¹ Moize avie aman Israel ankeankum, atuba nda wo ndenden: "Yenagni vii amituba Yaweh na nkie. ² Ayakiaka gnu etshia nshuu isomkansi eshuu e ishambia, ayayiawo djwi na gnu, vim emog e santu; eli eshuu obing, eshuu eyor gnu, epea gnu ya Yaweh. Wur eyakie ata imon otshia eshuu enagn, ayavey nde ndola ewa." ³ Opayapieyagni tshiyave, eshuu enagn, ne mvuru ignu." ⁴ Moize atuba nda aman Israel ankeankum ndenden: "Yenagni vii amituba Yaweh na nkie. ⁵ Veyagni ndamu e vim agnu, peagni makabu djwi na Yaweh.Wur enkum eli na etura ewuo, ayajie nde djwi na makabu etay e Yaweh: wolo, etiempar, ewuu; ⁶ eleam atono a bule, atono a kwi, e marikagn ti e viey e mbur; ⁷ e mpuy ameme a wum ali na atono a kwi ti mpuy i dofe, ti oshung o akazia; ⁸ vir djwi na mwinda, aromati djwi na vir a lusakumuna ti na nkie ananagn a nsuu; ⁹ atari a onix ti atari amuu djwi na ngwong eleam eli ne nking ti ne ebim e nganga-Nzambi. ¹⁰ Ne kati egnu, vear amikug waye, waki vii ankeankum amituba Yaweh: ¹¹ tabernakulu, evuru ewo e kapo ti otwon owo, akunkuy awo, abaya awo, etandala ewo, ataga awo ti ngie ewo; ¹² sanduku ti etandala ewo, ondii ondima mbin, ti eleam endzub sanduku; ¹³ mesa ti etandala ewo, ti wampuug iwo, ti mampa i mbag itign-itign; ¹⁴ mwinda ti wampuug iwo, ti vir djwi na mwinda; ¹⁵ kunda e ananagn a nsuu ti eleam e ndzub ne epfug djwi na nshwe ne tabernakulu; ¹⁶ kunda e empeab, eking ewo e ewuu, etandala ewo ti alongo awo ankum, mpuug ewo eninen ti ebaay ewo e ngie; ¹⁷ nseam e lien, ataga awo, ebaay ewo e ngie ti eleam e ndzub ne epfug e nteang evuru e Nzeam; ¹⁸ entshuay e ondii o santu, entshuay e nteang evuru e Nzeam, ti eshing ewo; eleam otshia ne ondii o santu, ¹⁹ ileam imisakumuna wo djwi na Aaron wur ekie empeab, ti ileam aman ande wa nganga-Nzambi." ²⁰ Aman Israel ankeankum s'apwiwo etay eyike Moize. ²¹ Vear ankeankum ayikir vii awo ne itura ti ayileang na nkie s'ayiwo mpea makabu ya Yaweh djwi na etshia ne evuru e Nzeam, djwi na etshia ende enkum mpi djwi na ileam imisakumuna wo. ²² Ampeam ti ankear wayia, vear ankeankum ayii na itura i wuo wayia na entshway, na ayag, na vim a wolo eshin na eshin; wur na wur ayia mpea makabu inde i wolo ya Yaweh. ²³ Vear ankeankum ayike na ileam ili na atono a bule, atono a kwi-kwi, ileam i marikagn, ileam i viey i mbur, i mpuy ameme awum ili na atono a kwi-kwi ti mpuy i dofe, s'ayiwo na wo. ²⁴ Vear ankeankum ayijirike mbwo dzug djwi na njie makabu i etiempar ti ewuu, ayiwo mpea makabu iwo ya Yaweh. Vear ankeankum ayike na eshung e akazia djwi na etshia abaya, ayiwo mpea. ²⁵ Vear ankeankum ayikug na ntiye ileam na mbwo, na eshing, ili na atono a bule, atono a kwi-kwi ti esing ileam i marikagn, ayiwo na etshia ewo enagn. ²⁶ Ankear ankeankum ayii na itura i wuo, mpi ayii na luzolo e nkie, s'atiyiwo ileam i eshing e viey i mbur. ²⁷ Ankum a aman Israel wayia na atari a onikisi ti atari amuu djwi na ileam i nkung ti ileam i ebimi; ²⁸ vim a nsuu ti vir djwi na mwinda, djwi na vir a lusakumuna mpi djwi na ananagn a nsuu. ²⁹ Aman ankeankum Israel, na ampeam, na ankear, ayikir vii anagn ne itura djwi na nkie otshia oyitum Yaweh oshin oyikabinde Moize, wayia na makabu na luzolo ewo etay e Yaweh. ³⁰ Moize atuba nda aman Israel ndenden: "Jiagni gnugnun Yaweh atisoon Betisalele, mon e Uria, mon e Hur, eli ne okuu o Yuda. ³¹ Atoyura na Mpeve e Nzeam, na ntiegn, na wagn, ti na njia etshia eshin na eshin. ³² Atopea biu e nganga wavim, e nkie etshia e wolo, e etiempar ti e iwuu; ³³ na mfugn ne atari, na nkie otshia na abaya ti na nkie etshia e mbwo inkeankum. ³⁴ Opinde mpi ti ikab i ndong vear, oshin omog ti Oholiab, mon e Ayisamaki, eli ne okuu o Dan. ³⁵ Ayurinde to na waagn, djwi na nkie etshia e mbwo enkeankum, djwi na ntiye ileam ili na atono a bule, a kwi-kwi, ti a marikagn, djwi na nkie etshia enkeankum mpi na nganga vim eshin na eshin.