¹ Yen oshin oyakie yie djwi wakum osantu, djwi wakii otshia ome o nganga-Nzambi. Vey ngombe emog e wum eli ko ilieng, ti awum ameme ape ili kaku ekom, ² vey bintuntu, kie ekuru, mampa ikwon ete, enkata ikwon ete, emikeang wo na vir, ti enkata e ndzum ekwon ete, emizra wo vir. ³ Ayatsug yie wog ne esag, mby odjag imon i ngombe e wum enagn ti awum ameme ape anagn. ⁴ Ayatum yie Aaron ti aman ande watokavanga mbeama na epfug e ondii o nsanga. Ayayog yie Aaron ti aman ande vay. ⁵ Ayavey yie ileam i ndwer Aaron ti aman ande simisi, olobo, itambala i nking, ti eleam e ebimi, ayolwer yie mpi okaba e itambala i nking. ⁶ Ayoyab yie impu ne dzug inde ote, mby asitsug yie impu i santu ne dzug impu inde. ⁷ Mby asivey yie vir a lusakumuna, asozra yie nde ne ote, mby odziy nde vir awo. ⁸ Asivie yie mpi aman ande mbeama na yie, asalwer yie wasimisi. ⁹ Asilwer yie Aaron tu aman ande okaba, asabeam yie ampu n'ete ewo. Otshia e nganga-Nzambi eli djwi na wo, enagn nsiku ewo e mvwe na mvwe. Asisakumuna yie Aaron ti aman ande. djwi n'otshia ome. ¹⁰ Asiyia yie na ngombe e wum enagn ne ondii o nkie empeab, Aaron ti aman ande asiyab wo mbwo iwo ne dzug ote e ngombe enagn. ¹¹ Asibag yie ngombe enagn nking ne nteang e Yaweh, ne mbwung evuru e kapo, ondii okiewo empeab. ¹² Asivey yie aluung a ngombe enagn, asikwe yie ne epign eyie, ne asig ali ne kunda, mby aluung ankum anagn asipay yie wog ne ngie e kunda. ¹³ Asivey yie vir ankum ali ne ipfugn i ngombe, epig eninen, mbeam i nging, ti vir aminaba neti, mby asitsug yie wog ne tshiya ne kunda, elungi. ¹⁴ Kansi eky enkum e ngombe e wum enagn, asibwo yie wog ne tshiya nelien opeang. Enagn eli makabu i masumu. ¹⁵ Asivey yie imeme imog, Aaron ti aman ande asiyab wo mbwo ne dzug inde ote. ¹⁶ Asibag yie imeme iwo nking, asivey yie aluung awo asipay yie mbeama na kunda, oletshimike ne kunda. ¹⁷ Asisay yie imeme iwo itign-itign, asisuy yie ipfugn ti nsobo iwo, ti nkuu, asitsug yie ondii omog ti itign inagn, oyab ne dzug ote ewo. ¹⁸ Asibwo yie imeme inkum ne tshiya, asipea wo nsuu ewuo ne nteang e Yaweh. ¹⁹ Asivey yie imeme imuu, Aaron ti aman ande asiyab wo mbwo ne ote ende. ²⁰ Asibag yie imeme iwo nking, asivey yie aluung awo, asitsug yie ne itii i wum e Aaron, ti ne itii i wum aman ande ankum, ne epign isigi e ekuu e wum ewo wanakum, mpi asimwang yie aluung anagn oletshimike ne kunda. ²¹ Asivey yie aluung ali ne dzug i kunda, ti vir a lusakumuna, mby omwang Aaron ti aman ande ne djuung ti ne ileam iwo. Mby oshin onagn, Aaron ti ileam inde, aman ande ti ileam iwo, asivey wo lusakumuna. ²² Asivey yie vir imemeinagn, oyir onde ti vir ali ne ipfugn onde, epig eninen ti mbeam i nging inkeape ti vir ali mbeama na wo, ti itsin ewuo e wum, djwi eli imeme imidjag wo djwi na lusakumuna. ²³ Asitsug yie ne esag, mampa inkuon ete, asiky yie wog ne nteang e Yaweh, mampa emog, onkata emog emikeang wo na vir ti emog e nzum. ²⁴ Asitsug yie vim ankum anagn ne mbwo i Aaron ti ne mbwo aman ande, mby asignug yie wog etay n'etay ne nteang e Yaweh. ²⁵ Mby asilima yie wog ne mbwo iwo, mpi otwomi wog elung ne tshiya