¹ Akie kunda na oshung e akazia djwi na mpea makabu, otey ewo ayiwo metelo ipe na ndamu, mby onen ewo mpi metelo ipe na ndamu; empagn enkeanign ayiwo ko oshin omog, odzeang owo ayiwo metelo emog na ndamu. ² Akie asig ne akwuu ankeanign, asig awo alepwikiwo ne kunda, mpi atsug wog na ewuu. ³ Akie wampuug inkeankum i kunda, wambabula, mpau, alongo aninen, wansom ti eking e tshiya; wampuug inagn inkum akinde wog na ewuu. ⁴ Akie iwuu imuu djwi na nkeg ne opim o kunda, yim ngie tii ko ne ngnina e kunda. ⁵ Akie entshway enign, atsug ne akwuu ankeanign e iwuu imikeg wo djwi na nshwer etandala. ⁶ Betisalele akie etandala e eshung e akazia, mby adzub wog na ewuu. ⁷ Ashwer etandala ne enshway ili ne ompagn o kunda, djwi na mvara wog. Akinde wog ti ipug neti, na abaya. ⁸ Betisalele akie ilongo ininen na ewuu, ti ebaay ewo e ngie na ewuu, avey watala-tala ankear, eta ompagn na ompagn, ne ondii o shwewo ne evuru e kapo, ne ondii o kwung vear. ⁹ Akie nteang e evuru e Nzeam. Woog o sudi, ayiwo na eleam e marikagn, otey ewo, metelo otean, djwi na iyawiya e nteang e evuru e santu; ¹⁰ ti ataga omab, ngie ewo na ibaay omab, imikiewo na iwuu; nshob i ataga anagn ti akwiy awo ayiwo na etiempar. ¹¹ Woog e nordi, otey e eleam ewo ayiwo metelo otean, ti ataga omab, ti ibaay iwo ngie omab, emikiewo na ewuu; wanshob i ataga anagnti akwiy awo akiwo na etiempar, ¹² woog etsandog vuna, eleam ewo ayiwo metelo omab na itean, na ataga djum, ti ibaay iwo djum; wanshob i ataga anagn ti akwiy awo akiwo na etiempar. ¹³ Woog epwe vuna, ne onen e metelo omab na itean, ¹⁴ ayiwo na ipaab imog, eleam e metelo ishambia ti ataga asar, na ibaay iwo iasar; ¹⁵ mpi, ne ipaab imuu, eleam e metelo ishambia, ayiwo ko oshin omog ti ipaab i nteang; na ataga asar ti ibaay iwo isar. ¹⁶ Ileam inkeankum imidjing wo, etiwong iyawiya e nteang e evuru e santu enagn ayiwo marikagn. ¹⁷ Ibaay iyi ne ngie ataga ayiwo na iwuu, wanshob i ataga ti akwiy awo ayiwo etiempar, mby dzug iwo adzub wo na etiempar. Ataga ankeankum a nteang e evuru e santu abeamikiwo na akwiy a etiempar. ¹⁸ Eleam eyitsug wo ne epfug e nteang e evuru e santu atiyiwo na mbwo, na oshing e buleti e kwi, ti eleam e marikagn. Otey ewo ayiwo metelo djum, mby odzeang owo ayiwo metelo ipe na ndamu, oshin omog ti onen e eleam emidjing wo nteang e evuru e santu. ¹⁹ Ataga awo anignti ibaay iwo inkeanign ayiwo ewuu, wanshob iwo ti akwiy awo ayiwo etiempar, na dzug iwo adzub wo na etiempar. ²⁰ Entshway enkeankum eyi neti e tabenakulu ti ne nteang e evuru e santu akiwo na ewuu. ²¹ Yen etshia enkeankum eyikiwo ne tabenakulu, ne evuru e kapo ekwung wo; wakea ndir etshia enkeankum oshin oyitum Moize, nda vear a okuu o Levi, Itamar wur eyi nkum e lir etshia enagn, nde mon e Aaron, wur ekie empeab. ²² Betisalele, mon e Uria, mon e Hur, ne okuu o Yuda, akie vim ankum ayitum Yaweh nda Moize na nkie; ²³ Oholiab wur eyosarisike, mon e Ayisamaki, ne okuu o Dan, ayinde biu na ngwong ti na nganga vim amuu, na ntiye ileam na mbwo, ileam ili na atono a bule, a kwi-kwi ti ileam i marikagn. ²⁴ Isuu i wolo inkeankum eyikiwo etshia enkum e evuru e santu, wolo iyipikiwo makabu, avean wo tii talanta omab na iwua, ti wa sikele nkama ishambia na osar, oshin o sikele eyer wo ne evuru e santu. ²⁵ Etiempar e vear ankeankum, ntangu emitanga wo, avean wo tii talanta nkama emog, ti wa sikele iwug imog na nkama ishambia na oshambia na itean, oshin o sikele eyer wo ne evuru e santu. ²⁶ Ayiwo ndamu e sikele eyiyerikiwo ne evuru e santu, djwi na wur enkum emitanga wo, bana ne mvwe omab tii ko dzug; ayiwo ampeam awug nkama isom na isar, na nkama itean na otean. ²⁷ Etiempar e talanta nkama enagn, asarisiwo na nkie ibaay i ndzub ne evuru e santu ti ibaay ileam i ndzub ibaay nkama djwi na talanta nkama, talanta emog djwi na ebaay emog. ²⁸ Mby, ne wa sikele iwug na nkama ishambia na oshambia na itean, akiwo wantshob ti entshway ti akwiy a ataga, mpi wadzub dzug iwo. ²⁹ Iwuu i makabu avean wo tii talanta oshambia ti wa sikele awug ape na nkama inign. ³⁰ Akiwo na wo, ibaay iyitsug wo ne mbwung e epfug e nshwe ne evuru e kapone ondii o nkwung, ne kunda e ewuu, ti iwuu i ngikeg, mpi ti wampuug inkeankum ili ne kunda; ³¹ ibaay iyi ne iyawiya i nteang e santu edjing etay enkum, ti ibaay i epfug e nteang e evuru e santu, ti entshway enkum eyi neti e tabenakulu ti nelien ne iyawiya.