¹ Vey otwung oyie Aaron ti aman ande waye mbeama na yie ne kati e aman Israel, djwi na nsakumuna ne otshia ome wayi wanganga-Nzambi: Aaron ti aman ande, Nadab, Abku, Eleazarti Itamar. ² Djwi na otwung oyie Aaron, ayatiye yie ileam i lusakumuna djwi n'ompea nde luzitu mpi djwi wayen oshin oli nde. ³ Ayatuba yie ya vear ankum amikug, vear amipeame mpeve e waagn, wog anagn ayatiye wo ileam i Aaron, djwi wasakumuni mpi akii otshia ome e nganga-Nzambi. ⁴ Yen ileam iyakie wo: wolo e ndwer ne ebim, itambala i nking, olobo, simisi emitiye wo na mbwo, impu, okaba. Ayakie wo ileam i lusakumuna djwi na otwung oyie ti aman ande, djwi wakii otshia ome o nganga-Nzambi. ⁵ Ayakie wo na wolo, na ileam ili na atono a bule, atono a kwi ti ileam i marikagn. ⁶ Ayakie wo itambala i nking e wolo, na oshing o bule, e kwi ti e marikagn. Vear ajia ayatiye wo wuo-wuo. ⁷ Ne nseam apg, ayatsug wo mpete iyasiama yim nsuka tii nsuka; ayayia wo oshin onagn. ⁸ Ayakie wo okaba kamsi ko esikie wo itambala i nking, ayabeam wo okaba ne dzug iwo. Ayayia wo okaba e wolo, na oshing e bule, e kwi ti e marikagn. ⁹ Ayavey yie atari ape onikisi, mpi ayafugn yie ne dzug iwo vn a aman djum n'ipe Israel. ¹⁰ Vn aman asom a nteang ne itari imog, mby vn aman asom a mby ne itari imuu; ayalana yie ko oshin oyawur wo. ¹¹ Ne dzug atari ankeape, ayafugn yie vn aman Israel kamsi etsawo mbeam tampo; vn anagn ayayia wo ne ngnina, ayazira yie wolo edjing djioo go. ¹² Ayatsug yie atari ankeape ne dzug itambala i nking, djwi na nkanaka aman Israel ne ntangu eyalwer Aaron vn awo ne nseam apag ne nteang e Yaweh. ¹³ Ayakie yie ebaay e wolo djwi na ngwum wog, ¹⁴ ti ayag ape i wolo ili kaku mbin, ayatwung yie kamsi okaba n'ikini, mby ayatsug yie ne ayag amitwung yie enagn. ¹⁵ Ayakie yie eleam e ntsug ne ebim ntangu ebag yie ewu, ayatwung wo wuo-wuo; ayakie wo oshin omog ti itambala i nking, ayayia wo e wolo, na eshing e bule, e kwi ti e marikagn. ¹⁶ Ayayia wo ipe, otey ti onene ewo ko oshin omog. ¹⁷ Ayayura yie na atari ndongo inign: ne ndongo e nteang, sardoni emog, topaze emog, emerodi emog; ¹⁸ ne ndongo ozole, esikarbukile emog, safir emog, diama emog; ¹⁹ ne ndongo otatu, opale emog, agate emog, ametisi emog; ²⁰ ne ndongo oya, krizolite emog, onikisi emog, jasipe emog. Atari ane ayawum wo ne ibaay i wolo. ²¹ Atari ankeankum ayayia wo djum n'ipe, ko ne isuu aman Israel, ayanaba wo biu kamsi tampo, itari imog n'emog na dzin i mon e okuu Israel. ²² Ne itari i ndwer ne ebim enagn, ayatsug yie ayag a wolo ili kaku mbin, imitwung wo kamsi okaba. ²³ Ne dzug itari i ndwer ne ebimi nagn, ayatsug yie mpete ipe i wolo, ayatsug yie mpete inagn ne nsuka na nsuka eleam ne ebimi. ²⁴ Ayashwer yie ekaba