¹ Yaweh atuba nda Moize ndenden: "Kie mesa ipe na atari kamsi eyikiyie nteang, mby asifugn me vii ayike ne mesa inkeape iyibuyi yie enagn. ² Osug, ne lii-lii, asivean yie ne ombimi e Sinaiasiyia yie kog ne nteang eme, ne nsor ombimi. ³ Wur ateyike nda yie ve, mpi ekwon ngya na wur ne ombimi. Ata imeme to ngombe epikug ngya nda mbeama na ombimi onagn ve. ⁴ Moize mpi akie mesa ipe na atari kamsi mesa iyi nteang. Ayioma ne lii-lii, atsa ne ombimi e Sinai, oshin oyitubi Yaweh nda nde. Moize s'avey nde mesa atari inkeape ne mbwo inde. ⁵ Yaweh akra ne odjinga emog yim dzug, ayima mbeama na nde, mby adzama dzin i "Yaweh". ⁶ Mby Yaweh s'aleg nde ne nteang ende, aledzami: "Yaweh! Yaweh! Nzeam etsa ngyug ngy, nkier inde aliwo okwog-okwog, ali otsun ne ngagn, ⁷ atsa nde ngwum ngagn ende tii ko ndwong e iwug imog aman amiwur wo, atsa nde ndolula ipwo i vear, ote biu, ti masumu iwo, kansi apisiami wur emikie ipwo ve, mpi ipwo iyikii atea, atsa nde mpea ndola ewo ya aman ti ankean, tii ko ndwong isar to inign." ⁸ Etean kaku, Moize ababa ne buu, akr abong. ⁹ Atuba ndenden: "Nkum, yug ntivea ngrasia ne vy ayie, kien ya su, djwi vear ane wali na isur ne nking, lolula ipwo isu ti masumu isu, mpi otevey sikum vear ayie." ¹⁰ yaweh akeara ndenden: "Yen, ndakie alien ti gnu. Ne vy a vear ayie ankeankum, ayakie me vii a ngituka etotigni wo ngyen ata ne buu emog ve. Vear a buu emuu eli mbeama na gnu ayayen wo etshia e Yaweh. Ayakie me vii a biu-biu anagn ne kati eyie. ¹¹ Osug na vii okaba me luo ene. Yen, ndakma ne nteang egnu, vear a Amore, vear a Kanaana, vear a Heti, vear a Ferezi, vear a Hevi ti vear a Yebisi. ¹² Osug, oyakiagni alien ti vear a buu eletshignu nsakr ve, ongiang wakafiyia kamsi ilung djwi na gnu. ¹³ Gnu, ayabvuo gnu wakunda iwo, ayabuye gnu wa ignignig iwo mpi ayabvuo gnu bifwanisu iwo ilesami wo na wo. ¹⁴ Opayakr abong ne nteang e nzeam emuu ve, djwi Yaweh ali na dzin i kimpala, ali Nzeam e kimpala. ¹⁵ Osug, oyakie alien ve ya vear a buu enagn, djwi ntangu esikr gnu abong ne nteang e wanzeam iwo, mpi ntangu esikiegnu empeab djwi na wo, asoviagni wo, okatsa ndagni wagnam isidjag wo. ¹⁶ Okaveyagni aman awo ankera djwi na aman agnu ampeam; mby aman ankear anagn, ntangu esikiewo kinduma ti wa nzeam iwo inagn, wakabin aman agnu ampeam djwi na nkie mpi kinduma ti wanzeam iwo. ¹⁷ Oyakie nzeam e bifwanisu ve. ¹⁸ Ayalemfukakagnu na nkie okina o mampa ikwon ete, oshin oyitubi me ma gnu, nshuu ishambia ne ntangu ekiewo antu, ne ngwon enagn, ogniang apwignu ne buu e Ejpiti ne ngwon ekiewo antu. ¹⁹ Mon enkeankum e nsom eteang ali djwi na me. Ata mon e wum ontete, e gnam ewunga yie, eli djwi na me. ²⁰ Ayasongo yie mon imeme e wum ti mon e nteang e mpunda, yug okasongo ve, ayobuye yie ne mby ote. Ayasongo yie mon e nsom eteang ne kati aman ayie, mpi opayayia ne nteang eme ko mbwo mpama ve. ²¹ Ayakiaka yie otshia nshuu isom, eshuu ishambia; eshuu ishambia, ayayor yie. Ata ne ntangu efuy yie vim ne evur ti ntangu eyakeaga yie vim ne evur, ayayoraka yie. ²² Ayakiaka yie okina e konso mposo, e vim a nteang ekeaga yie ne evur, ne nsuka e mvwe. ²³ Aman ampeam ankeankum ayayiaka wo mpwe mbala isar ne mvwe emog, ne nteang e Nkum, Yaweh, Nzeam Israel. ²⁴ Ogniang, ayakma me vear apier nteang eyie, mpi ayangama me onduu o buu eyie, kaku wur eyakie ipwo djwi na buu eyie ve; ntangu eyaveanaka yie djwi na nsa mpwe ne nteang e Yaweh Nzeam eyie, mbala isar ne mvwe emog. ²⁵ Opayakie empeab e aluung a gnam ti mampa ili na ete djwi na me ve, djwi na lokumu eme ve, mpi ata empeab e okina o pake, opayawumagni wog ve, yim otshuu tii ekeami vuna ve. ²⁶ Ne evuru e Yaweh, Nzeam eyie, ayajie yie mbeam inteang imikeaga yie ne vim ayifuy yie ne buu. Opikug mfum ve imon i mbur ili ko ne aveo a mea nde. ²⁷ Yaweh atuba nda Moize ndenden: "Fugn vii atuba me ene, djwi eli ko ne otuba one ekie me alien ti yie, ti Israel." ²⁸ Moize ayinde kog ti Yaweh nshuu onign, na mbiiy na otshuu; akala ve, akagnua mpi ve. Mby Yaweh s'afugn nde ne dzug i wamesa inagn, otuba o alien, etuba djum ²⁹ Moize akra yim ombim o Sinai, na wamesa inkeape i ntiegn ne mbwo inde. Ntangu elekri nde ombim onagn, akajiaka ve ndenden elung ende elepii oveanga o tshiya, djwi ayim nkie ayamu nda Yaweh. ³⁰ Aaron ti aman Israel ankeankum wakir Moize, wayen elung ende epea oveanga o tshiya, mby s'ayugiki wo womo na mvanga mbeama na nde. ³¹ Moize s'aviinde; Aaron ti ankum a aman Israel, s'ayiwo etay eli nde, mby s'akabikinde vii awo. ³² Ne mby ewo, aman Israel ankeankum s'avangi wo ondii oli nde, mby s'akabikinde vii ankeankum amivey nde ya Yaweh ne ombim o Sinai. ³³ Ntangu emishir ntuba Moize nda wo, s'adzub nde eleam ne elung ende. ³⁴ Ntangu esitsa Moize ne nteang e Yaweh djwi n'onkaba vii, alimikinde eleam eyidzub nde, tii ko ntangu esipwe nde; mby ntangu esipwe nde, akey nkaba aman Israel vii amitum wo na nkie. ³⁵ Aman Israel alirikiwo elung e Moize, ayenikiwo elung ende epea oveanga o tshiya; mby Moize s'adzubikinde eleam ne elung ende, tii ko esikeande nshwe djwi na nsula ti Yaweh.