² Ayatum me wanzio emog ne nteang eyie, mby ayakma me vear a Kanaana, vear a Amore, vear a Heti, vear a Ferezi, vear a Hevi ti vear a Yebusi. ³ Vean ne buu enagn, endii elekri mabele ti vir a mpag, kansi me, mpayia ne kati egnu ve, yug kaku asilunga gnu na tshiya ne mbug eletshignu, djwi olagni na isur ne nking." ⁴ Ntangu emiyug vear oshin otuba onagn, s'ayug wo womo, wakafilwer ayag awo ve. ⁵ Mby Yaweh atuba nda moize ndenden: "Kaba aman Israel yeyen: "Olagni vear ali na isur ne nking, yug miyia ne kati egnu, asilunga gnu na tshiya. Opeane, limagni ayag agnu, mby asilir me nge eskug me nkie djwi na gnu.'" ⁶ Aman Israel s'alimiwo ayag awo, watsa etey na ombimi e Oreb. ⁷ Moize avey evuru e kapo, ayim nelien e ntn, ontinteang mpign, s'apinde wog dzin iwo ndenden Ondii o esangu. Mpi wur enkum eyike na djwi i ngyue djwi inkum etay e Yaweh, aleshwikiwo ne imon i evuru enagn, nelien e ntn. ⁸ Ntangu eletshike Moize ne evuru e kapo, wur enkum afwete ngima ne nteang ende evuru. Ko vy ande asalir Moize tii esitsande nshwe ne evuru e kapo enagn. ⁹ Ntangu esishwe Moize ne evuru e kapo, edjinga alekrikiwo yim dzug, eyimi ne epfug e evuru, mby Yaweh akike ayamu nda Moize. ¹⁰ Wur enkum aleyeniki nde edjinga enagn eleyike ngima ne epfug e evuru e kapo, wur enkum afukami ne nteang e epfug ende evuru. ¹¹ Yaweh akikinde ayamu nda moize elung na elung kamsi wur ayama nda ewur ende. Mby Moize akey ntsa ne ntn ewo; kansi wur enden otshia, Yozue, imon ilieng inagn, e mon e Nun, nde, akapweaka ve nelien evuru e kapo enagn. ¹² Moize atuba nda Yaweh ndenden: "Yen, wean otuba ya me yeyen: 'Vean ti vear ane! Kansi opinkabi ve nagn esitsame ti nde. Mpi otuba yeyen: Ndojia yie ne dzin, mpi otivea ngrasia ne vy ame.' ¹³ Opeane, yug ntivea ngrasia ne vy ayie, onkabi wambug iyie, mby asojia me, mpi asilega me mvea ngrasia ne vy ayie. Jia yeyen vear ane wali vear ayie." ¹⁴ Yaweh akeara ndenden: "Memie ayakienaka me ti yie, mby yie, asopeaka me ntangu e ngyor." ¹⁵ Moize atuba nda nde ndenden: "Yug yemie okakien ti su ve, kaku mfunu esitelima yie nendien ve. ¹⁶ Oshin onkagn esijia me memen ntivea ngrasia ne vy ayie, na me, na vear ayie ane? Epa ko ntangu esikienaka yie ya su, esiyen vear amuu ankum ali ne buu ene wuwun epa sili oshin omog ti wo ve?" ¹⁷ Yaweh atuba nda Moize ndenden: "Asikie me ko oshin omituba yie, ogniang otivea ngrasia ne vy ame, mpi ndojia yie ne dzin iyie." ¹⁸ Moize atuba ndenden: "Ongyegni nkembo eyie." ¹⁹ yaweh okeara ndenden: "Wuo ome enkeankum asileg wo ne nteang eyie, mpi asidzamaka me ne nteang eyie dzin i Yaweh; atsame mpea bgrasia ya wur epeame ngrasia, mpi ngy ya wur eyug me ngy." ²⁰ Yaweh atuba ndenden: "Opakug ngyen elung eme ve osayia na luzingu." ²¹ Yaweh atuba ndenden: "Yen, ondii omuu owean mbeama na me, asiyima yie ne dzug itari ine. ²² Ntangue esileg nkembo eme, asoziy me neti e ipug eli ne itari ine, asodzub me na ewuo eme, tii ko esileg me. ²³ Mby ntangu esitshima me ewuo eme, asisayie ngyen ne mby, kansi wur apikug ngyen elung eme ve."