e wolo inkeape ne mpete inkeape ili ne ebimi. ²⁵ Mby ne nsuka ekaba enkeape, ayashwe wo ne dzug i mpete ili ne itambala i nking. ²⁶ Ayakie yie diaka mpete i wolo ipe imuu eyatsug yie ne nsuka inkeape eleam eli ne ebimi, ne ompaagn ewo eli ngibeam na itambala i nking. ²⁷ Mpi ayakie yie mpete i wolo ipe imuu eshwi ne ngie e mpete ili ne itambala i nking, etay e nteang, mbeama na ondii omiyung wo, ne odzu-dzug okaba eli ne itambala i nkung. ²⁸ Ayatshung wo eleam eli ne ebimi na okaba e bule ne mpete iwo eli ne itambala i nking, djwi ekwon naam na itambala i nking. ²⁹ Ntangu eyashwe Aaron ne ondii o santu, ayalwer nde ne ebimi, vn a aman Israel emifugn wo ne eleam eli n'ebimi ende djwi na mbag ewu, kog esayia vim eyakanaka nde ntangu enkum ne nteang e Yaweh. ³⁰ Ne eleam ebimi e mbag ewu enagn, ayabeam yie urim ti tumimi, mby eyii ne etura e Aaron, ntangu eyayia nde mpwe ne nteang e Yaweh. ³¹ Ayakie yie olobo e itambala i nking, enkum ayayia wo ko bule. ³² Ne ngnina ewo, wasasugn itwunu djwi n'ote; itwunu inagn ayayia wo na otiye djioo go kamsi itwunu i simisi e ngwum djuung djwi na nduur wing, djwi olobo ekwon ngyay. ³³ Ayatsug yie ne nsuka e ngie, mbeam i bule, i kwi, ne ngnina e wambeam inagn, ayatsug wo eman e ngele-ngele i wolo; ³⁴ ngele-ngele emog e wolo ti ebeam emog, ngele-ngele e wolo ti ebeam emuu ne nsuka e ngie olobo. ³⁵ Aaron ayalwer nde olobo onagndjwi n'otshia onde, ntangu eshwe nde ne ondii o santu ne nteang e Yaweh; mby ntangu elepwi nde, asiyug wo oshuru o ngele-ngele, kog apawa ve. ³⁶ Ayakie yie ebaay ewuu emikie wo na wolo, mpi ayafugn yie neti, kamsi ngibeam na tampo: "Osantu ya Yaweh". ³⁷ Ayatshung yie wog na okaba e bule ne impu, etay e nteang ewo. ³⁸ Ayayia wo ne elung e Aaron, mby Aaron ayavara nde odzuru o masumu emikie aman Israel ne ntangu epea wo makabu iwo inkeankum i santu, ayayiaka wo ntangu enkum ne elung ende ne nteang e Yaweh, djwi n'ondeang nde. ³⁹ Ayakie yie simisi e marikagn, ayakie yie impu i marikagn, ti okaba emitiye wo na mbwo. ⁴⁰ Djwi na aman a Aaron, ayakie yie ekaba djwi na wo, ti ampu a nsor-nsor, djwi wakug na etshia ewo mpi djwi vear wayen wuo. ⁴¹ Vim anagn ankeankum ayalwer yie otwung oyie Aaron ti aman ande. Ayakwe yie wo vir, ayasakumuna yie wo, ayakum wo osantu, mpi ayakie wo otshia o nganga-Nzambi emapea me. ⁴² Tiye wo ondjin e marikagn djwi na ndzub djuung iwo. Ondjin owo asibana wo ne ikini tii ko empfuy e nkuu i dzug. ⁴³ Aaron ti aman ande ayalwer wo endjin enagn ntangu eyashweaka wo ne evuru e kapo ne ondii osanga wo, ata ne kunda ne ondii o santu, oshin onagn wapayakie ipwo ve, mpi wapayawa ve. Ene nsiku eyasatsuga otshwag djwi na Aaron ti aman ankum ayasawur ne mby ende.