¹ Ne ngwon isar, ne mby emipwewo ne buu e Ejipiti, aman Israel wakum eshuu enagn ne ne buu e zelo e Sinai. ² Emilim wo ne Refidim, s'akum wo ne buu e zelo e Sinai, mby s'apier wo kog, walira na ombimi. ³ Moize s'avean nde ne ombimi etay e Nzeam. Mby Yaweh s'oviinde ne dzug ombimi, ndenden: "Kaba aman ali ne evuru e Yakob, aman Israel ngean: ⁴ Ayen gnu vii ayikime ne buu e Ejipiti, ti oshin eyovaragni me ne dzug apaab a nkuma-nkuma mpi movaragni tii eaty eme. ⁵ Opeane, yug olayugagni otuba ome, mpi yug owumagni alien ame, asiyiagnu vear ame ne kati e vear ankeankum, djwi buu ene opfugn eli eme. ⁶ Gnu, ayayiagnu djwi me, ne ekub e wanganga-Nzambi, okiri e santu. Yenaka, enagn wog otuba eyafwete yie nkaba aman Israel." ⁷ Moize s'avindeantsuru a wiya, mby s'akabinde vii anagn ankeankum, oshin oyitubi Yaweh. ⁸ Vear ankeankum s'akeariwo wuwun: "Asikiesu vii ankeankum amituba Yaweh." Moize akeankaba Yaweh vii amituba vear ankum. ⁹ Mby Yaweh atuba nda Moize ndenden: "Yen asiyiame etay eyie, ne neti e ivim i mafuba djwi vear wayug ntangu esituba me ma yie, mpi watsugike ko ekaagn ya yie." Mby Moize akeankaba Yaweh vii amituba vear ankum. ¹⁰ Mby Yaweh atuba nda Moize ndenden: "Tshwag etay eli vear ankeankum, kabawo wayii osantu ne djuung iwo luo ti nampign, wasuy ileam iwo. ¹¹ Eshuu otatu, wawong wuo, djwi eshuu otatu Yaweh asikrande, ne vy a vear ankum, ne dzug ombimi e Sinai. ¹² Asitsug yie onduu ofwete ngyima vear mbeama na ombimi, asakaba yie yeyen: 'Osugagni, oyaveanagni ne ombimi ve, mpi oyakiragni ata ombimi ve. Wur enkum esikir ombimi one asiwande.' ¹³ Wapakir wur enagn ve, kansi asodjag wo na atari, to asobug wo vign: ata gnam ata wur apafivug ve. Ntangu esibug wo asig, asivanga wo mbeama na ombimi." ¹⁴ Moize akra yim ombimi, ayia etay eli vear, akaba vear na ngwum djuung iwo iyi osantu, wasuy mpi ileam iwo. ¹⁵ Mby s'atubinde nda vear ndenden: "Wongagni, ne nshuu isar, oyavangagni mbeama na onkear omog ve." ¹⁶ Eshuu otatu ne suka, wayug apfung, wanzari, wayen ti ivim i mafuba itaang ne dzug ombimi; wayug asig abur na biu, mby vear ankeankum ayike ne mvuru iwo wayug womo. ¹⁷ Moize s'apur nde vear ne mvuru iwo, djwi watsu nsanga ti Nzeam; mby wayima ne ngie ombimi. ¹⁸ Ombimi e Sinai ekum ko edjinga n'edjinga, djwi Yaweh ayiwo atikr neti, ne kati e tshiya; edjinga enagn aleveanikiwo kamsi edjinga e tshiya e mampa, mpi ombimi onkum alegnugikiwo na biu. ¹⁹ Oshuru o asig elega mbur biu. Moize atubikinde mby Nzeam okearike mvutu na otuba o biu. ²⁰ Mby Yaweh akra ne ombimi e Sinai, ne nsor ombimi, Yaweh s'avinde Moize ne nsor ombimi. Moize mpi avean. ²¹ Yaweh atuba nda Moize ndenden: "Kr, tshwag opum vear wakayia etay eli Yaweh djwi n'ondir, yug kaku vear entsign ne kati ewo asiwawo. ²² Wanganga-Nzambi isivanga mbeama na Yaweh mpi wayii osantu, yug kaku, Yaweh asadjag nde." ²³ Moize atuba nda Yaweh ndenden: "Vear wapikug mvean ne ombimi o Sinai ve, djwi atepum yie, atubiyie yeyen: 'Tsug onduu ne ombimi, mpi ombimi eyii e santu.'" ²⁴ Yaweh atuba nda nde ndenden: "Tshwag, kr mby olekey mvean ti Aaron; kansi wanganga-Nzambi ti vear ankum wakwon gnuna na mvean etay e Yaweh, yug kaku, asadjag nde." ²⁵ Moize s'akrinde etay eli vear, mpi akaba vii ankeankum anagn.