¹ Moize akeara ndenden: "Yen, wapandjir me ve, mpi wapayug otuba ome ve. Asitubawo wuwu: 'Yaweh atopwi yie ve.'" ² Yaweh atuba nda nde ndenden: "Vim nge eli ne ewuo eyie enagn?" Moize okeara ndenden: "Eli ikom." ³ Yaweh atuba ndenden: "twomo wog ne buu." Atwomo mpi ikom iwo ne buu, ekum ndjua. Moize alur ndjua ewo. ⁴ Yaweh atuba nda Moize ndenden: "Shima ewuo, kir nde ne ojir." Ashima ewuo mpi akir ndjua ewo, ekea nshim ikom ne ewuo ende. ⁵ Yaweh atuba ndenden: "enagn wog oshin osikie yie djwi wadjir wuwun Yaweh, Nzwa, e atea awo atopwe yie, Nzeam e Abraama, Nzeam e Izaak ti e Yakob." ⁶ Yaweh akea ntuba nda nde ndenden: "Tsug ewuo eyie ne ipfugn iyie." Atsug mpi ewuo n'ipfugn inde, mby ntangu emilima nde ewuo ewo, yen ewuo etikum na nkeang e ndwum, etikum sii kamsi ewung. ⁷ Yaweh atuba nda Moize ndenden: "Keara ewuo ne ipfugn iyie." Akeara ewuo n'ipfugn inde, mby ntangu emikeande ndima ewuo, mpi ayen etikea wuo kamsi djuung inde. ⁸ Yaweh atuba ndenden: "Yug wakadjir ve, mpi wakayug ne kidimu e nteang enagn, asidjir wo ne otuba e kidimu e nsuka ene. ⁹ Yug wakadjir ne bidimu inkeape ine, mpi yug wakayug otuba oyie ve, mby asivey yie vay a nzey, omwang ne buu, mby vay anagn asikum wo aluung ne buu. ¹⁰ Moize atuba nda Yaweh ndenden: "Ah, Nkum, epa ndi wur eli n'otuba e wuo ne odzum ve, epa e lii ata e luo ve, epa mpi ko ntangu etuba yie ya wur eyie otshia ene ve, ogniang me, ndi n'inkuma ne odzum ome." ¹¹ Yaweh oyue ndenden: "Wur nagn eyikii odzum o wur? Mpi nagn etsa ntsug odzum o wur ekwon ntuba, to nkna atii a wur akwon ngyug, ti ngama to mbuye viy a wur? Epa mug Yaweh? ¹² Tshwagaka, me asiyiame ti odzum oyie, mpi asolong me vii nge asituba yie." ¹⁴ Mby nkier i Yaweh ilog ya Moize, atuba ndenden: "Jii yie Aaron, wur e okuu o Leviapa aliko ve? Ndajia nde, asituba nde wuo. Yen ndean mpi ndemie, aleye ne nteang eyie, mpi ntangu eoyen nde, asiyia nde n'osiang n'etura ende. ¹⁵ Asokaba yie mpi asitsug yie vii antuba ne odzum onde, mby me, asiyiame ti ne odzum oyie, ti ne odzum onde, mby asolongagnime vii nge asikignu. ¹⁶ Asitubakande nda vear djwi na yie, asikum nde odzum oyie, mby yie, osakum kamsi me Nzeam. ¹⁷ Vey ikom iyie ne ewuo eyie, asikie yie bidimu na wo." ¹⁸ Moize s'akien nde, mby emikeande nkum etay e okiu nde Yetro, atuba nda nde ndenden: "Ndawigna ya yie, onsiangi nkey ntsa etay eli atwung ame ne Ejipiti, djwi na ndir yug wali ko ne luzingu." Yetro atuba nda Moize ndnden: "Tshwag na wuo enkum." ¹⁹ Yaweh atuba nda Moize ndenden: Lim, keantsa Ejipiti, djwi vear ankum alelingike n'ondjag yie wamishir ngwa." ²⁰ Moize s'avey nde wear nde ti aman ande, atsug ne dzug i mpunda, s'akey nde ne buu e Ejipiti. Avey ti ikom i Nzeam ne ewuo ende. ²¹ Yaweh atuba nda Moize ndenden: "Ntangu elekey yie ntsa Ejipiti, lir bidimu inkum imitsug me ne mbwo iyie, ayakie yie wog ne nteang e Faraon. Mby me, ayatshung me etura ende, mpi apasianga vear ve wakien. ²² Ayatuba yie ya Faraon yeyen: "Yaweh atuba ngean: 'Israel ali mon me, mon e nsom eteang. ²³ Ntuba ma yie, sianga mon me akien, djwi tsau nkie otshia ome, yug omitun n'onsianga akien, yen, asidjag me mon yie, mone nsom eteang." ²⁴ Ne mbug eletshikiwo, emiyima wo ne ondii omuu otshuu onkum, djwi wavur, Yaweh atag Moize mpi onodjag nde. ²⁵ Mby Sefora avey itari imog i mpia, abag djuung ompeam e mon nde, s'atwominde ne nkuu i Moize, ndenden: "Oli wum me tii ne aluung." ²⁶ Mby Yaweh osianga. Wog enagn eyitubi onkear onagn ndenden "wum e aluung." ²⁷ Yaweh atuba nda Aaron ndenden: "Tshwag ne buu e ndzum, osangi ya Moize." Aaron atsa nsanga mpi nda Moize ne ombimi e Nzeam, mpi opea mwaa. ²⁸ Moize akaba Aaron vii ankum ayitubi Yaweh, ti bidimu iyotum nd na nkie. ²⁹ Moize ti Aarons'aletshikiwo ne mbug ewo, mby watsug antsuru ankum a aman a Israel ondii omog. ³⁰ Aaron akea nkaba wo vii ankum amituba Yaweh nda Moize, mby akie mpi bidimu inagn ne viy a vear. ³¹ Mby vear s'adjir wo. S'ajiiwo wuwun Yaweh atiyia ndir aman a Israel ne mpay iwo, mby wo, s'akr wo abongo awo, wababa.