¹ Yaweh atuba nda Moize ndenden: ² "Jia yeyen ntisoon Betisalele, mon e Uria, e mon e Hur ne okuu o Yuda. ³ Ntoyura na Mpeve e Nzeam, na ntiegn,na waagn djwi na etshia enkum. ⁴ Ntopea biu e nkie vim a mpa, na nkie etshia na wolo, na etiempar ti na ewuu; ⁵ na mfugn ne atarina nkie abaya ti na nkie etshia eshin n'eshin. ⁶ Yen, ntopea nde wur esosarisa, Oliab mon e Ayisamaki, wur e okuu o Dan. Ntitsug waagn ne mpeve e vear ankum akug, djwi na nkie vii ankum amotum me yie na nkie: ⁷ evuru e kapo, sanduku e ntiegn, ondii o ndima mbin ayayia wo ne dzug iwo, ti wampuug na alongo ankum ali ne evuru e kapo enagn; ⁸ mesa ti mpuug na alongo awomwinda e wolo eli kaku mbin enagn, ti mpuug na alongo awo ankum, ⁹ kunda e ananagn a snuu, kunda ekiewo empeab ti mpuug na alongo awo ankum, mpuug eninen ti mbag ewo. ¹⁰ Ileam otshia ti ileam imisakumuna wo djwi na Aaron wur ekie empeab, ileam i aman ande djwi na otshia o nganga-Nzambi; ¹¹ vir a lusakumuna ti ananagn a nsuu djwi na ondii o santu. Asilemfuka wo na vii ankum amituba mema yie." ¹² Yaweh atuba nda Moize ndenden: ¹³ "Kaba aman Israel yeyen: 'Opakwonagni ve na ndemfuka na ebing eme, djwi enagn ayayia wo vim emog eyakab ne kati egnu ti me, ti aman a gnu wuwun me ndi Yaweh emotsugagni wasantu. ¹⁴ Lemfukagni na nshuu obing, djwi enagn ayayiawo vim emog e santu. Wur eyapiy onkwon e eshuu obing ayavey nde ndola e ewa. Wur eyakie otshia eshuu obing, ayolima wo ondii oli atwung ande. ¹⁵ Ayakiakagnu etshia nshuu isom, kansi eshuu ishambia eli obing, eshuu eyor gnu, emipeagnu ya Yaweh. Wur eyakie otshia eshuu obing ayavey nde ndola e ewa. ¹⁶ Aman Israel ayalemfuka wo na nshuu obing, ayakiaka wo okina, na wo, na aman awo, ayayiawo kamsi alien a mvwe na mvwe. ¹⁷ Enagn ayayiawo kidimu eyasatsuga mvwe na mvwe ne kati eme ti wo, djwi Yaweh atikie olung na buu ne nshuu isom. Mby ne eshuu e ishambia s'ashirinde, mby s'ayor nde." ¹⁸ Ntangu emishir ntuba Yaweh nda Moize oshin onagn ne ombimi e Sinai, s'opinde mesa ipe i ntiegn, mesa imikiewo na atari, Nzeam amifugn vii awo na epign ende.