¹ Itwung aman Israel enkum s'alim wo ne buu e elo e Sin, oshin oyakabi Yaweh na nkien; watsa ngya ne Refidim, kog, vear wakavea vay a gnwa ve. ² Mby vear s'abin wo oshuru wa Moize, watuba wuwun: "Otepiagni vay a gnwa." Moize akeara ndenden: "Djwi na nge embina gnu me oshuru? Djwi na nge etesagnu Yaweh?" ³ Kog, vear ayiwo na mpwi e vay biu, wagnie djwi na Moize. Watuba wuwun: "Djwi na nge eyitepur yie ne buu e Ejipiti, eli djwi oyite djag na mpwi e vay, ti aman asu, ti wagnam isu?" ⁴ Moize adzama etay e Yaweh ndenden: "Nge esikieme djwi na vear ane? Kaku etean ve, nendien, asimbug wo atari." ⁵ Yaweh atuba nda Moize ndenden: "Leg ne nteang e vear ankeankum, mpi vey antsuru a Israel, ne ewuo eyie, kir ikom iyinang yie ne nzey, tshwagagni. ⁶ Yen, me , asiyiame nteang eyie, ne itari Horeb, asinang yie itari inagn, mby vay asipwewo, mpi vear asignwua wo." Mby Moize akie mpi ko oshin onagn, ne nteang e antsuru a Israel. ⁷ Apea ondii onagn dzin iwo Masa ti Meriba ogniang aman Israel atsug wo esiy, mpi djwi atesiwo Yaweh, wuwun: "Nge Yaweh ali ne kati esu, to kaku nde ve?" ⁸ Vear a Amaleke wayia ntean aman Israel mbaagn ne Rifidim. ⁹ Mby Moize s'atubinde nda Yozue ndenden: "Otesoni vear, tshwag ya wo, olwagni mbaagn ti vear a Amaleke, me, nampign ayayiame ne nsor ombimi, na ikom i Nzeam n'ewuo." ¹⁰ Yozue mpi akie ko oshin oyitubi Yaweh nda nde, djwi na ntsa ndwa mbaagn nda vear a Amaleke. Mby Moize, Aaron ti Hur s'avean wo ne dzug ombimi. ¹¹ Ntangu esijir Moize mbwo ne dzug, aman Israel wakum biu entsign; mpi ntangu esikra mbwo inde, vear a Amaleke wakum biu entsign. ¹² Ntangu emilem mbwo i Moize, s'avey wo itari, wotsuga ngie, mby agneme ne dzug iwo. Aaron ti Hur s'okir wo nde ne mbwo, emog akir ne ewuo emuu, emuu egni akir mpi ewuo emuu, mby mbwo inde idzima biu, tii ko eyijii vuna. ¹³ Mby Yozue s'anunginde vear a Amaleke, na ompien onde e vur epe, e mpia. ¹⁴ Yaweh atuba nda Moize ndenden: "Fugn vii ane ne onkeana, djwi okwon njingagni, mpi kaba Yozue yeyen ayabvuo me vear a Amaleke ne ontwong ognu ne buu ene." ¹⁵ Moize s'atwung nde kunda emog kog, apea dzin iwo "Yaweh ali sombolo eme." ¹⁶ Atuba ndenden: "Ogniang ajir wo ewuo tii ko ne nkway ekub e Yaweh, asiyiawo mbaagn i Yaweh nda vear a Amaleke, i ndwong na ndwong iyasayia mby."