'Esag emog e ngiyuo na mana osawumagni wog djwi na aman ayasawur gnu mby, djwi wayen mampa iyopeakagni me na nda ne buu e zelo ntangu eyopuragni me ne buu e Ejipiti.'" ³³ Moize akaba Aaron ndenden: "Vey ilongo imog, yura na mana kiteso e esag emog, ky wog ne nteang e Yawehdjwi awum wog djwi na aman ayasawur gnu mby." ³⁴ Ko oshin oyitubi Yaweh nda Moize, Aaron mpi akywog ne nteang e ntiegn, djwi wasawum kog. ³⁵ Aman Israel wala mana inagn mvwe onign, tii ko eyikum wo ne buu emog eyipierike vear, wala mana tii ko eyikum wo ne onduu o buu e Kanaana. ³⁶ Opeane, esag emog eli ikab imog ne akab djum (Epha).