ne kunda, ne dzug i makabu inagn. Enagn eli makabu isilunga ne tshiya ne nteang e Yaweh, eli na nsuu e wuo. ²⁶ Asiveyb yie isug imeme inagn imipea wo djwi na lusakumuna e Aaron ti aman ande, asignug yie wog etay n'etay ne nteang e Yaweh; enagn eli ikab iye. ²⁷ Asisakumuna yie isug ti itsin ewuo imeme eyidjag wo djwi na lusakumuna e Aaron ti aman ande, asignug yie isug inagn etay n'etay, mby ewuo enagn, asiyegne yie wog ne dzug. ²⁸ Enagn eli ikab i Aaron ti aman ande. Ene eli nsiku eyasakiaka aman Israel, ogniang eli makabu iyasajiraka wo ne dzug mpi makabu i nkeara nsag-na-vie djwi na aman Israel, makabu i nsiang dzug ili djwi na Yaweh. ²⁹ Ileam i lusakumuna i Aaron, yug atiwa, ayasawotsuga djwi na aman ande, ayasawo lwer wog yug watasakwe vir mpi watasakumuna. ³⁰ Nganga-Nzambi eyasakr ne kati aman ande, eli mon eyasakr ne otshia e evuru e santu, mpi eyasashwe ne ondii o nkie empeab, ayalwer nde ileam onagn ko nshuu ishambia. ³¹ Asivey yie imeme empeab, mby ofum eky ewone ondii o santu. ³² Aaron ti aman ande asilawo ko ne mbwung, na nshwe ne ondii o nkie empeab. Asilawo mampa ti oky imeme esitsug wo ne esag. ³³ Asilawo imeme iyidjag wo djwi na ndima mbin iwo, ogniang wavey lusakumuna mpi wakum osantu. Kaku ata ongingien emog ve eyala vim anagn, djwi eli vim a santu. ³⁴ Yug eky imeme ti mampa imuu imisashuna, imikeama vuna, asibwo yie wog ne tshiya inkeankum isisatsuga enagn; wapafila wog ve, djwi eli vim a santu. ³⁵ Ayalemfuka yie na wansiku inkum imopea me djwi na Aaron ti aman ande. Ayakie yie nshuu ishambia djwi na nsakumuna wo. ³⁶ Ne empeab, ayadjagaka yie ngombe e wum konso eshuu djwi na ndima masumu na aluung awo. Ayamwangaka yie aluung awo ne kunda djwi na nsuy wog, mby ayakwe yie aluung awo ne kunda djwu ekum e santu. ³⁷ Nshuu ishambia, ayamwangaka yie ko aluung ne kunda, mpi na nsakumuna wog djwi elegi nkum e santu, ata vim enkum esita na kunda, asikum ko santu. ³⁸ Yen vim eyadjag yie ne empeab djwi na kunda: ameme awum ape e mvwe emog, konso eshuu, mvwe na mvwe. ³⁹ Asidjag yie imeme imog ne suka, mby emuu asidjag yie ne ngnina otshuu. ⁴⁰ Ntangu esidjag yie imeme inteang ne empeab enagn, asipea yie ikab ekuru emog ne akab djum, ikab i vir a olive emog ne akab anign, vir amileam wo wuo djwi na mwang mpi ivim i veana ne buu. ⁴¹ Asidjag yie imeme ozole ne ngnina otshuu, ti makabu emog, na mwang mpi ivim i veana ne buu kamsi eyiki yie ne suka; eli empeab esilunga ne tshiya, eli na nsuu e wuo etay e Yaweh. ⁴² Enagn wog empeab eyakiaka gnu mvwe na mvwe, ti aman agnu ayasawur mby, ko ne mbwung na nshwe ne ondii o nkie empeab, ne nteang e Yaweh. Enagn eli ondii oyasanga me ti gnu mpi ondii eyokabakagni me vii. ⁴³ Ayasangaka me ti aman Israel neti, mpi ondii onagn ayakum wo ondii o santu djwi na nkembo eme. ⁴⁴ Ayasakumuna me ondii o nkie empeab djwi ekum e santu; ayasakumuna me Aaron ti aman ande, wakum osantu djwi wakii otshia ome o nganga-Nzambi. ⁴⁵ Ayapieraka me ne kati aman Israel, mby me, ayayia me Nzeam ewo. ⁴⁶ Ayajia wo wuwun me ndi Yaweh, Nzeam eyapur wo ne buu e Ejipiti, djwi na mpier ne kati ewo.