¹ Moize awungikinde wagnam i okiu nde Yetro, nganga-Nzambi e Madian. Mby avara wagnam inagn ne oshwi, tii ne ombimi o Nzeam, ne Oreb. ² Wanzio e Nzeam opwe ne ekb e tshiya ne oshung, epiey ne ngnina oshwi, kansi epilungi ve. ³ Moize atuba ndenden: "Ntotsa ntshim mpiog na ngyen emono eninen ene, eli nge, mpi djwi na nge oshung opilungi na tshiya." ⁴ Yaweh emiyen nde Moize aletshim djwi na ndir, Nzeam s'oviinde ne ngnina eshung enagn, atuba ndenden: "Moize! Moize!" Mby Moize akeara ndenden: "Mean!" ⁵ Nzeam atuba ndenden; "Oyavanga nendien ve, lima antwum ali ne nkuu iyie , djwi ondii oli yie ene eli buu e santu." ⁶ Akea ntuba ndenden: "Ndi Nzeam e tea yie, Nzeam e Abraama, Nzeam e Izaak, ti Nzeam e Yakob." Moize atsur elung ende, djwi ayug nde womo na ndir Nzeam. ⁷ Yaweh atuba ndenden: "Ntiyen mpay i vear ame ne Ejipiti, mpi ntiyug elie ewo djwi na mpay ilapiiwo, djwi ndajia mpay iwo. ⁸ Ntikra djwi na ndima wo ne mbwo i vear a Ejipiti, na ndima wo mpi ne buu ene, watsu ne buu e wuo ti eninen. Buu eli mabele ti vir a mpag ilekri, ne ondii opier vear a Kanaana ti vear a Heti, vear a Amore, vear a Ferezi, vear a Evi ti vear a Yebisi. ⁹ Yen, elie aman a Israel etikum tii ondii oli me, mpi ntiyen mpay ilapii vear a Ejipiti. ¹⁰ Opeane, Tshwgwka, ndotum yie etay e Faraon, mby asipur yie vear ame ne Ejipiti." ¹¹ Mby Moize atuba nda Nzeam ndenden: "Me ko nagn djwi na ntsa etay e Faraon, mpi na mpur aman a Israel ne buu e Ejipiti?" ¹² Nzeam okeara ndenden: "Asiyiame ti yie. Enagn asiyiawo kidimu esijia yie yiyen eli mug wur emotum yie. Ntangu eyapur yie vear ame ne Ejipiti, ayakiegnu otshia ome Nzeam ne ombimi one." ¹³ Moize atuba nda Nzeam ndenden: "Asitsame etay e aman a Israel, asakabame memen: 'Nzeam e atea agnu atintum etay e gnu.' Mby yug wamingwe wuwun dzin inde nagn? Nge esikeara me?" ¹⁴ Nzeam atuba nda Moize ndenden: "Me, ndi wur eli ndeko." Mby akea ntuba ndenden: "Enagn wog oshin osikeara yie aman a Israel: Wur eli dzin inde Aliko atintum etay egnu." ¹⁵ Nzeam akea ntuba nda Moize ndenden: "Asituba yie ya aman a Israel ngean: 'Yaweh, Nzeam e atea agnu, Nzeam e Abraama, Nzeam e Izaak, ti Nzeam e Yakob atintum etay egnu. Enagn wog dzin ime i mvwe na mvwe, elug n'elug. ¹⁶ Tshwag, soon antsur ankum a Israel, tsug wo ondii omog. Kaba wo yiyen, Yaweh, Nzeam e atea agnu atimpwe, Nzeam e Abraama, Nzeam e Izaak, ti e Yakob. Atituba ndenden: 'Ndoyenagni mpi ndayen vii ankum alokiagni wo ne Ejipiti. ¹⁷ mby s'amitubame memen ndolimagni ne buu e Ejipiti ene, ondii oleyen gnu mpay, asotumagni me ne buu e vear a Kanaana, vear a Heti, vear a Amore, vear a Ferezi, vear a Hevi ti vear a Yebisi, ne buu elekri mabele ti vir a mpag.'" ¹⁸ Asiyug wo otuba oyie, na yie, na antsur a Israel, etay e nkum e Ejipiti, mby asitubagnu gnugnun: ' Yaweh, Nzeam e wayuda atitepwe. Otepi mbug sikii ekien e nshuu isar ne buu e ndzum djwi na nkie empeab djwi na Yaweh Nzeam esu.' ¹⁹ Kansi me, ndajia, vwi e Ejipiti aposiangagni ve okienagni, yug kaku ewuo e biu ve. ²⁰ Asishima me ewuo eme, mby ayadjag me Ejipiti na bidimu eshin n'eshin eyakieme etay ende. Ne mby ewo, ayosiangagni nde okienagni. ²¹ Ayatum me vear ane wayen ngrasia ne vy a vear a Ejipiti, mby ntangu eyatsagnu, opayatsagni ko mbwo-mbwo ve. ²² Onkear onkum ayawigna nde ya onkear oli mbeama na nde ti eli neti evuru ende, alongo a etiempar, alongo a wolo, ti ileam iyalwer gnu aman a gnu ampeam ti ankear. Enagn oshin oyapuragnu vear a Ejipiti vim awo ankum ne mvuru.