¹ Yetro, okiu e Moize, nganga-Nzambi ne Madian, ayug vii ankeakum ayiki Nzeam djwi ya Moize ti aman Israel, vear ande, ayug ndenden Yaweh amipur aman Israel ne buu e Ejipiti. ² Yetro, okiu e Moize, avey Sefora, wear e Moize eyilimi nde ne ivea. ³ Avey mpi aman ampeam ape e Sefora; emog dzin inde Gershom, ogniang Moize atubinde ndenden ndapier ne buu angingien." ⁴ Emuu dzin inde Eliezer, djwi atubinde ndenden: "Nzeam e tea me atinsarisa, mpi atindima ne ompien e vur epe e Faraon." ⁵ Yetro, okiu e Moizes'ayinde ti aman a moize ape anagn, ti wear e Moize, ne buu e zeloondii oyinde, ne ombimi e Nzeam. ⁶ Atum wur na nkaba Moize ndenden: "Eli mug okiu yie Yetro, ndeye etay eli yie, ti wear yie ti aman nde ampeam ape." ⁷ Moize apwe ne nteang e okiu nde, ababa mpi opea mwa. Wayue wur na wur esing, mby s'ashwiwo ne evuru e kapo e Moise. ⁸ Moize akaba okiu nde vii ankeankum ayiki Nzeam etay e Faraon ti vear a Ejipiti djwi na aman a Israel, mpay inkum iyilog ya wo ne mbug, ti oshin oyalimi Yaweh na mpay inagn. ⁹ Yetro ayinde n'osiang na vii ankum ayikii Yaweh ya aman Israel, ti n'oshin eyavugi nde ne mbwo i vear a Ejipiti. ¹⁰ Mby Yetro atuba ndenden: "Lokumu y Yaweh, emolimagni nde ne mbwo i vear a Ejipiti ti ne mbwo i Faraon; ndug wur emilima vear ande ne mbwo i vear a Ejipiti! ¹¹ Ntijia ntangu ene memen Yaweh ali onen, alenga wanzeam inkeankum, djwi ipwo i vear a Ejipiti itikeandog ko ya wo wemie." ¹² Yetro, okiu e Moize, akie empeab ya Nzeam> Aaron ti antsuru ankeankum Israel wayia nda ti okiu e Moize, ne nteang e Nzeam. ¹³ Mpimpign enagn, Moize agneme djwi na mbag ewu e vear, mby vear ankeankum wagneme nteang ende, yim suka tii epiyekwo. ¹⁴ Okiu e Moize, ntangu emiyen nde vii akie nde djwi na aman Israel, atuba ndenden: "Vim nge ekieyie ya vear ane? Djwi na nge emigneme yie yemie, mby vear ankeankum nteang eyie, yim suka tii epiyekwo?" ¹⁵ Moize akeara okiu nde ndenden: "Eli vear waleye etay eme djwi Nzeam akabi vii awo. ¹⁶ Yug wali na vii awo amuu, atsawo ngya ya me, mbag vii awo, mpi malag vii atuba Nzeam ti onkwon onde." ¹⁷ Okiu e Moize s'okabinde ndende "Ekie yie enagn, epa eli wuo ve. ¹⁸ Yemie asilem yie, mpi vear anagn asilem wo, djwi vii anagn elenga biu oyie, opakug wog yemie ve. ¹⁹ Ntangu ene, yug otuba ome; ndopea ilag, mpi Nzeam ayi nda yie. Yia ko wur ekaba Nzea vii a vear, vara vii awo ne nteang e Nzeam. ²⁰ Long wo vii ti onkwon o Nzeam, mpi lag wo mbug efwete wo ndana, ti vim efwete wo nkie. ²¹ Soon ne kati e vear ane, vear akug, vear alur Nzeam, vear awuo, vear ali mbeni e ndeang vim a vear, tsug wo wayii ankum a vear otean, ti ankum a vear djum. ²² Ntangu enkum, wabagike ewu e vear, wayike ne nteang eyie na vii a mfunu, mpi wemie wabagike ewu e vii a kieg-kieg. Tukalima odzuru etay eyie, wo mpi wavari odzuru onagn wa yie. ²³ Yug omikie oshin onagn, mpi yug Nzeam amotum na nkie djwi, enagn asikug yie, mpi vear ankeankum ane asikum wo wankeankum etay eletshiwo." ²⁴ Moize ayug otuba e okiu nde, akie mpi ko oshin oyitubinde. ²⁵ Moize s'asoon nde vear akug ne kati e aman Israel, mpi atsugankum; ankum a vear iwug, ankum a vear nkama, ankum a vear otean, ti ankum a vear djum. ²⁶ S'abagikiwo ewu e vear ntangu enkum, mby vii a biu-biu alevarikiwo ne nteang e Moize, mby wo, alebagikiwo vii a kieg-kieg. ²⁷ Moize s'asianginde okiu nde, mby s'akey nde ntsa wiya nde.