¹ Mby Yaweh atuba nda Moize ndenden: " Asotsug me okum kamsi Nzeam ne nteang e Faraon. Otwung oyie Aaron asiyiande kamsi ngunsa. ² Yie, asikaba yie Aaron vii ankum amotum me, mby nde, asituba nde nda Faraon, djwi asiangi aman a Israel wwpwi ne wiya nde. ³ Kansi me, asipeame Faraon etura biu. Ata asikieme bidimu eshin n'eshin ne Ejipiti, ⁴ kansi Faraon apatoyugagni ntete ve. Mby me, asiyab me ewuo eme ne Ejipiti, mby asipur me vear ame aman a okuu o Israel, ne buu e Ejipiti na ndola eninen esisame pea ya wo. ⁵ Vear a Ejipiti asijia wo wuwun me ndi Yaweh ntangu esiyegne me biu ome mpi ntangu esipur me aman a Israel ne wiya wo." ⁶ Moize ti Aaron akiwo vii ankum oshin oyatum Yaweh. ⁷ Moize ayinde na mvwe oniani mby Aaron ayinde na mvwe oniani na isar ntangu eyitshiwo ntuba wa Faraon. ⁸ Yaweh akaba Moize ti Aaron ndenden: ⁹ "Yug Faraon amituba nda gnu ndenden, 'Nge ekab wuwun eli Nzeam wur emituba nda gnu, mby yie, nkie kidimu. Asituba yie ya Aaron yeyen: Vey ikom iyie, twomo wog ne buu ne nteang e Faraon, mby asikum wo ndjwa.'" ¹⁰ Mby Moize ti Faraon s'atshi wo etay e Faraon, mpi wakie ko oshin oyitubi Yaweh. Aaron atwomo ikom inde ne buu ne nteang e Faraon ti vear ande otshia, ekum ndjwa. ¹¹ Mby Faraon avie vear ande a waagn ti ankea alog, wakie mpi ko oshin omog. ¹² Wur na wur atwomo ikom inde ne buu, ekum wandjwa. Kansi ndjwa eyi Aaron amign wandjwa iwo wankum. ¹³ Kansi Faraon adzign ko etura, akaleang ngyug ve, ko oshin oyitubi Yaweh. ¹⁴ Yaweh atuba nda Moize ndenden: "Faraon ali ote biu, atitun na nsianga aman a Israel wakien. ¹⁵ Tshwag etay e Faraon ne suka-suka ntangu esitsa nde mbeama na vay, mby asipwe yie ne nteang ende, ne ikri i nzey. Asikir yie ikom iykum ndjwa enagn ne ewuo eyie. ¹⁶ Mby otubi ya Faraon yeyen: "Yaweh, Nzeam e wayuda atintum etay eyie n'onkaba ndenden: 'Sianga vear ame wakien watsu nkie empeab ne buu e ndzum. Yie tii opeane, opiyug ve.'" ¹⁷ Yaweh atuba ndenden: "Enagn ondii osijia yie yeyen me, ndi Yaweh. Asinang me ikom ili ne ewuo eme ene ne vay a nzey ane, mby vay awo alekum aluung. ¹⁸ Wanse ili neti asiwawo, nzey asita nde okem. Vear a Ejipiti asiling wo vay a gnua, kansi wapavea ve." ¹⁹ Mby Yaweh atuba nda Moize ndenden: "Kaba Aaron yeyen: 'Kir ikom iyie, mby oshimi ewuo eyie ne dzug i wavay ankum a vear a Ejipiti, vay anen-anen ti vay akieg-kieg, vay a abulu. Asikum wo ko aluung-aluung, mpi buu e Ejipiti enkum asiyia wo ko aluung na aluung, ne alongo awo ti ne anzanza.'" ²⁰ Moize ti Aaron s'akiwo ko oshin oyitubi Yaweh. Aaron asiang ikom dzug, mby anang ne vay a nzey, ne vy a Faraon ti vear ande otshia, mpi vay a nzey ankum ekum ko aluung. ²¹ Wanse ne nzey ishir ngwa, nzey evey okem. Vear a Ejipiti wakafikug ve na gnua vay a nzey, buu enkum e Ejipiti ekum ko aluung. ²² Ankea alog a Ejipiti wakie mpi ko oshin onagn, na alog awo. Faraon atshung ko etura, akayug vii a Moize ve, oshin oyitubi Yaweh. ²³ Faraon akea ntsa evuru ende, akatsug ata vii awo ne etura ve. ²⁴ Vear ankum a Ejipiti watsum abulu mbeama na nzey djwi na mvea vay a gnua, djwi wakakug na gnua vay a nzey ve. ²⁵ Ne mby emipiy Yaweh vay a nzey, eleg nshuu ishambia.