¹ Ne mby e vii anagn, Moize ti Aaron s'atshiwo etay e Faraon, wokaba wuwun: "Yaweh, Nzeam e Israel atuba ngean: 'Sianga vear ame wakien, watsu nkie okina ne buu e ndzum djwi na lokumu eme.'" ² Faraon akeara ndenden: "Yaweh ko nagn djwi me ndemfuki n'otuba onde? Mpijia Yaweh ve, mpi mpasianga aman a Israel wakien ve." ³ Watuba wuwun: "Nzeam e wayuda atipwe ya su. Otepi mbug siki ekien e nshuu isar ne buu e ndzum, djwi siki empeab djwi na Yaweh, ogniang akatedjag na nkeang to n'ompien e vur epe." ⁴ Mby vwi e Ejipiti atuba nda wo ndenden: "Moize ti Aaron, djwi na nge eling gnu ndima vear anagn ne otshia ewo?Tshwagagni ne etshia egnu!" ⁵ Akea ntuba ndenden: "Yen vear ane watikum entsign ne buu esu, mby olingagni mbag etshia ewo." ⁶ Ko eshuu enagn, Faraon atuba nda wakapita ti ankum awo ndenden: ⁷ "Oyafipeagni vear ane elieng ve djwi na nkie wambriki kamsi eyapikignu nteang ve, wo wemie watsu ndingaka. ⁸ Kansi tumagni wo na nkie ko isuu i mbriki oshin omog eyikikiwo nteang, wapikug ndima ata mbriki emog ve, djwi wali wakoy-koy. Wog enagn, walaliye wuwun, 'Otepi mbug na ntsa nkie empeab djwi na Nzeam esu.' ⁹ Ekug na mpea wo etshia e biu-biu, djwi wasiangi na ntuba vii a oyang enagn." ¹⁰ Mby ayer-nkuu ti wakapita iwo wapwe na nkaba wuwun: "Vwi e Ejipiti atituba ngean: 'Mpafopeagni elieng ve. ¹¹ Tshwagagni gnemie olingagni elieng enagn etay enkeankum esiveagnu. Kansi ofwete nkiagni ko isuu i mbriki iyikikignu nteang.'" ¹² Mby aman a Israel s'apagn wo Ejipiti opfugn na ndingaka elieng. ¹³ Ayer-nkuu a vwi apikiwo mpay, atubikiwo wuwun: "Konso eshuu ofwete nkiagni isuu i mbriki ikug mby otshia eshir, kamsi ne ntangu eyopeakagni wo elieng." ¹⁴ Ayer-nkuu i Faraon aledjagikiwo wakapita i aman a Israel isur wuwun: "Djwi na nge ne nshuu ine isuu i mbriki ipikafikug wo, oshin oyiki nteang?" ¹⁵ Mby wakapita s'atsiwo ndiye etay e vwi, wuwun: "Nkum, djwi na nge eletepi yie mpay ngean? ¹⁶ Wapikafi tepea elieng ve, kansi watuba wa su wuwun: 'Kiagni wambriki!' Mpi waletedjag isur. Vear ayie waleki ipwo entsign." ¹⁷ Mby Faraon akeara ndenden: "Olagni wakoy-koy! Olagni wakoy-koy! Oletubagni ko gnugnun: 'Otepi mbug sitsu nkie empeab djwi na Yaweh.' ¹⁸ Keagni ne otshia ognu! Kaku ata ivim i elieng esopeagni wo ve, kansi ofwete nkiagni wambriki ko ne isuu iwo oshin oyikikignu nteang." ¹⁹ Wakapita aman a Israel wayen wuwun watikum ne mpay djwi n'oshin omitubawo wuwun: "Isuu i mbriki ipikug nkra ve ne eshuu emog." ²⁰ Ntangu emipwe wo etay e nkum e Ejipiti, watsa eveang na nsanga ti Moize ti Aaron, ayiwo wasakwung ne lien, ²¹ watuba wa Moize ti Aaron wuwun: "Yaweh oliragni gnu, mpi opiagni gnu ndola. Vwi ti vear ande otshia watetun ko djwi na gnu. Gnu vear amapea mbug djwi watedjag." ²² Moize akea ntsa etay e Yaweh, mpi atuba ndenden: "Nkum, djwi na nge epea yie vear ane mpay? Mpi djwi na nge eyintum yie me na ngya nteang ewo? ²³ Yim ko eshuu eyikime ayamu ti vwi e Ejipiti ne dzin iyie, atikum mpea vear ane mpay entsign, kansi yie, kaku ata vim emog emikie yie ve djwi na mvuga wo."