¹ Mby ompeam omog n'evuru e Levi atsug nde wear ko mon e Levi. ² Onkear owo avey djim mby awur mon ompeam. Ayen ndenden mon ewo ali wuo n'elung, oziy ngwon isar. ³ Akafikug n'ongwum ve, mby s'avey nde imon esag e nkori, awong mby s'atsug nde mon neti, atsa nky ne nkori ili n'ikri i nzey. ⁴ Nkignam e mon enagn atiyima etey, djwi na ndir djwi nge esilog ya nde. ⁵ Mon onkear e Faraon akra ne nzey djwi na ngyog vay, mby vear ande otshia walekien n'ikri i nzey. Ayen esag enagn ne ngnina e wankori, mby s'atum nde wur ende otshia emog na ntsa mvey wog. ⁶ Angama, ayen mon neti; ayiwo mon ompeam, aliye. Oyug ngy mpi atuba ndenden: "Ene asiyiawo ko mon e wayuda." ⁷ Mby nkignam e mon enagn atuba nda mon onkear e Faraon ndenden: "Oleang ntsu nding onkear emog e Israel esikug ngwunga mon enagn djwi alopike aviyo?" ⁸ Mon onkear e Faraon okeara ndenden: "Tshwag". Mpi mon onkear enagn atsa nkaba ko mea e mon enagn. ⁹ Mon e Faraon atuba nda nde ndenden: "Vey mon enagn, ompii na nde aviyo, asopeame ifutu iyie." Onkear onagn avey mpi mon, atsa ompea aviyo. ¹⁰ Ntangu emifuye mon enagn, ovara etay e mon onkear e Faraon, akum kamsi mon nde. Opea dzin i Moize, djwi na ntuba ndenden: "Otongime ne vay." ¹¹ Ntangu emifuye Moize, atsa etay eli atwung ande, mpi ayenikinde etshia e biu-biu eyapikiwo. Ayen wur emog e Ejipiti aladjag wur emog e yuda ondii oli atwung ande. ¹² Alir etay n'etay, kaku wur ve, s'adjag nde wur e Ejipiti enagn, awa, osopfugn ne zelo. ¹³ Apwe mpimpign enagn, ayen wayuda ipe walashia. Atuba nda wur eyikii ipwo ndenden: "Djwi na nge edjag yie otwung oyie?" ¹⁴ Mby wur enagn okeara ndenden: "Nagn emotsug yie kapita to nkum esu? Obansa asindjag yie me kamsi eyidjag yie wur e Ejipiti?" Moize ayug womo, atuba ndenden: "Vii-a-vii, wean watijia vii awo." ¹⁵ Ntangu emiyug Faraon vii awo, s'alingikinde oshin o ndjag Moize. Mby Moize s'alur nde, atsa wiya e Madian. Mby, ayima mbeama n'etog e vay. ¹⁶ Nganga-Nzambi e Madian ayinde na aman ankear ashambia. Wayia djwi na ntog vay. Wayura vim eyiyiwo na wo djwi na mpea wagnam i tea wo vay a gnua. ¹⁷ Vear amuu alir wagnam wayia mpi, wakma aman ankear anagn. Mby Moize ayima, aplege djwi na wo, mpi apea wagnam iwo vay a gnua. ¹⁸ Ntangu emikea aman ankear anagn etay e tea wo Ruel, tea wo atuba nda wo ndenden: "Djwi na nge emikagn gnu nkea luo eveang ngean?" ¹⁹ Wakeara wuwun: "Wur emog e Ejipiti atitevuga ne mbwo i vear alir wagnam, mpi atitetogo vay, atipea wagnam isu vay a gnua." ²⁰ Mby atuba nda aman ande ankear ndenden: "Wur ewo ando? Djwi na nge emisagnu sugn wur enagn? Viagni nde ayi mvey ivim i nda." ²¹ Moize aleang mpi na gneme ti wur enagn, s'opinde mon nde onkear Sefora akum wear nde. ²² Awur mon ompeam, opea dzin i Gershom, djwi na ntuba ndenden: "Ndapier ne wiya ongingien." ²³ Ne mby i nshuu entsign, vwi e Ejipiti s'awinde. Aman a Israel aliyikiwo djwi n'oshin oliwo ko ampfum, s'atsugikiwo elie djwi wasarisi, elie ekum tii etay e Nzeam. ²⁴ Ntangu emiyug Nzeam ignie iwo, mby akana alien ayikinde ti Abraama, ti Izaak ti Yakob. ²⁵ Nzeam alir aman a Israel, mpi ayug ngy.