¹ Yaweh atuba nda Moize ndenden: "Tshwag etay e Faraon kaba nde yeyen; ' Yaweh atuba ndenden, Sianga vear ame wakien, watsu nkie me empeab. ² Yug otun na nsianga wo, asiyura me okiru ognu onkum na akoro. ³ Nzey asipur nde akoro, asiyiawo nshwe ti n'evuru eyie, ti ne itwunu ivur yie, ti ne ntir eyie. Asishwe wo ti ne mvuru i vear ayie otshia. ⁴ Akoro asivean wo ti ne djuung i vear a okiri oyie ti ne djuung i vear ayie otshia.'" ⁵ Yaweh atuba nda Moize ndenden: "Kaba Aaron yeyen: 'Shima ewuo ti ikom iyie ne dzug i vay anen-anen, vay a kieg-kieg, vay a abulu, mpi bin koro wavean ne buu e Ejipiti opfugn.'" ⁶ Aaron ashima ewuo ne dzug wavay a Ejipiti mby akoro s'avean wo, wadzub buu e Ejipiti opfugn. ⁷ Kansi ankea alog wakie mpi ko oshin onagn na alog awo, wapur akoro ne buu e Ejipiti opfugn. ⁸ Mby Faraon avie Moize ti Aaron ndenden: "Samagni Yaweh alimi akoro ne evuru eme ti etay e vear a okiri ome. Mby asosiangagni me okinagni, otsinkieagni empeab djwi na nde." ⁹ Moize s'atubinde nda Faraon ndenden: "Vey osiang oyie ya me! Eshuu nge eyasama me djwi na yie ti vear ayie otshia ti vear a okiri oyie, alimi akoro ondii oli yie ti ne mvuru iyie? Enagn akoro asisawo tsuga ko ne vay." ¹⁰ Faraon akeara ndenden: "Nampign." Moize atuba ndenden: "Sianga, eyii ko oshin omituba yie, kansi ofwete njia yeyen kaku wur emuu eli kamsi Yaweh, Nzeam esu ve. ¹¹ Akoro asilim wo etay e gnu, asisawo tsuga ko ili ne nzey." ¹² Moize ti Aaron wapwe ne evuru e Faraon. Moize adzama olie etay e Yaweh djwi na akoro ayipur nde etay e Faraon. ¹³ Yaweh akie ko oshin oyiling Moize, mby akoro s'awiwo ne mvuru, ne iyawiya ti ne okwun. ¹⁴ Vear s'atsug wo akoro anagn ondii omog ne atura, mpi epea mbin ne wiya. ¹⁵ Kansi ntangu emiyen Faraon akoro atishir, akea ntshung etura ende, akaleang ngyug Moize ti Aaron ve, oshin oyitubi Yaweh. ¹⁶ Yaweh atuba nda Moize ndenden: "Kaba Aaron yeyen: 'Shima ikom iyie ne buu. Buu asikum wo nsign ne okiri e Ejipiti opfugn.'" ¹⁷ Wakie ko oshin onagn, Aaron ashima ewuo ti ikom inde ne buu, mby buu ekum wansign ayiwo ne djuung i vear, ti ne djuung i wagnam. Okub o buu enkum tshim ko wansign ne okiri e Ejipiti opfugn. ¹⁸ Ankea alog wakie mpi oashin onagn na alog awo djwi wapur mpi wansign, kansi wakakug ve. Nsgn ayiwo ne djuung i vear ti ne djuung i wagnam. ¹⁹ Mby ankea alog watuba wa Faraon wuwun: Ene eli epign e Nzeam." Kansi Faraon atshung ko etura, akaleang ngyug Moize ti Aaron ve, ko oshin oyitubi Yaweh. ²⁰ Yaweh atuba nda Moize ndenden: "Asibiy yie ko ne suka-suka, opwi ne nteang e Faraon, asipwe nde na ntsa mbeama na vay. Asokaba yie yeyen: 'Yaweh atuba ngean: 'Sianga vear ame wakien, watsu nsama me.' ²¹ Yug okasianga vear ame wakien ve, asotuma me ensiya wokami vin, ti vear ayie otshia, ti vear a okiri oyie, ti vear ali ne mvuru iyie, ti mvuru i vear a Ejipiti asiyuo wo na ensiya, ti buu ene asidzub wo na ensiya. ²² Kansi ne nshuu inagn, ne okiri o Goshen, ondii opier vear ame, epayia n'ensiya ve, djwi yie ojii yeyen ndi Yaweh, ne kati e okiri onagn. ²³ Ayakieme onshiey djwi na vear ame ti vear ayie. Kidimu ene ayayiawo ko nampign.'" ²⁴ Yaweh akie ko oshin onagn. Oluy o ensiya etsankama vear vin, eshwe ne evuru e Faraon ti vear ande otshia, mpi buu e Ejipiti opfugn eyuo to n'ensiya. ²⁵ Faraon avie Moize ti Aaron, atuba ndenden: "Tshwagagni, okiagni empeab djwi na Nzeam egnu ne okiri osu." ²⁶ Moize atuba ndenden: "Sipikug na nkie oshin onagn ve, ogniang empeab ekiesu ya Yaweh Nzeam esu, eli empeab djwi n'ipwo i Vear a Ejipiti. Mby yug simikie empeab ewo ne viy awo, empeab epileang wo ngyen, wapatedjag na atari? ²⁷ Asikiesu ekien e nshuu isar ne buu e ndzum, mby sikii empeab djwi na Yaweh Nzeam esu oshin ositekabande." ²⁸ Faraon atuba ndenden: "Asosiangagni me, otsinkiagni empeab djwi na Yaweh Nzeam egnu, ne buu e ndzum. Vim emog etuba me ma gnu, opikug ntsagni etey ve. Samagni djwi na me." ²⁹ Moize akeara ndenden: "Ko ne ntangu esipwe me n'evuru eyie nendien, ndetsu nsama Yaweh, nampign, ensiya asilim wo etay eyie Faraon, ti vear ayie otshia, ti vear a okiri oyie. Kansi sianga na nkie oyang mbala ene, djwi akey ntun na tempur djwi na ntsa nkie empeab djwi na Yaweh." ³⁰ Moize s'apwi nde n'evuru e Faraon, mpi atsa nsama Yawh. ³¹ Yaweh akie ko oshin omiwigna Moize; ensiya elim ne evuru e Faraon, ti e vear ande otshia, ti vear a okiri onde. Kaku ata onsiya emog eyisatsuga ve. ³² Kansi Faraon mbala ene, akea ntshung ko etura ende, mpi akasianga aman a Israel na nkien ve.